Read tshwa Joba 11 Bible Online

Joba 11 - tshwa bible

Joba 11

¹Zonake ku lo hlamula Zofare, a muNaama, aku:

²A timhaka to tala ta kunghahi ti nga vumala hlamulo ke? A munhu wa ziwulawula i ta hlayelwa kululama ke?

³A timhaka ta wena ta hava ti nga miyeta vanhu, Lezaku u tseketsela u nga wiswi tingana ke?

⁴Hakuva wena u te ngalo: A gonzo ya mina yi basile, Nzi basile mahlweni ka wena.

⁵O, loku ku wo khwatsi Nungungulu wa wulawula, A vulula nomu wakwe a ku hlamula!

⁶I wa ta ku kombisa mifihlakalo ya wutlhari, Legi gi wuyetako ha kambiri lezi u zi tivisako zona. Hikwalaho zi tive lezaku Nungungulu a nga ku tsayisi ku ringana ni kugoha ka wena.

⁷Wa zi kota ku mu tiva Nungungulu hi ku mu lavisisa ke? Wa zi kota ku pimisisa kumbhelela ka Nyamintamu ke?

⁸Ku tlakukile ku fanana ni tilo; u ta maha yini? Ku etile ku hunza Xeole; u nga tiva yini wena ke? [16]

⁹A lipimo la kona li lehile ku hunza misava, Li anamile ku hunza a bimbi.

¹⁰Loku yena a hunza a ya boha munhu, Kasi ku mu ranisa kulamuleni, Himani a nga mu tsanzekisako?

¹¹Hakuva yena wa tiva a vanhu va nga nyawuliko, Wa wona kubiha hambu loku a nga ku hlotisisi.

¹²Za tsanza ka xipumbu ku kuma wutlhari, Kota lezi zi tsanzako ka ximbongolana ku belekiwa na xi hi munhu.

¹³Loku wena u longisela a mbilu ya wena, U tlakusa mandla ya wena kakwe,

¹⁴Loku u susa a kugoha ku nga mandleni ya wena, U nga tsiki kubiha ku tshama tindlwini ta wena;

¹⁵Zonake u ta tlakusa a nghohe ya wena u nga hi na tingana, U ta tiya, u nga ta kuva na wutoya.

¹⁶Hakuva u ta rivala hlomulo wa wena, U ta wu alakanya kukotisa a mati ma hunzileko;

¹⁷Ni wutomi ga wena gi ta xwengula ku hunza hlikanhi, Wena u ta ngangamela, u ta fana ni mixo.

¹⁸U ta tiya hlana hakuva a kutsumba ku tava kona, U ta langutela matlhelo wontihe, zonake u tava ni kuhumula.

¹⁹U ta ti nawula hi kurula, a nga kona a ta nga ku dzuxa, Ina, vanyingi va ta kombela thomo ka wena. [17]

²⁰Kanilezi a mahlo ya vakubiha ma ta lova, Cima va nga ta pona, Va ta tsumba kufa ntsena.