Read tshwa Eksodusi 3 Bible Online

Eksodusi 3 - tshwa bible

Eksodusi 3

¹Mosi i wa risa tiyivu ta Jetro muxade wakwe, mupristi wa le Midiani. I lo gula a tlhambi aya tlhelo ga le xiwuleni, a ya chikela xitsungeni xa Nungungulu le Horebe.

²Ku lo woneka ka yena a ngelosi ya Jehova lomu pingweni ga nzilo xikari ka xihlahla. Mosi i lo wona a xihlahla na xi kari xi vura nzilo, kanilezi na xi nga mbheli. [7]

³Mosi aku: Nza ha nga hambuka nziya wona a xihlamaliso lexi xa hombe, lezaku hiyini a xihlahla xi swako xi nga mbheli!

⁴Laha Jehova a nga wona lezaku Mosi wa hambuka ku ta cuwuka, Nungungulu i lo mu vitana na hi xikari ka xihlahla, aku: Mosi, Mosi! Yena aku: Nzi laha!

⁵Nungungulu aku: U nga tshineli laha! Susa zilato mikonzweni ya wena, hakuva a wutshamu legi u yimileko ka gona mbutshamu go basa.

⁶Yena i lo engeta kambe aku: Hi mina Nungungulu wa raru wa wena, a Nungungulu wa Abrahama, ni Nungungulu wa Isaka, ni Nungungulu wa Jakobe. Zonake Mosi i lo fenengeta nghohe yakwe, hakuva i lo chava ku cuwuka Nungungulu.

⁷Jehova aku: Nzi wonile kuxaniseka ka vanhu va mina le Gipite, nzi zwile kurila kabye hi kota ya lava va va xanisako; nza tiva a hlomulo wabye.

⁸Nzi relele ku ta va tlhatlhisa mandleni ya vaGipite, ni ku va humesa tikweni lego, nzi va yisa ka tiko ga hombe, go saseka; a tiko ga masi ni wulombe, ka wutshamu ga vaKanani, ni vaHiti, ni vaAmori, ni vaPerezi, ni vaHivi, ni vajebusi. [8]

⁹Makunu a kurila ka vanana va ka Israeli ku chikele ka mina; nzi wonile a kuxaniseka loku a vaGipite va va xanisako ha koha.

¹⁰Makunu nza ku ruma, famba ka Faro u ya humesa a vanhu va mina, a vanana va ka Israeli le Gipite.

¹¹Mosi aku ka Nungungulu: Hi mina maniwo, wo kala nziya ka Faro nzi ya humesa a vanana va ka Israeli le Gipite?

¹²Aku ka yena: Nzi tava zinwe na wena. A xikombiso xaku hi mina nzi ku rumako hi lexi: Loku u humesile a vanhu va mina le Gipite, mu ta ta khozela Nungungulu ka xitsunga lexi.

¹³Zonake Mosi aku ka Nungungulu: Loku mina nzi famba ka vanana va ka Israeli nziya va byela ku ngalo, Nungungulu wa vararu va nwina i nzi rumile ka nwina, vona va taku ka mina: Himani vito gakwe? Nzi ta kuyini ka vona?

¹⁴Nungungulu aku ka Mosi: HI MINA LOYI NZI NGA KONA. Yena aku: U ta va byela lezo a vanana va ka Israeli, uku: LOYI A NGA KONA i nzi rumile ka nwina. [9]

¹⁵Nungungulu a engeta aku ka Mosi: U ta va byela uku: Jehova, Nungungulu wa vararu va nwina, Nungungulu wa Abrahama, Nungungulu wa Isaka, Nungungulu wa Jakobe, i nzi rumele ka nwina. Hi vito ga mina ga kala kupinzuka; i vito ga xialakanyiso xa mina zizukulwaneni zontlhe.

¹⁶Famba u ya tsombanyisa a masingalakati ya ka Israeli, uku ka wona: Jehova, Nungungulu wa vararu va nwina, Nungungulu wa Abrahama, ni Nungungulu wa Isaka, ni Nungungulu wa Jakobe, i wonekile ka mina, aku: Hakunene nzi mu enzele, nzi wonile lezi a vaGipite va zi mahako ka nwina.

¹⁷Mina nzi te ngalo: Nzi ta mu tlhatlhisa hlomulweni wa nwina wa Gipite, nzi mu yisa tikweni ga vaKanani, ni ga vaHiti, ni ga vaAmori, ni ga vaPerezi, ni ga vaHivi, ni ga vajebusi ka tiko ga masi ni wulombe.

¹⁸Vona va ta ingisa a gezu ga wena: zonake u ta famba ni masingalakati ya ka Israeli ka hosi ya vaGipite, mu yaku ngalo ka yena: Jehova. Nungungulu wa maHeberu i wonekile ka hina; hikwalaho hi vumele hi teka a pfhumba ga masiku manharu hiya xiwuleni hi ya khozela Jehova, Nungungulu wa hina, hi miphahlelo.

¹⁹Kanilezi nza zi tiva lezaku a hosi ya Gipite yi nga ta mu vumela ku famba, hambu loku mu kurumeta hi ntamu.

²⁰Kanilezi nzi ta tlakusa a canja ga mina nziba vaGipite hi zihlamaliso zontlhe lezi nzi ta nga zi maha ka vona. Anzhako ka zona i ta mu tsika mu famba.

²¹Nzi ta maha lava vanhu va kuma thomo mahlweni ka vaGipite. Loku mu famba mu nga ta famba na mu nga hi na nchumu; [10]

²²kanilezi vontlhelele vavasati va ta kombela, loyi ni loyi ka muakelane wakwe ni ka loyi a nga tshama ndlwini yakwe, va ta kuma a zilo za siliva ni nzalama, ni tinguwo; mu ta ambexa a vana va nwina ha tona; mu ta phanga vaGipite kota lezo.