Read tshwa Eksodusi 36 Bible Online

Eksodusi 36 - tshwa bible

Eksodusi 36

¹Bezaleli na Oholiaba, ni vontlhe vameseri vo tlhariha, lava Jehova a va nyikileko wutlhari ni kupima ni ku tiva ku tira va lota, va ta tira mitiro yontlhe ya wutshamu go basa khwatsi hilezi Jehova a leleteleko.

²Zonake Mosi i lo vitana Bezaleli na Oholiaba, ni vontlhe vameseri, lava Jehova a va nyikileko wutlhari timbilwini tabye, ni vontlhe lava timbilu tabye ti susumetwako ku tira mitiro.

³Va lo teka a mihlengo yontlhe ka Mosi, leyi yi nehilweko hi vana va ka Israeli, kasi ku tira a ntiro wa wutshamu go basa; kanilezi a vanhu va wa simamisa ku nyikela siku ni siku laha mixweni.

⁴Zonake vontlhe vameseri lava va tirako mitiro yontlhe ya wutshamu go basa, va lo tsika mitiro leyi va tirako, vata ka Mosi, va taku:

⁵A vanhu va nyikele ku hunza a ntiro lowu Jehova a leleteleko lezaku wu mahiwa.

⁶Zonake Mosi i lo leletela lezaku va huwelela lomu wugovelweni lezaku: Vavanuna ni vavasati va nga ha longiseli kambe a minyikelo ya ntiro wa wutshamu go basa. Lezo a vanhu va lo tsikiswa ku nyikela a zilo zabye.

⁷Hakuva a zilo zo maha mitiro yontlhe zi wa enele zi tlhela zi sala.

⁸Zonake vontlhe vameseri va tlharihileko xikari ka lava va tirako mitiro, va lo aka a tabernakeli hi khume ga tinguwo ta wukene go saseka, gi khatilweko, ni ta wukuxe ni to valala, ni to zirila, va gi mahela ni makerubima laya ma lukelweko hi wutlhari.

⁹A kuleha ka nguwo yinwe ni yinwani ku wa 28 wa mikono, a kuanama ka yona ku wa hi mune wa mikono; a tinguwo tontlhe ti wa mahiwa hi lipimo linwe.

¹⁰Ku patsiwa ntlhanu wa tinguwo, ni tinwani kambe a ntlhanu wa tinguwo ti patsiwa khatiginwe, kuva tinguwo timbiri ta hombe.

¹¹Zonake va swula a tingoti ta wukuxe laha ka nzhungo wa nguwo yo ranga, hi le magumo ka tinguwo leti ti rungilweko; va mahisa zalezo ka nzhungo wa nguwo yinwani ya magumo a ka leti ti rungilweko.

¹²Va lukela a 50 wa tingoti ka nguwo yinwani, ni tingoti tinwani ta 50 ka nguwo yinwani ya magumo ka leti ti rungilweko. A tingoti leto ti lo cuwukana.

¹³Zonake ku lo mahiwa 50 wa zihareketo za nzalama, va tlhanganyisa tinguwo hi zihareketo; hilezo a tabemakeli gi lo mahiwa giva xilo xinwe.

¹⁴Va lo maha tinguwo ta woya ga timbuti kasi ku maha a tenda go fenengeta le hehla ka tabernakeli; va lo maha tinguwo leto ta khume ni yinwe.

¹⁵A kuleha ka nguwo yinwe ni yinwani ku wa hi 30 wa mikono, ni kuanama ka yona ku wa hi mune wa mikono; tontlhe tinguwo leto ti lo mahiwa hi lipimo linwe.

¹⁶Zonake va lo rungela ntlhanu wa tinguwo hi tlhelo ginwe, ni tinwani ta ntlhanu ni yinwe hi tlhelo ginwani.

¹⁷Va lo lukela 50 wa tingoti laha ka nzhungo wa nguwo yinwe leyi yo ranga, ni tinwani ta 50 laha ka nzhungo wa nguwo yinwani ya wumbiri.

¹⁸Zonake va lo maha 50 wa zihareketo za suku, va tlhanganyisa ha zona a tenda lezaku giva xilo xinwe.

¹⁹Va lo maha xifulelo xa tabemakeli hi mabhebhe ya tiyivu laya ma totilweko tinta yo pswhuka, ni xifulelo xa mabhebhe ya macalo, kasi ku fulela le hehla.

²⁰Zonake ku lo vatliwa a tibakwa ta tabernakeli hi sinya ya munga kasi ku yimisa ha tona.

²¹A kuleha ka bakwa yinwe ni yinwani ku wa hi khume ga mikono, a kuanama ku wa hi nkono munwe ni khihlanya.

²²A bakwa yinwe ni yinwani yi wa hi ni zitlhanganyiso zimbiri zi cuwukeneko; va lo mahisa lezo tontlhe tibakwa ta tabernakeli.

²³Zinghaho va lo maha tibakwa ta tabernakeli; 20 wa tibakwa hi tlhelo ga Dzonga, hi le xineneni.

²⁴Lahasi ka tibakwa leti ta 20, va lo maha a 40 wa zikhato za siliva; zikhato zimbiri lahasi ka bakwa yinwe ni yinwani, hi lahasi ka zitlhanganyiso zimbiri za bakwa yinwe ni yinwani.

²⁵Va lo maha 20 wa tibakwa ta tlhelo ginwani ga tabernakeli, hi tlhelo ga Nwalungu;

²⁶ni zikhato za tona ta siliva ta 40, zikhato zimbiri lahasi ka bakwa yinwe ni yinwani.

²⁷Hi tlhelo ga Mupela-gambo, hi le makutini ya tabernakeli, va lo maha ntlhanu ni yinwe tibakwa.

²⁸Zonake va lo maha tibakwa timbiri ta tabernakeli hi tlhelo ga le makutini hi lomu magwitsini mambiri;

²⁹na tona ti lo tlhanganyiswa lahasi ni le hehla kala ku chikela ka xingwavila xo ranga; Va lo mahisa lezo hi tibakwa timbiri ta lomu magwitsini.

³⁰Hilezo, ku wa hi ni ntlhanu ni tinharu tibakwa ni 16 wa zikhato; zi wa hi zimbiri lahasi ka bakwa yinwe ni yinwani.

³¹Zonake va lo maha a ntlhanu wa tivalelo ta sinya ya munga ta tibakwa ta ginwani tlhelo ga tabernakeli;

³²hi ntlhanu wa tivalelo ta bakwa ya ginwani tlhelo, ni ntlhanu wa tivalelo ta bakwa ya le makutini ka tabemakeli, hi tlhelo ga Mupela-gambo.

³³Kanilezi a livalelo la laha xikari, va li mahile lezaku li tlhanganyisa tontlhe tibakwa, kusukela ka tlhelo ginwe kala ka tlhelo ginwani.

³⁴Va lo nameketa tibakwa hi nzalama, ya maha ni zingwavila za tona hi nzalama, ku engheniswa ka zona a tivalelo; tonawu tivalelo va ti nameketa hi nzalama.

³⁵Va lo maha a nguwo ya xisirelo hi mivala ya wukuxe, ni kupswhuka, ni kuzirila, ni wukene go saseka gi lukilweko, va yi maha hi wutlhari; va lo maha ni zifananiso za makerubima ka yona.

³⁶Va lo mahela nguwo mune wa timhanze hi sinya ya munga, va ti nameketa hi nzalama; ni zihareketo za kona zi wa hi za nzalama; a zikhato za kona za mune va lo zi nyekisa hi siliva.

³⁷Zonake va lo maha a xisirelo xa nyangwa ya Tenda hi za wukuxe, ni zo pswhuka, ni zo zirila, ni wukene go saseka gi khatilweko, na wu hi ntiro wu mahilweko hi wutlhari.

³⁸Va maha ni timhanze ta kona ta ntlhanu, ni zihareketo za tona; zonake va nameketa tihloko ta kona ni tivalelo ta kona hi nzalama; kanilezi a zikhato za kona za ntlhanu zi wa hi suku.