Read tshwa Eksodusi 29 Bible Online

Eksodusi 29 - tshwa bible

Eksodusi 29

¹Loku u va wumbela akuva vapristi mahlweni ka mina, u ta maha kota lezi: Teka a rolana ni tihambana timbiri leti ti nga hiko na bawa,

²ni zibaha zi nga comelwangiko; ni zikhekhetselo zi nga comelwangiko, zi kanyangilweko hi mafura; ni zikhekhetselo za linwani lixaka zi nga comelwangiko, zi totilweko hi mafura; u zi maha hi mapa ma nanaselweko ya tirigo.

³U zi veka lomu xirunzwini, u zi neha hi xirunzu, zinwe ni nkuzi ni tihamba timbiri.

⁴Zonake u ta tshineta Aroni ni vana vakwe laha nyangweni ya tendeni ga mutlhangano, u va hlaza hi mati.

⁵Zonake u ta teka a tinguwo; Aroni u mu ambexa a bhaji, ni nguwo ya efode, ni efode, ni ngenge, u mu boha hi bhandi ga efode,

⁶u mu vekela ni xihuku laha hlokweni, u vekela a xidlodlo xo basa laha ka xihuku.

⁷U ta teka mafura yo tola u ma chela laha hlokweni, u mu tota.

⁸U ta tshineta ni vana vakwe, u va ambexa tinguwo.

⁹Zonake u ta boha Aroni ni vana vakwe hi mabhandi, u va vekela zihuku zonake va tava vapristi kala kupinzuka; u ta va wumbelisa lezo Aroni ni vana vakwe.

¹⁰Zonake u ta tshineta a rogana mahlweni ka tenda ga mutlhangano, Aroni ni vana vakwe va ta tlhateka mandla laha hlokweni ya gona.

¹¹Zonake u ta gi tlhava mahlweni ka Jehova laha nyangweni ya tenda ga mutlhangano.

¹²U ta teka a nkhata wa role u tota laha timhonzweni ta alati hi litiho; a nkhata lowu wu seleko u wu chulula lahasi ka alati.

¹³Uta teka mafura wontihe lawa ma pambeleko marumbu, ni pambani wa zivinzi, ni tiswa timbiri, ni mafura ya tona, u zi hisa laha alatini.

¹⁴Kanilezi a nyama ya role ni bhebhe ga kona ni swanyi wa kona, u ta zi hisa lahandle ka wugovelo; zi hi muphahlo wa kuonha. [68]

¹⁵U ta teka a hamba yinwani, Aroni ni vana vakwe va ta yi tlhateka mandla laha hlokweni ya yona.

¹⁶Zonake u ta yi tlhava, u teka a nkhata wa yona u wu nwatsekela matlhelo wontihe ya alati.

¹⁷Zonake u ta tsemelela a ziro za yona, u hlaza marumbu ya kona ni masonzo ya kona, u veka wutshamu ginwe zontlhe ziro ni hloko.

¹⁸U ta hisa a hamba yontlhe laha alatini; muphahlelo wa Jehova wa masema yo nanziha; muphahlelo wa munyikelo wa ku hiswa wa Jehova.

¹⁹U ta teka a hamba ya wumbiri, Aroni ni vana vakwe va ta tlhateka a mandla yabye hehla ka hloko ya hamba,

²⁰zonake u ta yi tlhava, u teka a nkhata u wu tota le magumo ya ndleve ya xinene ya Aroni, ni magumo ka tindleve ta xinene ta vana vakwe, ni ka litiho labye la hombe la canja ga xinene; ni ka litiho labye la hombe la konzo wa xinene; a nkhata wunwani u ta nwatsekela matlhelo wontihe ya alati.

²¹U ta teka a nkhata lowu wu nga lomu alatini ni mafura yo tola, u nwatsekela Aroni ni tinguwo takwe, ni vana vakwe ni tinguwo tabye, lezo i tava a basileko, yena ni tinguwo takwe, ni vana vakwe zinwe ni tinguwo tabye.

²²Zonake u ta teka mafura ya hamba, ni nkila wo nona, ni mafura laya ma pambeleko marumbu, ni pambani wa xivinzi, ni tiswa timbiri ni mafura ya tona, ni woko ga xinene, hakuva i yivu ya ku wumbelisisa.

²³U ta teka a mbunzu yinwe ya xibaba, ni xibaba xi kanyangilweko hi mafura, ni xibaba lexi xi nga lomu xirunzwini xa zibaba zi nga comelwangiko, lezi zi vekilweko mahlweni ka Jehova.

²⁴U ta veka zontlhe lezi mandleni ya Aroni, ni mandleni ya vana vakwe, u zi nziwitela mahlweni ka Jehova;

²⁵zonake u ta zi susa mandleni yabye, u zi hisa alatini, le hehla ka munyikelo wa kuhiswa, zi maha a masema yo nuhela mahlweni ka Jehova; wona muphahlelo lowu wu hiselwako Jehova.

²⁶Zonake u ta teka a xifuva xa yivu ya kunyikelisiswa ka Aroni, u xi nziwitela xiva muphahlo wa kunziwitela mahlweni ka Jehova; lexo xi tava xiavelo xa wena.

²⁷Zonake u ta basisa a xifuva lexi xi nziwitelweko, ni nenge lowu wu tlakusilweko, ziva za yivu yi basileko lezi zi nga nziwitelwa ni ku nyikelisiswa, lezi zi nga za Aroni ni vana vakwe;

²⁸zi tava za Aroni ni vana vakwe, kona ku tava xileletelo xa kala kupinzuka xikari ka vanana va ka Israeli, hakuva xinyikiwo lexi xi pambulweko ka vanana va ka Israeli, lexi va ta nga pambula laha miphahlweni yabye ya kukhesa; hi xinyikiwo xabye lexi xi pambulweko ka Jehova.

²⁹A tinguwo ta Aroni leti ti basileko, ti tava ta vana vakwe anzhako ka yena, kasi va ta ambala a siku lego va ta nga wumbelwa ni ku totiwa.

³⁰A nʼwana wakwe loyi a ta ngava mupristi anzhako ka yena, loyi a ta nga enghena lomu ka tenda ga mutlhangano a ku ya khozela ka wutshamu go basa, i ta ambala a tinguwo leto lomu ka masiku ya ntlhanu ni mambiri.

³¹U ta teka a nyama ya yivu ya kunyikelisisa, u yi bhika wutshanwini ga ku basa.

³²Zonake Aroni ni vana vakwe va taga a nyama ya kona, ni zibaba lezi zi nga lomu xirunzwini, laha nyangweni ya tenda ga mutlhangano.

³³A vage a zilo lezi ku nga mahiwa nzhiho ha zona, lezaku va wumbelwa, va basiselwa a ntiro. Zi nga giwi hi vamatiko, hakuva zilo lezi zi basileko.

³⁴Loku yi sala kala manziko a yinwani nyama ya kuwumbelwa ni zibaba za kona, u ta zi hisa; zi nga dzuki zi giwa, hakuva zi basile.

³⁵U ta maha ka Aroni ni ka vana vakwe zontlhe lezi nzi ku leleteleko zona. A kuwumbelwa kabye ku ta heta ntlhanu wa masiku ni mambiri.

³⁶Siku ni siku u ta tlhava nkuzi, kasi ku maha munyikelo wa kuonha akuva nzhiho, u gi susela nanzu alati hi ku gi mahela rivalelo, u gi tota kasi ku gi basisela a ntiro.

³⁷Hi ntlhanu wa masiku ni mambiri u ta mahela alati a nzhiho, kasi ku gi basisa; zonake a alati gi tava xilo lexi xi basileko nguvu; zontlhe lezi zi ta nga khumba a alati zi tava zi basileko.

³⁸Lezi u ta nga tlhava laha alatini hi lezi: tiyivana timbiri ta lembe ginwe, siku ni siku ka malembe wontihe.

³⁹A yivana yinwe u ta yi nyikela ni mixo, a yinwani u yi nyikela laha gambyeni.

⁴⁰U ta yi nyikela zinwe ni lipinwana la mapa ma nanaselweko, ma kanyangilweko hi khihlanya ga hini ya mafura ya maoliva ma kamilweko, ni khihlanyana ga hini ya vinya, akuva munyikelo wa zakunwa.

⁴¹Laha gambyeni u ta tlhava a yivana ya wumbiri, u maha muphahlo wa mapa ni wa zakunwa, ku kota wa laha mixweni. Wu tava muphahlelo lowu wu hiselwako Jehova, lowu wu nga ni masema yo nanziha.

⁴²Lowu wu tava wona muphahlo wa kuhiswa wa masiku wontihe lomu ka zizukulwana zontlhe, lowu wu nehiwako nyangweni ya tenda ga mutlhangano mahlweni ka Jehova, laha nai ta nga tlhangana na nwina nzi wulawula na wena.

⁴³Nzi ta tlhangana laho ni vanana va ka Israeli; a wutshamu lego gi tava gi basisilweko hi wukosi ga mina.

⁴⁴Nzi ta basisa a tenda ga mutlhangano ni alati; nzi ta basisa Aroni ni vana vakwe kasi va nzi khozela ntirweni wa wupristi.

⁴⁵Nzi ta aka xikari ka vanana va ka Israeli, nziva Nungungulu wabye. [69]

⁴⁶Va ta nzi tiva lezaku hi mina Jehova, a Nungungulu wabye, loyi a va humesileko tikweni ga Gipite, kasi nzi tshama xikari ka vona. Hi mina Jehova a Nungungulu wabye.