Read tshwa Eksodusi 28 Bible Online

Eksodusi 28 - tshwa bible

Eksodusi 28

¹U ta tshineta nakuloni Aroni ni vana vakwe kusuhani ka wena, u va hlawula xikari ka vanana va ka Israeli, kasi va tira a ntiro wa wupristi mahlweni ka mina: ku tava yena Aroni, ni vana vakwe, Nadabi, na Abihu, na Eleazari, na Itamari.

²U ta mahela nakuloni Aroni a tinguwo ti basileko, ta wukulu ni ta wumbhuri.

³U ta leletela vontlhe vanhu vo tlhariha, lava nzi va nyikileko a moya wa wutlhari, kasi va fela ku maha a tinguwo ta Aroni, kasi a basiselwa a mitiro ya wupristi mahlweni ka mina.

⁴A tinguwo leti va ta nga ti maha hi leti: a ngenge ya laha xifuveni, ni efode, ni bhaji go leha, ni hembe, ni xihuku, ni bhandi. Va ta mahela nakuloni Aroni ni vana vakwe a tinguwo leti ti basileko, kasi va fela ku tira a ntiro wa wupristi mahlweni ka mina.

⁵A va teke a nzalama, ni wukuxe, ni kupswhuka, ni xiwunguwungu, ni wukene go saseka.

⁶Va ta maha a efode hi nzalama, ni wukuxe, ni kuzirila, ni kupswhuka, ni wukene go saseka gi khatilweko, hi mitiro ya wutlhari.

⁷Yi tava ni zipanze zimbiri za tingubyana leti ti tlhanganyisako makatla, yi ta tlhanganyiswa kota lezo.

⁸A bhandi legi a efode yi ta nga bohiwa ha gona, gi tava ga lixaka la yona nguwo leyo, zi tava lixaka linwe nayo; gi ta lukiwa hi nzalama, wukuxe, ni kuzirila, ni kupswhuka, ni wukene go saseka gi khatilweko.

⁹U ta teka maribye mambiri ma vangamelako ya onikisi, u tsala ka wona a mavito ya vana va ka Israeli.

¹⁰A ntlhanu wa mavito ni ginwe ma ta tsaliwa ka ribye ginwe, ni manwani mavito ya ntlhanu ni ginwe ma ta tsaliwa ka ginwani ribye, ai ku kheta hi tixaka tabye.

¹¹U ta tsala mavito ya vana va ka Israeli ka maribye mambiri hi ndlela leyi va tsalako ha yona ka maribye yo kehla tiphera; ma ta khomiwa hi zihareketo za nzalama.

¹²A maribye laya mambiri u ta ma veka lomu makatleni ya efode, kasi ma tava xialakanyiso xa vana va ka Israeli. Aroni i ta rwala mavito ya vana va ka Israeli mahlweni ka Jehova laha makatleni yakwe, xiva xialakanyiso.

¹³U ta maha zihareketo zimbiri za nzalama,

¹⁴ni tiketani timbiri ta nzalama yi basileko; u ta swula kota tingoti, zonake u ta tlhavinyeta a tiketani leto ti Swulilweko hi zihareketo.

¹⁵U ta maha a nguwo yo tsema ha yona timhaka ya laha xifuveni, hi ntiro wa wutlhari; u ta: yi maha hi ndlela yinwe ni efode; u yi maha hi nzalama, ni wukuxe, ni kuzirila, ni kupswhuka, ni wukene go saseka gi khatilweko.

¹⁶Yi tava ni mune wa matlhelo, yi ku khwatsi xikhwehle; a kuleha ka yona ni kuanama ka yona ku ta ringana ni kuanama ka canja.

¹⁷U ta yi mehela a maribye ya tsengo wa hombe; ku tava ni mune wa tixaxa ta maribye: a ka lo ranga ku ta engheniswa sardoni, ni topazi, ni karbunkele

¹⁸ka lixaxa la wumbiri, i emeralda, ni safire, ni daimani;

¹⁹ka lixaxa la wunharu, jakinte, ni agata, ni ametista,

²⁰ka lixaxa la wumune, i krisolite, hi onikisi, ni jasperi; ma ta tiyiswa matshanwini ya wona hi nzalama.

²¹A maribye ma ta vekiwa hi kulanzelana ka mavito ya vana va, ka Israeli va khume ni vambiri; ma tava khume ni mambiri khwatsi hi tsengo wa mavito yabye; a ginwe ni ginwani gi tava ni vito ga lixaka la ka Israeli, a mavito ma ta tsaliwa hi ku kehla kota phera ya xifungo.

²²Lomu ka ngenge ya laha xifuveni u ta lungelela a tiketani leti ti swulilweko kota ngoti hi nzalama yi basileko.

²³U ta maha a zingwavila zimbiri za nzalama laha ka ngenge; u ta vekela zingwavila zimbiri le magumo ka ngenge ya laha xifuveni.

²⁴Zonake u ta khweketa tiketani leto ta timbiri ta nzalama lomu ka zingwavila lezi za zimbiri zi nga magumo ka ngenge.

²⁵Zonake u ta khweketa hi le magunweni mambiri ya tiketani lomu ka zihareketo zimbiri; zonake u vekela makatleni ya efode hi le mahlweni ka yona.

²⁶U ta maha kambe a zingwavila zimbiri za nzalama u zi veka le magunweni mambiri ya ngenge ya laha xifuveni hi tlhelo ga efode.

²⁷U ta maha ni zingwavila zimbiri za nzalama, u zi veka makatleni mambiri ya efode hi lahasi, kusuhani ni laha zi rungilweko ha kona, hi le hehla ka bhandi ga efode.

²⁸Va ta boha a ngenge hi zingwavila za yona ni le zingwavileni za efode hi ngoti ya wukuxe, uta yi boha laha ka bhandi ga efode; a ngenge yi nga dzuki yi tlhatlheka laha ka efode.

²⁹Loku Aroni a enghena wutshanwini go basa, i ta rwala mavito ya vanana va ka Israeli laha xifuveni xakwe hi ngenge ya ku tsema timhaka, kasi xiva xialakanyiso xa kala kupinzuka mahlweni ka Jehova.

³⁰Zonake u ta veka Urim ni Tummim lomu ka ngenge yo tsema timhaka, kasi za tshama hehla ha mbilu ya Aroni loku aya mahlweni ka Jehova; zonake Aroni i ta rwala a kulamula ka vanana va ka Israeli ngengeni yakwe mahlweni ka Jehova kala kupinzuka. [67]

³¹A nguwo yontlhe ya efode u ta yi maha hi wukuxe.

³²Yi ta bhoxiwa laha xikari, laha a hloko yi ta nga engheniswa ha kona kota xikatawu xa xiketse; yi ta komelwa kontlhe lomu nhanwini kasi yi nga hanzuki.

³³Lahasi ka yona u ta rungela mapomegranada ya wukuxe, ni kuzirila, ni kupswhuka, u yi renzelekela matlhelo wontihe, a vanyangende va nzalama va ta mehelwa xikari ka mapomegranada.

³⁴Ku ta mehelwa nyangende wa nzalama ni granada, a nyangende wa nzalama ni granada laha hasi ka nguwo hi ku renzelekela kontlhe.

³⁵Aroni i ta yi ambala loku a tira; a kuvuma ka yona ku ta zwala loku a enghena wutshanwini go basa mahlweni ka Jehova, ni loku a huma, kasi a ngafi.

³⁶Zonake u ta maha a xapa hi nzalama yi hlutilweko, u tsala ka yona hi ku kehla, khwatsi hilezi ku kehliwako zona laha ka phera, u tsala timhaka leti: Ku basiselwe Jehova.

³⁷U ta zi mehela hi ngoti ya wukuxe, zonake zi ta vekiwa mahlweni ka xihuku.

³⁸Xi tava laha ximombyeni xa Aroni; Aroni i ta rwala a zivi lezi zi ta nga namarela ka zinyikiwo zo basa zi ta nga nehiwa hi vanana va ka Israeli, laha na va neha miphahlo yabye yi basileko. Xi tava ximombyeni xakwe xontlhe xikhati, kasi va amukeleka mahlweni ka Jehova.

³⁹U ta maha ni hembe hi nguwo ya wukene go saseka; u maha ni xihuku xa wukene go saseka; u maha ni bhandi legi gi komelweko hi mitiro ya wutlhari.

⁴⁰U ta mahela a vana va Aroni a tinguwo ni mabhandi, ni zihuku za wumbhuri, zo hatima.

⁴¹U ta ambexa a nakuloni Aroni ni vana vakwe, u va tota hi mafura, u va basisa, kasi vave ntirweni wa wupristi mahlweni ka mina.

⁴²U ta va rungela ni mabhuluku ya wukene, kasi va fihla a wumbyiri gabye; ma ta bohiwa kusukela xiwunwini kala ma chikela madzolweni.

⁴³Aroni ni vana vakwe va ta ma ambala loku va enghena lomu tendeni ga mutlhangano, ni loku va tshinela laha alatini ku ya tira mitiro lomu ka wutshamu go basa, kasi va nga dzuki va kuma nanzu, vafa. Xi tava xileletelo xa kala kupinzuka, xi nyikilweko ka Aroni ni zizukulwana zakwe.