Read tshwa Joba 17 Bible Online

Joba 17 - tshwa bible

Joba 17

¹A muhefemulo wa mina wu gohekile, A masiku ya mina ma mbhelile, A nkele wu nzi rinzele.

²A vatseketseli va nzi ranzele, Ni mahlo ya mina ma cuwukela kuhlohlotela kabye.

³Nzi tsumbe makunu, u nzi zimela seve mahlweni ka wena, Himani a ta nga nzi tiyisa ahandle ka wena ke?

⁴Hakuva a timbilu tabye u ti fihlele kupimisisa; Hikwalaho u nga ta va vumela a kuva ni migiyo.

⁵Loyi a nyikelako a maxaka yakwe a kuva ma phangiwa, A mahlo ya vana vakwe ma ta mbhela.

⁶I nzi mahile a tsheketo xikari ka vanhu; Nziva loyi a phelelwako mari nghoheni.

⁷A mahlo ya mina ma lutsumiswa hi zixaniso; A ziro zontlhe za mina zi fanana ni nzhuti.

⁸A vanhu va lulamileko zi ta va hlamalisa; Ni lava va nga hiko na nanzu va ta vukela vakhohlisi.

⁹Kasike loyi a lulamileko i ta khomelela ndleleni yakwe; Ni loyi a mandla ya yena ma basileko i ta enzeleka a tiya mbilu.

¹⁰Kanilezi nwina nwentlhe, tlhelani mu wuya kuwulawuleni; A nzi kumi ni munwe xikari ka nwina a tlharihileko.

¹¹A masiku ya mina ma hunzile, ni mixuvo ya mina yi tsanzile; Hambu a maalakanyo ya mbilu ya mina.

¹²Vona va hunzula wusiku giva hlikanhi, Vaku: Ku ni kuwonekela, kasi a munyama wu kusuhani.

¹³Loku nzi rinzela, a Xeole xiva yindlu ya mina; Nzi ta andlala a sango ga mina tlhelweni ga munyama.

¹⁴Nzi wulile ka nkele nziku: Wena u dadani wa mina! Nziku ka ziwungwani: Mu mamani wa mina ni makweru wa mina.

¹⁵Makunu ku kwihi kutsumba ka mina ke? Ku ta woniwa himani ke?

¹⁶Kona ku ta relela tinyangweni ta Xeole, Laho hi ta nga etlela zinwe tshurini.