Read tshwa Eksodusi 38 Bible Online

Eksodusi 38 - tshwa bible

Eksodusi 38

¹Zonake i lo maha a alati ga miphahlelo ya kuhiswa hi sinya ya munga, a kuleha ka gona ku wa hi ntlhanu wa mikono, ni kuanama ka gona ku wa hi ntlhanu wa mikono; wontihe matlhelo ya gona ya mune ma wa ecana; a kutlakuka ka gona ku wa hi mikono minharu.

²I lo maha ni mune wa timhonzo ti humako alatini lomu ka mune wa magwitsi ya gona, a ti nameketa hi suku.

³I lo maha ni zontlhe zibya za alati; a timbita, ni mafoxola, ni minzheko, ni zihayeko za nyama, hi mahati ya khuma; i lo maha zontlhe zibya lezi hi suku.

⁴I lo mahela a ganzelo a xikhatelo xa suku xo fanana ni finisela, hi lahasi ka xona ku vekwa a wutshamu ga nzilo.

⁵I lo nyekisa a mune wa zingwavila za suku, a zi veka ka mune wa matlhelo ya xikhatelo kasi ku enghenisa ka zona a mipingo,

⁶Zonake i lo maha mipingo hi sinya ya munga, a yi nameketa hi suku.

⁷Zonake i lo enghenisa a mipingo lomu ka zingwavila hi lomu matlhelweni ya alati, kasi ku rwala ha yona; a maha wunzeni ga gona hi mapulango.

⁸I lo maha a xinamelo ni xikhatelo xa kona hi suku; i lo maha lezi zilo hi mawoni ya vavasati lava va nga wa tira laha nyangweni ya tenda ga mutlhangano.

⁹Zonake i lo maha a hubye. Hi tlhelo ga le Dzongeni i lo maha tinguwo ta hubye hi wukene go saseka, ku wa hi 100 wa mikono.

¹⁰A timhanze ta kona ti wa hi 20, ni 20 wa zikhato za tona za suku; a zihareketo za timhanze ni tivalelo ta kona zi wa hi za siliva.

¹¹Ku lo mahiwa zalezo hi tlhelo ga Nwalungu, a tinguwo ti wa hi 100 wa mikono, ni timhanze ta kona ta 20, ni 20 wa zikhato za suku; a zihareketo za timhanze ni tivalelo ta kona zi wa hi za siliva.

¹²Hi tlhelo ga Mupela-gambo ku wa hi ni nguwo ya 50 wa mikono, ni timhanze ta kona ta khume ni khume ga zikhato; a zihareketo za timhanze ni tivalelo ta kona zi wa hi za siliva.

¹³Le mahlweni hi tlhelo ga Mutsuwuka-gambo i 50 wa mikono.

¹⁴Hi lezaku a nguwo ya 15 wa mikono yi wa hi tlhelo ginwe ga nyangwa, zinwe ni timhanze tinharu ni zikhato zinharu.

¹⁵Hi tlhelo ginwani ga nyangwa khwatsi hi tlhelo go sangula, a nguwo yi wa hi ya 15 wa mikono, ni timhanze tinharu ni zikhato zinharu.

¹⁶A tinguwo tontlhe leti ti nga renzelekela hubye ti wa lukilwe hi wukene go saseka.

¹⁷A zikhato za timhanze zi wa hi za suku; a zihareketo za timhanze ni tivalelo ta kona zi wa hi za siliva; ni zifenengeto za tihloko ta kona zi wa hi za siliva; tontlhe timhanze ta hubye ti lo tlhanganyiswa hi tivalelo ta siliva.

¹⁸A xisirelo xa nyangwa ya hubye xi wa lukilwe hi wutlhari, hi wukuxe, ni kuzirila, ni kupswhuka, ni wukene go saseka gi khatilweko; a kuleha ka xona ku wa hi 20 wa mikono, ni kutlakuka ka xona ku wa hi ntlhanu wa mikono, ku wa fanana ni tinguwo ta hubye.

¹⁹A timhanze ta mune ta xisirelo ni zikhato za kona za mune zi wa hi za suku; a zihareketo za tona zi wa hi za siliva, ni zifenengeto za tihloko ta tona ni tivalelo ta kona zi wa hi za siliva.

²⁰A timhingu tontlhe ta tabernakeli ni ta hubye ti wa hi ta suku.

²¹Leyi hi mitsengo ya zilo lezi zi humeselweko tabernakeli, yi nga yona yindlu ya Wumboni. A kuhlaya loku ku hlayilwe hi kuleletela ka Mosi, na wu hi ntiro wa vaLevi, na va rangelwe hi Itamari, a nʼwana mupristi Aroni.

²²Bezaleli, nʼwana Uri wa Hura, wa lixaka la ka Juda, i lo maha zontlhe zilo lezi Jehova a nga leletele Mosi.

²³I lo vuniwa hi Oholiaba, a nʼwana Ahisamaka, wa lixaka la ka Dani, a muvatli ni mukhati, a munhu a tlharihileko mitirweni ya ku luka za wukuxe, ni za kuzirila, ni za kupswhuka, ni za wukene go saseka.

²⁴A nzalama yontlhe leyi va nga maha ha yona ntiro wontihe wa yindlu ya kubasa, yi nga hi nzalama ya hlengo, yi wa hi tsengo wa 29 wa titalenta ni 730 wa maxekeli, hi lipimo la xekeli ga wutshamu go basa.

²⁵A siliva ya vanhu va tlhangano lava va hlayilweko yi wa hi 100 wa titalenta ni 1,775 wa maxekeli, hi lipimo la xekeli ga wutshamu go basa.

²⁶A munhu munwe ni munwani i lo humesa a khihlanya ga xekeli, hi lipimo la xekeli ga wutshamu go basa. Vontlhe lava va hlayilweko va lo humesa kota lezo, kusukela ka lava va ntanga ya 20 wa malembe ni kuya mahlweni. Va wa hi 603,550 wa vavanuna.

²⁷A 100 wa titalenta ta siliva ti lo nyekiswa kasi ku maha a zikhato za yindlu ya kubasa, ni zikhato za xisirelo; a 100 wa zikhato lezi zi ringanako a 100 wa titalenta: a talenta yinwe ku wa hi xikhato xinwe.

²⁸Zonake a maxekeli laya ma seleko ya 1,775, va lo maha ha wona a zihareketo za timhanze ni zifenengeto za kona, ni tivalelo leti ti tlhanganyisako a timhanze ha tona.

²⁹A suku wa hlengo wu wa hi 70 wa titalenta ni 2,400 wa maxekeli.

³⁰Va lo maha ha wona a zikhato za nyangwa ya tenda ga mutlhangano, ni alati ga suku ni xitlhata xa kona xa suku, ni zontlhe zibya za alati,

³¹ni zikhato za timhanze ta hubye leyi yi renzetekelako, ni zikhato za nyangwa ya hubye, ni tontlhe timhingu ta tabernakeli ni ta hubye.