Read tshwa Joba 12 Bible Online

Joba 12 - tshwa bible

Joba 12

¹Joba i lo hlamula, aku:

²Kunene, hi nwina nwece mu tivako nchumu, Ni wutlhari gi tafa zinwe na nwina.

³Minawu nzi na ni kupima khwatsi hi nwina, A nzi tsongwani ka nwina; Himani a nga tiviko lezi mu zi wulako?

⁴Mina loyi nzi nga vitana Nungungulu a nzi hlamula, Nzi mahile xihlekiso ka vaakelane va mina; A munhu wa zinene ni wa kululama, wa tseketselwa!

⁵Lava va tshamekileko va hleka loyi a nga ni khombo; Loyi a nkonzo wakwe wu retemukako wa kanyiswa.

⁶Kasi a miti ya vaphangi ya vuvuma; Ni lava va vukelako Nungungulu va tshameka, Lava va welelako nungungulu wabye mandleni yabye.

⁷Kanilezi wutisa zifuyo, zona zi ta ku gonzisa; Ni tinyanyani ta tilo, ti ta ku byela.

⁸Kutani wutisa misava, yona yi ta ku gonzisa; Ni zidluwani za bimbi, zi ta ku tlhatlhambutela.

⁹Ka zontlhe lezi, himani a nga zi tiviko Lezaku Jehova i lo zi maha ke?

¹⁰A mihefemulo ya zontlhe zi hanyako yi kona canjeni gakwe, Ni mimoya ya vanhu vontlhe.

¹¹Kasi a ndleve a yi hloli magezu, Kota lezi a lirimi li ringako zakuga ke?

¹²A vakale va na ni wutlhari ni ntamu, Ni va malembe ya kuhlaya va na ni kupimisisa.

¹³Nungungulu i na ni wutlhari ni ntamu, I na ni wusungukati ni kupimisisa.

¹⁴Lezi yena a khungumulako, a zi na ku aketwa; Loku a valela munhu, a nga kona a nga mu vululelako.

¹⁵Loku yena a sivela mati, wona mapswha; Ni loku a ma tsika, ma wonha misava.

¹⁶Yena i na ni ntamu ni wutlhari; Loyi a hambukileko ni muhambukisi, hi wumbiri gabye va le canjeni gakwe.

¹⁷Wa yisa masungukati makhotsweni na va phangilwe, A Valamuli a va maha zipumbu.

¹⁸Wa hangalasa a wukosi ga tihosi, A ti boha ziwunu hi mangenje.

¹⁹Loyi a wutlako a tshomba ya vapristi ni ku va hlongola matikweni, A wisa lahasi a vahombe va tiko.

²⁰A ziwulawuli a zi tsona timhaka, Ni ku susa kupimisisa ka zikhosana.

²¹Loyi a tsongahatisako a tihosana, A mbheta ntamu wa vahombe va tiko.

²²Loyi a tsetsulako a zilo za kueta lomu munyameni, A nzhuti wa kufa a wu veka kuwonekeleni. [18]

²³Hi yena a enzelekisako mifumo ni ku yi lovisa, Hi yena a yi anzisako, a tlhela a yi fuvisa.

²⁴Hi yena a susako kupima ka tihosi ta vanhu va misava, A ti maha ti nzulanzula xiwuleni xi nga hiko na ndlela.

²⁵Va hulumetela xinyameni na va nga hi na xibyeningo, A va maha va dedereka khwatsi hi munhu a popilweko.