Read tshwa Joba 22 Bible Online

Joba 22 - tshwa bible

Joba 22

¹Zonake ku lo hlamula Elifaze, a muTemane, aku:

²A munhu a ngava ni xivuno ka Nungungulu? Loyi a tlharihileko i na ni xivuno ka wutsumbu gakwe,

³Wa tsakiswa Nyamintamu hi kululama ka wena ke? Wa bhinzula nchumu hilezi a mahanyela ya wena ma lulamileko ke?

⁴I ku tsayisa hakuva u mu chavako, A ku yisa kulamuleni ke?

⁵A kubiha ka wena a hi ka hombe ke? Ni zigoho za wena a hi za simasima ke?

⁶U amukele seve mahala ka nakuloni; U runzuwule tinguwo ta muvumali.

⁷A ku nyikangi mati a munhu a rerekileko anwa; Ni loyi a nga ni ndlala u mu tsonile xibaba xa wena.

⁸Kanilezi a wahombe u mu vulele misava; Ni loyi a dzunzekileko i akile ka yona.

⁹Wena u tlhelisile a tinoni na ti nga hi na nchumu, Ni mawoko ya zisiwana ma tshobyilwe.

¹⁰Hikwalaho u ranzelwe hi maphanya; Ni nchavo wa xitshuketi wa ku dzukisa;

¹¹U chava munyama laha u nga woniko nchumu, Ni ntalo wa ku mita.

¹²Kasi Nungungulu a nga tshami tilweni gi tlakukileko ke? Languta Kutlakuka ka tinyeleti, kutlakuka ka kuyiniyini!

¹³Na uku: Nungungulu i tiva yini? Wa zi kota ku phondlisa munyama a lamula mhaka ke?

¹⁴Marefu yo phuma ma mu bhiyeleko, a tsanzeka ku wona; Yena wa fambafamba pfhukeni wa tilo.

¹⁵U ta lanzela a tindlela ta kale, Leti a vakubiha va fambileko ha tona ke?

¹⁶Lava va nga susiwa hi mahlweni ka xikhati xabye; Lava a wuakelo gabye gi kukuletilweko hi ntalo wa mati;

¹⁷Lava va teku ka Nungungulu: Suka ka hina! Xini a nga hi mahelako a Nyamintamu ke?

¹⁸Kasike hi yena a tatileko a tiyindlu tabye hi zilo zo saseka. A makungo ya vakubiha a mave kule na mina!

¹⁹A valulamileko va zi wona, va tsaka; Ni loyi a nga hiko na nanzu wa va tseketsela,

²⁰Aku: A valala va hina va mbhelile, A nzilo wu lovisile a titshomba tabye.

²¹Ti wuyiselane na Nungungulu, u ta kuma kurula; Hi lezo u ta kuma kutangala.

²²Amukela nayo wu humako nonwini wakwe; U hlayisa a timhaka takwe mbilwini ya wena.

²³Loku u tlhelela ka Nyamintamu, u ta tlhela u vuxiwa; Loku u hlongola kugoha kule ni tenda ga wena.

²⁴Hoxa a nzalama tshurini, Ni nzalama ya Ofira maribyeni ya micongwana;

²⁵Lezo a Nyamintamu i tava nzalama ya wena, I tava siliva yinyingi ka wena.

²⁶Hakuva hi kona u ta nga kuma kutsaka ka Nyamintamu; U tlakusa a nghohe ya wena ka Nungungulu.

²⁷Zonake u ta maha mukombelo wa wena kakwe, a kuzwa, Na wena u ta tatisa zifungo za wena.

²⁸Loku u ranza a ku maha nchumu u ta humelela ha wona, Ni kuwonekela ku ta woninga tindleleni ta wena.

²⁹Loku u tsongahatiwa, u taku: A nzi vuxiwe! I ta ponisa a munhu loyi a ti koramisako. [34]

³⁰Yena i ta hanyisa ni loyi a nga ni nanzu; I ta mu tlhatlhisa hi kota ya kubasa ka mandla ya wena.