Read tshwa Eksodusi 27 Bible Online

Eksodusi 27 - tshwa bible

Eksodusi 27

¹U ta vatla a alati hi sinya ya munga; a kuleha ka gona ku tava ntlhanu wa mikono, ni kuanama ka gona ku tava ntlhanu wa mikono. A alati gi tava ni mune wa matlhelo yo ringana, A kutlakuka ka gona ku tava mikono minharu.

²U ta maha mune wa timhonzo hi lomu makhuzwini ya alati, zonake u ta gi nameketa hi suku.

³U ta maha ni zibya za gona zo wola ha zona khuma, ni mafoxola, ni minzheko, ni mafoloko, ni timbita ta makhala; zontlhe a zibya za kona u ta zi maha hi suku.

⁴U ta maha a xitlhata xa alati hi suku, zonake u maha a mune wa zingwavila za xitlhata hi suku, lomu matlhelweni ya kona ya mune.

⁵U ta xi veka hi lahasi ka xipimbitsi xi renzetekelako a alati, kasi za chikela ka khihlanya ga kutlakuka ka alati.

⁶U ta maha mipingo ya alati hi sinya ya munga, uyi nameketa hi suku.

⁷Va ta enghenisa a mipingo lomu ka zingwavila; a mipingo yi tava ka matlhelo mambiri ya alati, gi rwaliwa hi yona.

⁸U ta maha a wunzeni ga gona hi tibakwa. U ta maha khwatsi hilezi u kombisilweko le xitsungeni.

⁹Zonake u ta maha a hubye ya tabemakeli. Hi tlhelo ga le Dzongeni u ta maha tinguwo ta yona hi wukene go saseka gi khatilweko; a kuleha ka tinguwo ta kona ku tava 100 wa mikono, tiva tlhelo ginwe.

¹⁰A tlhelo lego ku tava ni 20 wa timhanze ni zikhato za tona za suku; kanilezi a zihareketo za timhanze ni tivalelo ta kora zi tava za siliva.

¹¹Ku ta mahiwa zalezo hi tlhelo ga Nwalungu; a kuleha ka hubye ku tava 100 wa mikono ya tinguwo, ni 20 wa timhanze, ni 20 wa zikhato za suku; a zihareketo za timhanze ni tivalelo ta kona zi tava za siliva.

¹²Kasi loku ku hi kuanama ka hubye tlhelweni ga Muhlwa-gambo, ku ta vekiwa a tinguwo leti ti hayekilweko ta 50 wa mikono, ni timhanze ta kona ta khume, ni zikhato za khume.

¹³Ni kuanama ka hubye hi tlhelo ga Mutsuwuka-gambo ku tava 50 wa mikono.

¹⁴A tinguwo leti ti ta nga hayekiwa ti tava ta 15 wa mikono hi tlhelo ginwani ga nyangwa,; ni timhanze tinharu ni zikhato za tona zinharu.

¹⁵Hi zalezo ni tlhelo ginwani gi tava ni tinguwo ta 15 wa mikono, ni timhanze ta kona ti tava tinharu, ni zikhato za tona zinharu.

¹⁶Laha nyangweni ya kona ku tava ni nguwo ya xisirelo ya 20 wa mikono, yi hi ni muvala wa wukuxe, ni wo zirila, ni wo pswhuka, ya wukene go saseka, yi khatilweko hi kusasekiswa hi ntiro wa wutlhari, Ku ta mahiwa ni timhanze ta kona ta mune, ni zikhato za kona za mune.

¹⁷A timhanze tontlhe leti ti tlhanganyisako a hubye ti tava ni mikwenge ya siliva, ni zihareketo za kona zi tava za siliva, a zikhato za kona zi tava za suku.

¹⁸A kuleha ka hubye ku tava 100 ga mikono; a kuanama ka yona i 50 wa mikono; a kutlakuka ka yona i ntlhanu wa mikono. Yi ta mahiwa hi wukene gi khatilweko, ni zikhato za kona zi ta mahiwa hi suku.

¹⁹A zibya zontlhe za mitiro ya tabemakeli, ni timhingu ta gona, ni timhingu tontlhe ta hubye, zi tava za suku.

²⁰Zonake u ta leletela a vanana va ka Israeli lezaku va ku nyika a mafura yo saseka ya mihanzu ya maoliva ma tava ya kuwoninga, ma ta cheliwa tikandiyeni kasi ti nga timeki.

²¹Aroni ni vanana vakwe va ta hlayisa a tabernakeli, hi le handle ka nguwo ya xisirelo, leyi yi nga le mahlweni ka Wumboni, kasi a tikandiya ti ta woninga mahlweni ka Jehova, kusukela gambyeni kala mixweni. Ku tava xilayelo xa kala kupinzuka ka zizukulwana za vanana va ka Israeli.