Read tshwa Eksodusi 31 Bible Online

Eksodusi 31 - tshwa bible

Eksodusi 31

¹Jehova i lo wulawula ka Mosi, aku:

²Languta, mina nzi vitanile hi vito gakwe Bezaleli, nʼwana Uri wa Hura, wa lixaka la ka Juda. [71]

³Nzi mu chelile a Moya wa Nungungulu, ni wutlhari, ni ku tiva yontlhe mitiro;

⁴a ku pola a matirela ya wutlhari hi mitiro ya nzalama, ni siliva, ni suku;

⁵a ku kehla lomu ka maribye ya lisima, ni ku vatla tisinya, ni ku tira mitiro ya tixaka ti hambeneko.

⁶Kambe nzi yimisile Oholiaba nʼwana Ahisamaka, wa lixaka la ka Dani, a kuva muvuni wakwe; kambe nzi enghenisile wutlhari timbilwini ta vameseri vontlhe va nwina kasi va tira zontlhe lezi nzi ku leleteleko.

⁷A tenda ga mutlhangano, ni nghaxa ya xivumelwano, ni xitshamu xa wuxinji lexi xi nga hehla ka yona, ni yontlhe mitiro ya Tabemakeli.

⁸Ni meza ni zibya za yona, ni meza ya nzalama ya tikandiya ni zibya za yona, ni alati ga libani,

⁹ni alati ga muphahlo wa kuhiswa ni zibya za gona zontlhe, ni xinamelo ni xikhatelo xa kona,

¹⁰ni tinguwo to khozela ha tona, ni tinguwo ti basileko ta mupristi Aroni, ni tinguwo ta vana vakwe ta wupristi,

¹¹ni mafura yo tola, ni libani lo nuhela la wutshamu go basa. Va ta maha zontlhe khwatsi hilezi nzi ku leleteleko.

¹²Jehova i lo wulawula ka Mosi, aku;

¹³Byela a vanana va ka Israeli, uku: Mu ta hlayisa a masabado ya mina; hakuva xikombiso xikari ka nwina na mina zizukulwaneni za nwina, kasi ma zi tiva lezaku hi mina Jehova loyi a mu basisako. [72]

¹⁴Mu ta hlayisa a sabado, hakuva a ka nwina i siku gi basileko. Loyi a nga gi hlayisiko i ta dawa; hakuva loku a munhu a tira a ntiro hi lego siku, i ta humeswa xikari ka lixaka la ka kabye.

¹⁵Ku ta tiriwa ntlhanu wa masiku ni ginwe, zonake a ga wuntlhanu ni mambiri gi tava ga sabado ga kuhumula, legi gi basiselweko Jehova. Kani hi wihi loye a tirako hi siku ga sabado, i ta dawa.

¹⁶Hikwalaho a vana va ka Israeli va ta hlayisa a sabado, va gi basisa ka zontlhe zizukulwana zabye, xi tava xivumelwano xa pinzukelwa.

¹⁷Xikombiso xa pinzukelwa xikari ka mina ni vanana va ka Israeli; hakuva hi ntlhanu wa masiku ni siku ginwe, Jehova i mahile tilo ni misava, kanilezi hi siku ga wuntlhanu ni mambiri, i lo tsika ku tira a humula.

¹⁸Makunu laha Jehova a nga mbhetile ku wulawula na Mosi le xitsungeni xa Sinai, i lo mu nyika maribye mambiri ya milayo, laya ma tsalilweko hi litiho la Nungungulu.