Read tshwa Joba 15 Bible Online

Joba 15 - tshwa bible

Joba 15

¹Zonake a hlamula Elifaze, a muTemane, aku:

²A munhu a tlharihileko wa zi ko ta ku wulawula timhaka ti nga nyawuliko, A tata a xifuva xakwe hi mheho ya le Mutsuwuka-gambo ke?

³I ta ti hlamulela hi magezu ma nga hiko na bhinzu ke? Hambu kutani a ku wulawula timhaka ti nga vuniko nchumu?

⁴Ina, wena u maha wukhongeli gi nga vuni nchumu, U valela a mukombelo mahlweni ka Nungungulu;

⁵Hakuva a nomu wa wena wu wulawula kugoha ka wena; Wena wa wulawula a magezu ya lava va nga ni wucunguhungu.

⁶A nomu wa wena wa ku kona, a hi mina; Ina, a milomu ya wena ya kustumunya, yi ku vukela.

⁷Hi wena munhu wo ranga ku belekwa ke? Hambu kutani u mahilwe na zitsunga zi nga se va kona ke?

⁸U na ngazwa a xikungo xa Nungungulu ke? A wutlhari ga wena wece ke? [21]

⁹Xini u xi tivako, lexi hina hi nga xi tiviko ke? Xini u xi pimako, lexi hina hi nga xi pimiko ke?

¹⁰Xikari ka hina ku na ni lava va wuvu, ni zikhosana; Ni munwe a nga wa kale ku hunza dadani wa wena.

¹¹Kasi wa nyenya chavelelo wa Nungungulu, Ni magezu yo olova lawa u khongotelwako ha wona ke?

¹²U yiswa kwihi hi mbilu ya wena? Ni mahlo ya wena ma tshunyeta yini,

¹³Laha kaku wena u hunzula a moya wa wena wu vukela Nungungulu, Ni nomu wa wena wu humesa a timhaka ta kunghaho?

¹⁴Xini munhu, lezaku ave loyi a hlazekileko ke? Ni loyi a pswelweko hi wasati, lezaku ave loyi a lulamileko ke? [22]

¹⁵Languta, hambu a vabasileko vakwe a nga va tsumbi; Ina, ni matilo a ma basangi kuwoneni kakwe;

¹⁶I ta tsumbisa kuyini a munhu wa kubiha ko hunzeleta, Loyi a nwako kuonha kukotisa a mati?

¹⁷Nzi ta ku gonzisa, nzi ingise; Lezi nzi zi wonileko nzi ta ku tlhatlhambutela;

¹⁸Lezi a titlhari ti zi wulileko, Lezi va zi kumileko hi ka vadadani vabye, cima a va zi fihlangi;

¹⁹Lava a tiko gi nyikelweko ka vona voce, Na ku nga hi na wa matiko a enghenileko kikari kabye.

²⁰A munhu wa kubiha wa hlokiswa hi kubayisa wontihe masiku yakwe, A ka malembe lawa ma aveliwako a munhu wa lunya.

²¹A guwa ga kuchaviseka ga zwala tindleveni ta yena; Hambu loku ku rulile a mulovisi i ta wela hehla kakwe. [23]

²²A nga tsumbi lezaku i ta pona munyameni, Hakuva a supado yi mu lavelele.

²³Wa nzulanzula a lava zakuga, aku: Zi kwihi ke? Na a tiva lezaku a siku ga munyama gi mu chikelele.

²⁴A zikarato ni hlomulo zi mu chavisa; Za mu tsimbeketa kukotisa a hosi leʼyi ti longiselako kulwa.

²⁵Hakuva i nawulutile a canja gakwe a vukela Nungungulu, A tserama a vukela Nyamintamu.

²⁶I lo tsutsuma kulwa naye, a tiyisa nhamu, A ti fihla lahasi ka madunzu ya hombe ya zitlhangu zakwe;

²⁷Hakuva a nghohe yakwe yi kulukile, I ni madimbo ya mafura xiwunwini xakwe.

²⁸I lo aka mitini yi hahlukileko, Ni lomu tindlwini ti tsikilweko, leti ti longileko a ku maha marumbi.

²⁹Cima a nga ta fuma, ge hambu a tshomba yakwe yi nga ta simamisa, Ni wukosi gakwe gi nga ta anza laha misaveni.

³⁰Cima a nga ta pona munyameni, A mumu wu ta womisa a maravi ya yena, I ta loviswa hi moya wu humako nonwini wa Nungungulu,

³¹Ngha a nga tsumbi zahava, a ti kanganyisa, Hakuva leʼza hava zi tava nchachazelo wakwe.

³²I ta wu kuma na malembe yakwe ma nga se mbhela; Ni manembana yakwe ma nga ta hluka.

³³I ta kotisa a vina legi a mauva ya gona ma hurumukelako na ma nga buvangi; I ta kotisa a sinya ya oliva yi tlhatlhekako zitsangi za yona.

³⁴Hakuva a ntlawa wa vakhohlisi wu tava tingonwa; Ni nzilo wu ta lovisa a matenda ya lava va rengelelwako.

³⁵Va na ni nyimba ya kukhohlakala, va pswala kubiha, A pswalo wa kona hi kukanganyisa.