Read tshwa Joba 10 Bible Online

Joba 10 - tshwa bible

Joba 10

¹A muhefemulo wa mina wu karele hi kuhanya; Nzi ta nyika xikhati ka kutsanwa ka mina, Nzi ta wulawula hi kubayiseka ka muhefemulo wa mina.

²Nzi taku ka Nungungulu: U nga nzi koni; Nzi kombise lexi u nzi ranisako ha xona.

³Za ku sasekela a kuva u nzi tsimbeketa, Lezaku u kanyisa a ntiro wa mandla ya wena, U ti wonekelisa makungweni ya va kubiha ke?

⁴U na ni mahlo ya nyama, U wona kukotisa lezi munhu a wonisako zona ke?

⁵A masiku ya wena ma ringana ni masiku ya munhu ke? Ni malembe ya wena ma ringana ni malembe ya munhu,

⁶Lezaku wena u lava zihambunyeto za mina, U hlotisisa xionho xa mina ke?

⁷Wena wa tiva lezaku a nzi na nanzu, Ni lezaku a nga kona loyi a nga tlhatlhisako mandleni ya wena.

⁸A mandla ya wena ma lo nzi maha, Ma nzi wumba khwatsanyana, Kanilezi makunu wena wa nzi lovisa.

⁹Alakanya lezaku u nzi mahile kukotisa wumba, U ta nzi tlhelisa nziya tshurini kambe ke?

¹⁰A ku nzi chululangi khwatsi nzi masi, U nzi maha nzi tiya khwatsi nzi lubisi ke?

¹¹U lo nzi ambexa hi hlonge ni nyama, U nzi tiyisa hi marambu ni misiha.

¹²U lo nziha wutomi ni wuxinji, A kuhlayisa ka wena ku lo lonzowota moya wa mina. [15]

¹³Hambu zi hi tano, u alakanyile mbilwini ya wena, Nza zi tiva lezaku lezi zilo zi kona nzeni ka wena,

¹⁴Lezaku loku nzi onha, wena u ta nzi xiyelela, Na u nga nzi tlhatlhi kugoheni ka mina.

¹⁵Khombo ka mina, loku nzi hi wa kubiha! Hambu loku nzi hi wa kululama, cima nzi nga ta tlakusa hloko ya mina. Nzi tele hi tingana, nzi cuwuka kubayiseka ka mina.

¹⁶Loku nzi wa ta tlakusa hloko wena wa nzi hlota kukotisa nghala yo tshisa, U ti wonekelisa ka mina hi kuhlamalisa.

¹⁷Wena wa vuxeta vakustumunyu vo nzi vukela, Wa engetela a zanga ya wena ka mina, U nzi vukela hi mabutho.

¹⁸U nzi humesele yini rumbyini ga mamani? O, loku nzi wa fele kona, nzi nga woniwi hi munhu!

¹⁹Ngha nzi te khwatsi a nzi na ngava kona, Ngha nzi tekilwe hi le rumbyini ga mamani nzi yiswa nkeleni.

²⁰A masiku ya mina a hi ma tsongwani ke? a a nzi tsike, Kasi nza fela ku tangala kutsongwani,

²¹Hi mahlweni na nzi nga se ku fambela magumo, A tikweni ga munyama, ni nzhutini wa kufa;

²²A tikweni ga munyama khwatsi hi xikari ka wusiku, Ni ga nzhuti wa kufa ni pfilupfilu, Laho a kuwonekela ku fananako ni munyama.