Read tshwa Eksodusi 4 Bible Online

Eksodusi 4 - tshwa bible

Eksodusi 4

¹Kanilezi Mosi i lo hlamula, aku: Kanilezi vona va nga ta vumela, ne cima va nga ta ingisa gezu ga mina, hakuva vona va taku: Cima Jehova a nga wonekangi ka wena.

²Jehova aku ka yena: Xini lexi xi nga lomu canjeni ga wena? Aku: I nhonga.

³Aku: Yi hoxe lahasi. I lo yi hoxa lahasi, yi si hunzuluka yi maha nyoka; Mosi i lo tsutsuma, a yi chava.

⁴Zinghaho Jehova i te ngalo ka Mosi: Nawuluta a canja ga wena u yi khoma hi nkila. Zonake Mosi i lo nawuluta a canja gakwe a yi khoma, yi si hunzuluka kambe yi maha nhonga canjeni gakwe.

⁵U ta ya maha zalezo kala va vumela lezaku Jehova, Nungungulu wa vararu vabye, Nungungulu wa Abrahama, Nungungulu wa Isaka, Nungungulu wa Jakobe, i wonekile ka wena.

⁶Jehova i lo engeta aku: Veka canja ga wena laha xifuveni xa wena; zonake i lo vekela a canja gakwe laha xifuveni xakwe. Laha a nga gi susile a canja gakwe gi wa basile hi hlokonho gi ku khwatsi i gapongo.

⁷Zonake Nungungulu aku: Tlhelisa a canja ga wena laha xifuveni; laha a nga gi susile i lo gi wona na gi hunzukile gi fanana ni miri wakwe.

⁸Jehova aku: Loku va nga vumeli, va nga ingisi a timhaka ta xiwoniso xo sangula, va ta vumela a timhaka ta xiwoniso xa wumbiri.

⁹Zonake loku va nga vumeli ziwoniso lezi za zimbiri, va nga ingisi ni gezu ga wena, u ta yakha mati le congweni, u ta ma chela lahasi, a mati lawo u ma khileko le congweni, ma ta hunzuka ma maha nkhata laha misaveni.

¹⁰Zonake Mosi aku ka Jehova: Ehe! Wena Hosi, a nzi munhu wo zi kota ku wulawula khwatsi, hambu tolo, ne tolweni, hambu kusukela lezi u sanguleko ku wulawula ni nanza ga wena, cima a nzi zi koti ku wulawula khwatsi, hakuva nzi munhu wa manghakamela ni xirimiti.

¹¹Jehova aku kakwe: Kasi himani loyi a mahileko a nomu wa munhu ke? Himani a mahako munhu mbeveve, kutani xiwiri, kutani loyi a wonako, kutani xikhumu ke? Kasi a hi mina Jehova ke?

¹²Wena famba, mina nzi tava ni nomu wa wena, nzi ku gonzisa lezi u ta nga zi wulawula.

¹³Mosi aku: Ha! Hosi, ruma hi canja ga munwani loyi u ranzako ku mu ruma.

¹⁴Zonake Jehova i lo zangarela Mosi, aku: A nga kona a nakuloni Aroni a muLevi ke? Nza zi tiva lezaku yena wa wulawula khwatsi; kambe yena wata ku ku khinga, laha a ta nga ku wona i ta tsaka mbilwini yakwe.

¹⁵U ta wulawula na yena, u veka timhaka tontlhe nonwini wakwe, mina nzi tava ni milomu ya nwina, nzi mu gonzisa lezi mu ta nga maha.

¹⁶Yena i tava muwulawuleli wa wena ka vanhu, ni kuva nomu wa wena, wena u tava wutshanwini go khwatsi u Nungungulu ka yena.

¹⁷Wena u ta khoma a nhonga leyi canjeni ga wena, u maha ziwoniso ha yona.

¹⁸Mosi i lo wuya ka Jetro, a muxade wakwe, a taku ka yena: Nzi vumele nzi tlhela nziya ka vamakabye va mina le Gipite, nzi ya va kamba nzi tiva kuhanya kabye. Jetro aku ka Mosi: Famba hi kurula.

¹⁹Le tikweni ga Midiani Jehova i te ngalo ka Mosi: Tlhelela Gipite, hakuva a vanhu vontlhe lava va nga lava ku ku daya va file.

²⁰Zinghaho Mosi i lo teka sati wakwe, ni vanana vakwe, a va khilelisa mbongoleni, a tlhelela tikweni ga Gipite. Mosi i lo teka nhonga ya Nungungulu canjeni gakwe.

²¹Zonake Jehova aku ka Mosi: Lezi wena u tlhelako kuya Gipite, alakanya zihlamaliso zontlhe lezi nzi zi vekileko canjeni ga wena, u ta ya zi maha mahlweni ka Faro; kanilezi mina nzi ta nonohisa a mbilu yakwe, a nga vumeli a vanhu ku famba.

²²Zonake u taku ka Faro: Jehova i ngalo: Israeli i nʼwana wa mina wa matewula. [11]

²³Nzi ngalo ka wena: Tlhatlha nʼwana wa mina, a ya nzi khozela; kanilezi loku u ala ku mu tlhatlha a famba, nzi ta daya a nʼwana wa wena wa matewula.

²⁴Zonake laha ndleleni, na va hi lomu ndlwini ya vaenzi, Jehova i lo tlhangana ha Mosi; i wa lava ku mu daya.

²⁵Makunu Zipora i lo teka a ribye go kariha, a tsema a dewu ga magumo ya nisanyana wakwe, a khumba ha gona a milenge ya Mosi, aku: Hakunene, a ka mina wena u nuna wa nkhata. [12]

²⁶Hikwalaho Jehova i lo mu tsika: zinghaho Zipora aku: U nuna wa nkhata hi kota ya wutshiva.

²⁷Zonake Jehova aku ka Aroni: Famba xiwuleni u khinga Mosi. Aroni i lo suka aya mu kuma le xitsungeni xa Jehova: i lo mu pswopswa.

²⁸Makunu Mosi i lo hlawutela Aroni tontlhe timhaka ta Jehova leti a mu rumileko, ni ziwoniso zontlhe lezi a mu leleteleko zona.

²⁹Zonake Mosi na Aroni va lo famba va ya tsombanyisa a masingalakati wontihe ya vanana va ka Israeli.

³⁰Aroni i lo hlawutela a timhaka tontlhe leti Jehova a byelileko Mosi, i to maha ni ziwoniso mahlweni ka vanhu.

³¹A vanhu va lo vumela; laha va ngazwa lezaku Jehova i alakanyile a vanana va ka Israeli, ni lezaku i wonile kuxaniseka kabye; hikwalaho va lo khizama va khozela.