Read tshwa Eksodusi 30 Bible Online

Eksodusi 30 - tshwa bible

Eksodusi 30

¹U ta maha a alati ga ku hisela kona libani; u gi maha hi sinya ya munga.

²A kuleha ka gona ku tava nkono munwe, ni kuanama ka gona ku tava nkono munwe. Gi tava ni mune wa matlhelo ma ringanako; kanilezi a kutlakuka ka gona ku ta va mikono mimbiri, gi tava ni timhonzo ta gona.

³U ta gi nameketa hi nzalama yi basileko le hehla, ni matlhelo wontihe ni timhonzo ta kona; u ta gi mahela a kwenge wa nzalama, u wu renzelekisa matlhelo wontihe.

⁴U ta gi mahela a zingwavila zimbiri za nzalama hi lahasi ka kwenge ka matlhelo mambiri; u zi mehela lomu ka matlhelo mambiri kasi a pingo wu enghena ka zona, kasi a alati gi fela ku rwaliwa hi mipingo.

⁵U ta maha ni mipingo hi sinya ya munga, u yi nameketa hi nzalama.

⁶U ta yimisa a alati, gi cuwukana ni nguwo ya xisirelo leyi yi nga mahlweni ka nghaxa ya xivumelwano, ni xitshamu xa wuxinji lexi xi nga hehla ka Wumboni, laho nzi ta nga tlhangana kona na wena.

⁷Aroni i ta hisela laho a libani ni mixo; masiku wontihe loku a longisa a tikandiya i ta hisa libani.

⁸Laha gambyeni kambe loku Aroni a lumeka a tikandiya, i ta hisa libani; leli li tava libani la kala kupinzuka mahlweni ka Jehova ka zizukulwana za nwina.

⁹Mu nga dzuki mu hisela laho a linwani lixaka la libani, kutani muphahlo wo hiswa, kutani munyikelo wa mapa, hambu ni munyikelo wa zakunwa.

¹⁰Aroni i ta maha nzhiho lomu ka timhonzo ta alati siku ginwe hi lembe hi nkhata wa munyikelo wa zionho. Kanwe hi lembe i ta maha a nzhiho wa gona ka zontlhe zizukulwana za nwina. A alati legi gi tava ga kubasa nguvu mahlweni ka Jehova. [70]

¹¹Zonake Jehova i lo wulawula ka Mosi, aku:

¹²Loku u hlaya a vanana va ka Israeli hi mitsengo yabye, munwe ni munwani i ta maha nzhiho hi muhefemulo wakwe mahlweni ka Jehova a siku lego u va hlayako, kasi ku nga dzuki ku huma nzhere xikari kabye laha na u va hlaya.

¹³Vontlhe lava va ta nga hlayiwa va ta humesa a khihlanya ga xekeli hi lipimo la xekeli gi basileko (gi nga ni makume mambiri ya magera), a khihlanya ga xekeli munyikelo wa Jehova.

¹⁴A munwe ni munwani wa lava va hlayiwako, ku sangula hi ka va 20 wa malembe, kuya mahlweni, va ta humesa a munyikelo lowu ka Jehova.

¹⁵Loyi a fumileko ngha a nga engeteli, ni xisiwana ngha xi nga hunguli lomu ka khihlanya ga xekeli, loku va humesa munyikelo wa Jehova wa ku maha a nzhiho wa wutomi ga nwina.

¹⁶U ta teka a mali ya nzhiho leyi yi humesilweko hi vanana va ka Israeli, u tira ha yona a ntiro wa tenda ga mutlhangano; xi tava xialakanyiso ka vanana va ka Israeli mahlweni ka Jehova, a ku maha a nzhiho wa wutomi ga nwina.

¹⁷Zonake Jehova i lo wulawula ka Mosi, aku;

¹⁸U ta maha a xinamelo xa suku, xi ta ngava ni tshako ga suku, kasi ku hlambela ka xona; u ta xi veka xikari ka tenda ga mutlhangano ni alati, u chela mati ka xona,

¹⁹kasi Aroni ni vana vakwe va ta hlambela lomo a mandla ni mikonzo.

²⁰Laha na va enghena tendeni ga mutlhangano, va ta hlamba hi mati kasi va ngafi; va ta hlamba kambe loku va tshinela alatini a ku ya khozela hi miphahlo leyi yi hiselwako Jehova;

²¹va ta hlamba a mandla ni mikonzo kasi va ngafi. Ku tava xileletelo xa pinzukelwa ka Aroni ni pswalo wakwe zizukulwaneni zabye.

²²Jehova i lo wulawula kambe ka Mosi, aku:

²³U ta teka a makha yo saseka; ya mira yo saseka, leyi yi nga ni kutika ka 500 wa maxekeli, ni kinamona u ta teka khihlanya, gi nga 250 wa maxekeli, ni tihlanga to nuhela 250 wa maxekeli.

²⁴Ni kasia ya 500 wa maxekeli hi lipimo la xekeli go basa, ni lipimo la hini la mafura ya oliva.

²⁵U ta maha ha zona a mafura ma basileko yo tola, u ma tlhanganyisa khwatsi hilezi va tlhanganyisako zona a za malongo, ma tava mafura ma basileko yo tola.

²⁶U ta tota ha wona a tenda ga mutlhangano, ni arke ga xivumelwano,

²⁷ni meza, ni zontlhe zibya za yona, ni kandiya ni zibya za yona, ni alati ga libani,

²⁸ni alati ga miphahlelo ya kuhiswa, ni zibya za gona zontlhe; ni xinamelo ni tshako ga xona.

²⁹U ta zi basisa, zonake zi tava zilo zi basileko nguvu; zontlhe lezi zi ta nga zi khumba zi tava zilo zi basileko.

³⁰Zonake u ta tota Aroni ni vana vakwe, u va basisa kasi va fela ku tira wupristi mahlweni ka mina.

³¹Zonake u ta byela a vanana va ka Israeli, uku: Laya hi wona a mafura ma basileko yo tola, ma tava ya mina ka zontlhe zizukulwana za nwina.

³²Ma nga dzuki ma totiwa cumbu hi munhu; mu nga mahi manwani yo fanana ni laya. Ma basile, a mave laya ma basileko ka nwina.

³³Kani hi wihi a mahako yo fanana ni laya, kutani loyi a totako wamatiko ha wona, i ta humeswa xikari ka lixaka labye.

³⁴Jehova i lo wula kambe ka Mosi, aku: U ta teka a makha yo nuhela ni stakto, ni galbano, ni lezi zo nuhela nguvu u ta patsa ni makha, u zi ringanisa zontlhe hi lipimo linwe,

³⁵u maha ha zona a libani lo nuhela, u mahisa lezi va mahisako zona lezi zo nuhela, na zi lungilwe hi munyu, na zi sasekile, ni ku hlazeka.

³⁶U ta gaya xipanze xa zona, u zi veka mahlweni ka Wumboni lomu tendeni ga mutlhangano, laha nzi ta nga ta tlhangana kona na wena. Xi tava xilo xi basileko nguvu ka nwina.

³⁷Kasike loku ku hi libani leli u ta nga li maha, mu nga dzuki mu ti mahela, mu maha hi ndlela yo fanana ni leyi. A ka nwina xi tava xilo xi basiselweko Jehova.

³⁸Kani hi wihi a mahako a yo fanana ni laya, a kuva ma nuhela ka yena, i ta humeswa xikari ka lixaka la ka kabye.