Read tshwa Joba 13 Bible Online

Joba 13 - tshwa bible

Joba 13

¹A mahlo ya mina ma zi wonile zontlhe lezo, A tindleve ta mina ti zi zwile, nzi pimisisa.

²Lezi mu zi tivako, na minawu nza zi tiva; A nzi hunziwi hi nwina.

³Hizinene, nzi wa ta wulawula ka Nyamintamu, Nza xuva ku xuxisana na Nungungulu.

⁴Kanilezi nwina mu vahembi va mawunwa, Mu tinʼanga ti nga vuniko nchumu.

⁵O, loku ku wo khwatsi ma miyela nwentlhe, Nzi wa ta mu vitana lezaku mu titlhari.

⁶Makunu zwanani a ku ti hlamulela ka mina, Mu ingisela a timhaka ta nomu wa mina.

⁷Mu wa ta yimela Nungungulu hi magezu ya kubiha, Ni ku mu kustumunyela hi mawunwa ke?

⁸Mu wa ta sasisela yena, Mu mu yimela Nungungulu ke?

⁹Zi sasekile a kuva a mu kambisisa ke? Mu wa ta mu khohlisa khwatsi hi loku munhu a khohlisako munwani ke? [19]

¹⁰Hizinene, i ta mu kawuka, Loku mu hi ni xihlawulela le xihundleni.

¹¹A wukulu gakwe gi nga ta mu maha mu chava ke? Ni kutshisa kakwe ku nga ta mu dzuxa ke?

¹²Zonake a timhaka ta nwina ta wutlhari ti ta ku khwatsi i khuma, Ni makhokhola ya nwina ma ta ku khwatsi makhokhola ya wumba.

¹³Miyelani, nzi tsikeni nzi wulawula, A kute ka mina ni xihi xilo xi ta nga nzi humela.

¹⁴Zi vuna yini hambu loku nzi khoma a nyama ya mina hi meno ya mina, Ni ku fumbareta a moya wa mina hi canja ga mina ke?

¹⁵A nga nzi daya, a nzi na ku tsumba zinwani; Kanilezi nzi ta khomisisa hanyela ga mina mahlweni kakwe.

¹⁶Lezi zi tava kuhanyisa ka mina; Hakuva a mukhohlisi a nga ta yima mahlweni kakwe.

¹⁷Xiyisisani kuwulawula ka mina, Pangani tindleve kutlhatlhambuteleni ka mina.

¹⁸Langutani, nzi vekile mhaka ya mina mahlweni kakwe, Nza zi tiva lezaku nzi ta hlayelwa kululama.

¹⁹Himani a zi kotako ku nzi khomisa nomu ke? Loku zi hi tano nzi ta miyela, nzifa.

²⁰Ntsena u nga mahi zilo zimbiri ka mina; Zonake nzi nga ta ku fihlela a nghohe ya mina;

²¹Susa canja ga wena hehla ka mina; Ni kutshisa ka wena ngha ku nga nzi cheli wutoya.

²²Zonake kecara, nzi ta ti hlamulela, Kutani nzi wulawula mina, wena u nzi hlamula.

²³Zingani zionho za mina ni zihambunyeto za mina ke? Nzi mahe nzi tiva xihambuko xa mina ni xionho xa mina.

²⁴Hikuyini u fihlako nghohe ya wena, U nzi maha nala wa wena ke?

²⁵U ta dzukisa a tluka legi gi hahiswako hi mheho ke? U ta hlongolisa a mungu wu womileko ke?

²⁶Hakuva wena wa nziba hi zilo zi bayisako, U nzi tsayisa hi zigoho za wuswa ga mina.

²⁷Ni kambe wa boha mikonzo ya mina hi makhotso, U xiyisisa tontlhe tindlela ta mina; U boha a zipama za mikonzo ya mina.

²⁸Kasi nza mbheteka ku fanana ni xilo xi bolileko; Ku fanana ni nguwo leyi yi gilweko hi sumba.