Read tshwa Eksodusi 37 Bible Online

Eksodusi 37 - tshwa bible

Eksodusi 37

¹Bezalaleli i lo maha a nghaxa hi sinya ya munga; a kuleha ka gona ku wa hi mikono mimbiri ni khihlanya; a kuanama ka gona ku wa hi nkono munwe ni khihlanya, ni kutlakuka ka gona ni nkono munwe ni khihlanya.

²Yena i lo yi nameketela lahandle ni lomu nzeni hi nzalama yi basileko, i lo yi mahela a kwenge wa nzalama wu yi renzelekela.

³Zonake i lo nyekisa a mune wa zingwavila za nzalama za milenge ya yona ya mune; zingwavila zimbiri hi tlhelo ginwe, ni zimbiri hi ginwani tlhelo.

⁴I lo yi vatlela a mipingo hi sinya ya munga, a yi nameketa hi nzalama.

⁵Zonake a enghenisa a mipingo lomu ka zingwavila hi lomu matlhelweni ka nghaxa, kasi ku pinga ha yona.

⁶Yena i lo maha ni xitshamu xa wuxinji hi nzalama yi basileko; a kuleha ka xona ku wa hi mikono mimbiri ni khihlanya, ni kuanama ka xona ku wa hi nkono munwe ni khihlanya.

⁷Zonake i lo maha makerubima mambiri, a fula hi nzalama, a ma yimisa hi lomu magumo ka xitshamu xa wuxinji, tlhelo ni tlhelo.

⁸A kerubima ginwe gi tshama magumo ka seno, a ginwani gi tshama magumo ka seniya. I lo mehela makerubima lomu magumo mambiri ya xitshamu xa wuxinji.

⁹A makerubima lawo ma lo tshambuluta tipapa ta wona ti fenengeta a xitshamu xa wuxinji, a tinghohe ta wona ti cuwukana, hi wumbiri ga wona na ma cuwukile lahasi xitshanwini xa wuxinji.

¹⁰I lo maha ni meza hi sinya ya munga; a kuleha ka yona ku wa hi mikono mimbiri, ni kuanama ka yona i nkono munwe, a kutlakuka ka yona i nkono munwe ni khihlanya.

¹¹A yi nameketa hi nzalama yi basileko, zonake a yi mehela a kwenge wo renzelekela hi nzalama, wu yi renzeleka matlhelo wontihe.

¹²I lo yi mahela ni mbhingano wa Xipimo xa canja kuanama ka wona, ni kwenge wa nzalama matlhelo wontihe.

¹³Zonake i lo nyekisa a mune wa zingwavila za nzalama, a zi veka lomu ka mune wa makhuzu ya lomu ka mune wa milenge ya yona;

¹⁴a zingwavila zi wa hi kusuhani ni mbhingano, kasi ku fela ku enghenisa kona a mipingo yo rwala ha yona a meza.

¹⁵I lo maha a mipingo hi sinya ya munga, a yi nameketa hi nzalama, kasi ku rwala hi yona a meza.

¹⁶Zonake i lo maha a zibya za meza hi nzalama yi basileko; a mingelo ya kona, ni mikombe ya kona, ni magombe ya kona, ni mingelwana ya kona, zontlhe zi wa hi za nzalama.

¹⁷I lo maha a meza ya tikandiya hi nzalama yi basileko; yi lo mahiwa hi nzalama yi fulilweko, a nenge wa yona, ni tshinya ga yona, ni xikhatelo xa yona, ni zivuvu ni zitsangi zontlhe zi wa wumbilwe khatiginwe;

¹⁸ni ntlhanu ni ginwe maravi ma humako hi lomu matlhelweni ya yona; maravi manharu ma lo huma hi tlhelo ginwe ga meza ya tikandiya, ni manwani ya manharu hi ginwani tlhelo.

¹⁹A ka ravi ginwe ku wa hi ni tikopo tinharu ti fananako ni almondi, ni xivuvu, ni xitsangi, ni ka ginwani ravi ku wa hi tikopo tinharu ti fananako ni almondi, ni xivuvu, ni xitsangi. Ku lo mahiwa lezo la wontihe maravi ya ntlhanu ni ginwe ma humako ka meza ya tikandiya.

²⁰Kanilezi ka yona meza ya tikandiya ku wa hi ni mune wa tikopo ti fananako ni almondi zinwe ni zivuvu ni zitsangi za yona.

²¹A zivuvu xinwe xi wa hi lahasi ka maravi mambiri, laya ma humako ka yona, ni xinwani xivuvu xi wa hi lahasi ka manwani maravi mambiri, ni xivuvu xinwani xi wa hi lahasi ka maravi mambiri laya ma seleko ka ntlhanu wa maravi ni ginwe, ma humako lomu ka meza ya tikandiya.

²²A zivuvu ni maravi zi wa huma ka yona; zi wumbilwe khatiginwe hi nzalama leyi yi fulilweko yi basileko.

²³Zonake i lo maha tikandiya ta yona ta ntlhanu ni timbiri, ni zitimo za kona, ni zimbitana za kona za khuma; i lo zi maha hi nzalama yi basileko.

²⁴I lo maha a meza ya tikandiya ni zontlhe zibya za yona hi talenta ya nzalama yi basisilweko.

²⁵Zonake i lo maha a alati ga libani hi sinya ya munga; a kuleha ka gona ku wa hi nkono munwe, ni kuanama ka gona ku wa hi nkono munwe, wontihe matlhelo ya gona ya mune ma wa ecana; a kutlakuka ka gona ku wa hi mikono mimbiri; ni timhonzo ta gona ti wa patsilwe zinwe nago.

²⁶I lo gi nameketa hi nzalama yi hlutilweko le hehla, ni wontihe matlhelo, ni timhonzo; a gi mahela a kwenge wa nzalama wu gi renzeleka.

²⁷A maha ni zingwavila zimbiri za gona za nzalama hi lahasi ka kwenge, lomu matlhelweni mambiri ya mareve, kasi ku enghenisa lomo a mipingo yo rwala ha yona.

²⁸I lo maha mipingo hi sinya ya munga, a yi nameketa hi nzalama.

²⁹I lo maha kambe a mafura ma basileko yo tola, ni libani lo nuhela li hlazekileko, a zi maha hi wutlhari.