Read tshwa Joba 24 Bible Online

Joba 24 - tshwa bible

Joba 24

¹Hi yini a zikhati zi nga vekwangiko hi Nyamintamu ke? Hikuyini lavo va mu tivako va nga woniko a masiku yakwe ke?

²Vanwani va susa mimbhingano ya matiko, Va risa mitlhambi yi wutlilweko; [36]

³Va hlongola a mbongola ya loyi a felweko hi raru, Va teka a nkavi ya noni a kuva seve. [37]

⁴A vavumali va nikinyiwa lomu ndleleni; A zisiwana za tiko zi fihlala wutshamu ginwe.

⁵Zi vuka punzwini ziya ntirweni wa ku ti lavela zakuga Khwatsi hi timbongola ta khwati; A xiwula xi humesa zakuga zabye ni za vanana vabye.

⁶Vona va tshovela mavele ma seleko lomu masinwini; Va kutsula a xivina xa loyi wa kubiha.

⁷Va tshama ni wusiku va nga hi na tinguwo; Va nga hi na xifenengelo lomu xiramini.

⁸Va tsakamiswa hi tivula ta le zitsungeni, Va wukarela ribye hi ku vumala wufihlalelo.

⁹Lava va felweko hi vararu va wutliwa maveleni ya vanyine vabye, Ni zisiwana zi kurumetiwa ku humesa seve.

¹⁰Va fambafamba zimbyiri, va nga hi na tinguwo; Va rwexiwa tinyanza na va hi ni ndlala.

¹¹Va maha mafura makhurisini ya va kubiha, Va vuva vinya lomu zigowolweni na va hi ni tora.

¹²A mikosi ya vanhu yi zwala le mutini, Ni mihefemulo ya lava va tlhabyilweko yiba huwa; Kanilezi Nungungulu a nga khatali hi kubiha.

¹³A vanwani vabye va venga kuwonekela; A va tivi tindlela ta kona, Ge hambu kuva lomu tisokweni ta kona.

¹⁴A mudayi i vuka ni mixo, A daya a muvumali ni xisiwana; Ni laha wusikwini a ku khwatsi i khamba.

¹⁵A tihlo ga xibhayi gi rinzela a kuphuma, Aku: A gi kona tihlo gi ta nga nzi wona; A ti fihla nghohe yakwe.

¹⁶Laha wusikwini va bhoxa tiyindlu, Kanilezi ni hlikanhi va ti valela; Cima a va tivi nchumu hi kuwonekela.

¹⁷Hakuva a kuca a kabye ko khwatsi i nzhuti wa lufo; Hakuva a kutshisa ka nzhuti wa lufo va ku tiva.

¹⁸Nwina muku: Kanilezi va hunza hi kuhatlisa khwatsi i mati; A xiavelo xabye xi rukatelwe laha misaveni; A va ha fambi tlhelweni ga xivina.

¹⁹Kota xikhwakhwa ni kuhisa zi nyungulukisako a mati ya gapongo, Hizalezo a Xeole xi nwalata a muonhi.

²⁰A nyimba leyi yi mu belekileko yi ta mu rivala; A ziwungwani zi ta phangelana ha yena; Cima a nga ha ta alakanywa kambe, A wa kubiha i ta tshobyiwa khwatsi i sinya.

²¹Hakuva yena waga a ngonwa leyi yi nga belekiko; A nga mahi kusasa ka noni.

²²Hizona, kanilezi Nungungulu wa lehisa hi ntamu wakwe a masiku ya lava va nga ni lunya, Va vuka na va nga tsumbangi lezaku va ta hanya.

²³A va nyika wuponelo, va humula kona, A mahlo yakwe na ma languta a tindlela tabye.

²⁴Hi xikhatanyana va kulisiwa, zonake va hunza hi xihatla, Vawa, va susiwa khwatsi hi vanwani, Va tsenwa khwatsi hi tinhovu ta zipupu za mavele.

²⁵Loku zi nga hi tano, himani a ta nga nzi kaneta, A maha a timhaka ta mina ti nga hi ta nchumu ke?