Read tshwa Eksodusi 8 Bible Online

Eksodusi 8 - tshwa bible

Eksodusi 8

¹Zonake Jehova aku ka Mosi: Famba ka Faro u yaku ka yena: Jehova i ngalo: Tsika a vanhu va mina va ya nzi khozela.

²Kanilezi loku u ala ku va tlhatlha, nzi taba a tiko ga wena gontlhe hi makhele.

³A congo wu ta tala ha wona, ma ta kanziha ma enghena lomu ndlwini ka wena, ni lomu kwarutwini ya wena, ni mubhedini wa wena, ni lomu tindlwini ta malanza ya wena, ni lomu tikweni gontlhe ga wena, ni lomu makhombarini, ni lomu ka zibya za ku vuvela ka zona a zibaba.

⁴A makhele ma ta kanziha hehla ka wena, ni hehla ka tiko ga wena, ni hehla ka malanza ya wena wontihe.

⁵Zonake Jehova aku ka Mosi: Byela Aroni uku: Tlakusa a canja ga wena ni nhonga ya wena hehla ka micongo ni lomu ka zicongwana, ni lomu mativeni, u humesa makhele lomu Gipite,

⁶Aroni i lo tlakusa a canja gakwe hehla ka mati ya Gipite; a makhele ma lo huma, ma tata a tiko ga Gipite.

⁷Ni tinʼanga ti lo maha lezo hi wutlhari ga tona, ti humesa makhele lomu tikweni ga Gipite.

⁸Zonake Faro i lo vitana Mosi na Aroni, aku ka vona: Kombelani ka Jehova kasi a susa makhele ka mina, ni ka tiko ga mina. Zonake nzi ta tlhatlha a vanhu va ya phahlela ka Jehova.

⁹Mosi aku ka Faro: Za vumeleka ka wena a ku nzi byela xikhati lexi nzi to ku kombelela ha xona, wena ni malanza ya wena, ni tiko ga wena, kasi a makhele ma nwalala ka wena, ni lomu tindlwini ta wena, ma sala congweni koce.

¹⁰Faro aku: Manziko ni mixo. Mosi aku: A zive nghaho, kasi wena wa fela ku zi tiva lezaku a ku kona wo fanana na Jehova, Nungungulu wa hina.

¹¹A makhele ma ta nwalala ka wena, ni ka malanza ya wena, ni ka tiko ga wena, ma sala congweni koce.

¹²Mosi na Aroni va lo suka mahlweni ka Faro. Zonake Mosi i lo rila mahlweni ka Jehova hi kota ya makhele lawa a nga ma rumele ka Faro.

¹³Jehova i lo maha kota lezi Mosi a kombelileko; a makhele ma lofa lomu tindlwini, ni lomu mitini ni lomu masinwini.

¹⁴Va lo ma wungeletela ma maha tinhulu ta hombe, a tiko gi nuha wona.

¹⁵Kanilezi laha Faro a nga wona lezaku i hlangutilwe, i lo ti nonohisa a mbilu yakwe. A nga ingisangi, khwatsi hi lezi Jehova a wulileko.

¹⁶Jehova aku ka Mosi: Byela Aroni uku: Tlakusa a nhonga ya wena uba a tshuri wa misava, wu ta hunzuka wu maha tinhwala lomu tikweni gontlhe ga Gipite.

¹⁷Zonake va lo maha lezo. Aroni i lo tlakusa a canja gakwe na khomile nhonga, aba a tshuri wa misava; wu lo hunzuka wu maha tinhwala lomu ka vanhu ni lomu ka zihari. A tshuri wontihe wu lo hunzuka wu maha tinhwala lomu tikweni gontlhe ga Gipite.

¹⁸A tinʼanga na tonawu ti lo maha hi wutlhari ga tona kasi ti fela ku humesa tinhwala; kanilezi ti lo tsanzeka. Zonake a tinhwala ti lova kona ka vanhu ni ka zihari.

¹⁹Zonake a tinʼanga tiku ka Faro: Leli litiho la Nungungulu! Hambu lezo a mbilu ya Faro yi lo sihalala; a nga va ingisangi, khwatsi hi lezi Jehova a wulileko.

²⁰Jehova aku ka Mosi: Vuka laha mixweni uya yima mahlweni ka Faro; loku aya matini, u taku ka yena: Jehova i ngalo: Tlhatlha a vanhu va mina va ya nzi khozela!

²¹Hakuva loku u ala ku tlhatlha a vanhu va mina, nzi ta rumela a mabhawani hehla ka wena, ni hehla ka malanza ya wena, ni ka tiko ga wena, ni lomu tindlwini ta wena; a tiyindlu ta vaGipite ti ta tala hi mabhawani, ni misava va nga ka yona.

²²A siku lego nzi ta hambanyisa a tiko ga Goxeni, legi ku tshamako a vanhu va mina, lomo ku nga tava kona mabhawani, kasi wa fela ku zi tiva lezaku nzi mina Jehova xikari ka misava.

²³Mina nzi ta veka mbhingano xikari ka vanhu va mina ni vanhu va wena. Lexo xikombiso xi tava kona manziko.

²⁴Zinghaho Jehova i lo maha lezo. A mabhawani manyingi ma lota lomu ndlwini ya Faro, ni lomu tindlwini ta malanza yakwe, ni lomu tikweni gontlhe ga Gipite, a tiko gi lo onhakala hi mabhawani.

²⁵Faro i lo vitana Mosi na Aroni, aku ka vona: Fambani mu ya phahlela ka Nungungulu wa nwina tikweni legi.

²⁶Mosi aku ngalo: A zi faneli ku maha lezo; hakuva a miphahlelo leyi hi phahlelako ha yona Jehova, Nungungulu wa hina, yi tava leyi yi yilako ka vaGipite. Loku hi tlhava lezi zi yilako mahlweni ka vaGipite, va ta hi gandla hi maribye.

²⁷Hi ta famba xiwuleni a pfhuka wa masiku manharu, hi laho hi ta ngaya phahlela ka Jehova, Nungungulu wa hina, kota lezi a ta nga hi byelisa zona.

²⁸Zonake Faro aku: Nzi ta mu tlhatlha mu ya phahlela ka Jehova, Nungungulu wa nwina le xiwuleni, kanilezi mu ngayi kule. Nzi kombeleleni.

²⁹Mosi aku: Languta, nza suka ka wena nzi famba nzi ya kombela ka Jehova, manziko a mabhawani ma ta nwalala ka Faro, ni ka malanza yakwe, ni ka tiko gakwe. Kanilezi ngha Faro a nga engeti a khohlisa, hi ku ala ku tlhatlha vanhu va ya phahlela ka Jehova.

³⁰Zonake Mosi i lo suka mahlweni ka Faro, aya kombela ka Jehova.

³¹Jehova i lozwa a mukombelo wa Mosi, a susa mabhawani ka Faro, ni malanza yakwe, ni lomu tikweni gakwe ku nga sali ni ginwe.

³²Kanilezi Faro i lo engeta a nonohisa a mbilu yakwe, a ala ku tlhatlha vanhu.