Read tshwa Joba 23 Bible Online

Joba 23 - tshwa bible

Joba 23

¹Zonake Joba i lo hlamula, aku:

²Hambu nyamutlha a kutsanwa ka mina ka bava, A canja ga mina gi binzile hi kota ya kuketa ka mina.

³O, loku nzi wa tiva laha nzi nga mu kumako kona! Loku nzi wa zi kota ku chikela xitshanwini xakwe!

⁴Nzi wa ta veka a mhaka ya mina mahlweni kakwe; Nzi wa ta ti wulawulela hi nomu wa mina.

⁵Ngha nzi wa ta tiva timhaka ta hlamulo wakwe; Nzi pima lezi a nga wa ta zi wula ka mina.

⁶I wa ta nzi holovela hi ntamu wakwe wa hombe ke? Ge, kanilezi i wa ta nzi ingisa.

⁷Loku loyi a lulamileko a wa ta zi kota ku kanetisana naye, Nzi wa tava nzi tlhatlhekile ka mulamuli wa mina kala kupinzuka.

⁸Kanilezi loku nziya Mutsuwuka-gambo, a nga kona laho; Ni le Muhlwa-gambo, laho kambe a nzi mu kumi.

⁹I tira le Nwalungu, kanilezi a nzi mu woni; I ti fihla Dzongeni, laho nzi nga kotiko ku mu wona.

¹⁰Yena wa tiva a ndlela leyi nzi fambileko ha yona, Loku a nzi ringa, nzi ta huma nzi basile kukotisa nzalama.

¹¹A nkonzo wa mina wu lanzela zikanzihelo zakwe; Nzi hlayisile a ndlela yakwe, cima a nzi hambukangi ka yona.

¹²Ge hambu ku tsika zileletelo za milomu yakwe; Nzi hlayisile a timhaka ta nomu wakwe ku hunza a mixuvo ya mina.

¹³Kanilezi i na ni kualakanya kunwe ntsena, himani a nga mu hunzulusako? Ni lezi a zi ranzako wa zi maha. [35]

¹⁴Hakuva yena i ta maha lezi zi yimiselweko mina, Ti tele ka yena a timhaka tinyingi ta kunghahi.

¹⁵Hi lezo zi nzi rurumelisako mahlweni kakwe; Ni loku nzi zi alakanya, nza mu chava nguvu.

¹⁶Hakuva Nungungulu i rerile a mbilu ya mina; Ni Nyamintamu i nzi chavisile,

¹⁷Hakuva a nga nzi vumelangi a kufa a minzhuti na yi nga se kuta, A nga khubhunyetangi a nghohe ya mina hi munyama.