Read tshwa Eksodusi 26 Bible Online

Eksodusi 26 - tshwa bible

Eksodusi 26

¹U ta maha a tabernakeli hi khume ga michachalato ya wukene go saseka, gi khatilweko, ni ya wukuxe, ni yo zirila, ni ya xiwunguwungu; u ta yi maha na yi hi ni zifananiso za makerubima hi ntiro wa wutlhari.

²A kuleha ka nguwo yinwe ni yinwani ku tava 28 wa mikono, a kuanama ka yona ku tava mune wa mikono; a tinguwo tontlhe ti tava ta lipimo linwe.

³A ntlhanu wa tinguwo ti ta patsiwa khatiginwe ti rungiwa, ni tinwani ta ntlhanu ti ta patsiwawu ti rungiwa khatiginwe.

⁴U ta swula ni tingoti ta wukuxe a wutlheni ga chachalato wo sangula, tlhelweni lego gi patsilweko gi rungiwa; u ta maha zalezo a wutlheni ga chachalato lowu wu rungilweko ni tinwani tinguwo.

⁵U ta swula 50 wa tingoti ka wunwani chachalato, ni 50 wa tingoti hi tlhelo ga wunwani chachalato wa magumo; a tingoti ti ta kumana.

⁶U ta maha a 50 wa mahariketo ya nzalama, zonake u ta tlhanganisa michachalato hi mahariketo, kasi a tabemakeli giva xilo xinwe.

⁷U ta khata a michachalato hi woya ga timbuti, kasi ku maha ha yona a tenda le hehla ka tabernakeli; u khata a 11 wa michachalato.

⁸A kuleha ka nguwo yinwe ni yinwani ku tava 30 wa mikono, a kuanama ka yona mune wa mikono; a tinguwo leto ta 11 ti tava ta lipimo linwe.

⁹U ta patsa a ntlhanu wa michachalato u yi runga, ni leyi ya ntlhanu ni munwe u yi runga yocewo; lowu wa wuntlhanu ni munwe u ta petsa le mahlweni ka tabernakeli.

¹⁰U ta rungela a 50 wa tingoti wutlheni ga nguwo yo sangula ya leti ti patsilweko ti rungiwa, ni 50 wa tingoti magumo ka tinguwo tinwani.

¹¹U ta maha 50 wa mahareketo hi suku, zonake u ta enghenisa a mahareketo lomu ka tingoti, u tlhanganisa kota lezo a tenda, xiva xilo xinwe.

¹²Kasike a xipanze xi ta nga sala ka michachalato ya tenda, a khihlanya ga nguwo leyo yi ta nga sala, yi ta lengalenga ka tabernakeli hi lenzhako ka gona.

¹³Zonake a nkono lowu wu to sala hi tlhelo ga seno ni wa tlhelo ga seniya, kuanameni ka nguwo ya tabernakeli, yi ta lengalenga lomu mareveni ya gona, kasi ku gi fenengeta.

¹⁴U ta maha a xifulelo hi mabhebhe ya tiyivu ma pswhukisilweko, ni xinwani xifulelo xa le hehla xa mabhebhe ya macalo.

¹⁵U ta maha a tibakwa ta tabemakeli hi sinya ya munga, ti ta yimiswa tiku pswhe.

¹⁶A kuleha ka tibakwa ku tava 10 wa mikono, a kuanama ka tona ku tava nkono ni khihlanya.

¹⁷A bakwa yinwe ni yinwani yi tava ni zitlhanganyiso zimbiri zi khomeneko; u ta maha zalezo ka tibakwa tontlhe ta tabernakeli.

¹⁸A tibakwa leti u ta nga ti mahela a tabernakeli ti tava 20 hi tlhelo ga le Dzongeni.

¹⁹Zonake u ta maha a 40 wa zikhato za siliva, zi ta vekiwa lahasi ka 20 wa tibakwa; a bakwa yinwe ni yinwani yi tava ni zikhato zimbiri lahasi ka zitlhanganyiso za yona za zimbiri.

²⁰Hi tlhelo ga Nwalungu wa tabemakeli, u ta maha a 20 wa tibakwa,

²¹ni zikhato za kona za 40 za siliva; a bakwa yinwe ni yinwani yi hi ni zikhato zimbiri.

²²Hi tlhelo ga Mupela-gambo, hi le makutini ya tabernakeli, u ta veka a ntlhanu wa tibakwa ni yinwe.

²³Zonake u ta veka a tibakwa timbiri lomu magwitsini ya tabernakeli hi tlhelo ga le makutini;

²⁴na tona ti ta fanana kusukela lehasi kala le hehla ka xingwavila xo sangula; zi ta mahisa zalezo ka tibakwa timbiri ti ta nga vekiwa magwitsini mambiri.

²⁵Lezo ku tava ni ntlhanu wa tibakwa ni tinharu ni zikhato za kona za 16 za siliva; zi tava zimbiri lahasi ka bakwa yinwe ni yinwani.

²⁶Zonake u ta maha a ntlhanu wa tivalelo hi sinya ya munga, ti tava ta tibakwa ta tlhelo ginwani ga tabemakeli.

²⁷Ni tinwani a ntlhanu wa tivalelo ka tibakwa ta tlhelo ginwani, ni ntlhanu wa tivalelo ta tibakwa ta le makutini ka matabernakeli, hi tlhelo ga Mupela-gambo.

²⁸A livalelo la laha xikari li ta tlhanganyisa tibakwa tontlhe.

²⁹U ta nameketa a tibakwa hi nzalama, u maha a zingwavila za tona hi nzalama, kasi ku enghenisa a tivalelo ka zona; tonawo tivalelo u ta ti nameketa hi nzalama.

³⁰U ta aka tabernakeli khwatsi hilezi nzi ku kombisileko a mufananiso wa kona le xitsungeni.

³¹U ta maha a xisirelo xa mivala yo zirila ni kupswhuka, hi wukene go saseka gi khatilweko. Xi ta mahiwa hi ntiro wa wutlhari na xi hi ni zifananiso za makerubima.

³²U ta xi hayeka ka mune wa timhanze ta munga, leti ti nameketilweko hi nzalama, ti nga ni zihareketo za nzalama, ti ta tlhomekiwa ka mune wa zikhato za siliva.

³³U ta hayeka a xisirelo hi zihareketo, u enghenisa a nghaxa ya xivumelwano lomu nzeni ka xisirelo. A xisirelo xi ta avanyisa a wutshamu go Basa ni wutshamu go Basabasa.

³⁴U ta veka a xitshamu xa wuxinji hehla ka nghaxa ya xivumelwano le wutshanwini go Basabasa.

³⁵A meza u ta yi veka hi lahandle ka xisirelo; a meza ya tikandiya yi ta gamakana ni meza hi tlhelo ga Dzonga ga tabernakeli, u veka a meza hi tlhelo ga Nwalungu.

³⁶U ta maha a nyangwa ya tenda yiva ni muvala wa wukuxe, ni wo zirila, ni wo pswhuka, u yi maha hi wukene go saseka gi khatilweko hi ntiro wa wutlhari.

³⁷Zonake u ta yi mahela ntlhanu wa timhanze hi sinya ya munga, u ti nameketa hi nzalama; a zihareketo za kona zi tava za nzalama. Zonake u ta mahela a timhanze leti a ntlhanu wa zikhato za suku.