Read tshwa Joba 28 Bible Online

Joba 28 - tshwa bible

Joba 28

¹Hakunene wu kona a mugodi wa siliva, Ni wutshamu ga nzalama, laha yi basiswako kona.

²A xiketse xi huma lomu misaveni, Ni suku wu kumiwa hi ku nyekisa maribye.

³A munhu a fuvisa munyama; a hlolisisa kueteni lomu hasi, A kuma a maribye ma fihlilweko munyameni ni nzhutini wa kufa.

⁴A bhoxa a chafu kule ni miti ya vanhu, A milenge yakwe a ya ha mu vuni, Hakuva wa lengalenga laha ka ngoti kule ni vanhu.

⁵Le hehla ka misava ku huma zibaba, Kasi lahasi ka yona ku vindlusilwe hi nzilo.

⁶A maribyeni ya yona ku huma safira; Ni tshuri wa nzalama wu kona.

⁷A ndlela ya kona a yi tibyiwi hi gama, Hambu a mahlo ya makoti a ma yi woni.

⁸A yi kanzihelwi hi zivanza zo leva, Ge hambu nghala a yi se hunza hi ka yona.

⁹A munhu wa veka a canja gakwe lomu ribyeni gi nonohako; A hunzulusa a zitsunga hi mitsu ya zona.

¹⁰A bhoxa tindlela lomu maribyeni, Ni tihlo gakwe gi wona zontlhe zilo za lisima.

¹¹Wa sivela mati laya ma vutako lomu ka mageva ya kona, A veka kubaseni lezi zi fihlilweko.

¹²Kanilezi a wutlhari gi kumiwa kwihi ke? Gi kwihi a wutshamu ga kupimisisa ke?

¹³A munhu a nga tivi a tsengo wa zona, A gi kumeki tikweni ga vahanyako:

¹⁴A kueta ku ngalo: A gi kona nzeni ka mina, A bimbi giku: A gi na mina.

¹⁵A gi xabyiwi hi nzalama, Ni siliva a yi na ku pimelwa a tsengo wa gona.

¹⁶A gi na ku ringaniswa ni nzalama ya Ofira, Hambu ni onikisi ya lisima ni safira.

¹⁷A nzalama ni kristali a zi ringani nago; A gi na ku xabyiwa hi zibya za nzalama yi hlutilweko.

¹⁸A ku kumbukiwi nchumu hi korali ni kristali; Hakuva a tsengo wa wutlhari wu hunza maperola.

¹⁹A topaze ya le Etiopia a yi ringani nago, Ge hambu a ku ringaniswa ni nzalama yi hlutilweko.

²⁰Loku zi hi tano, gita hi kwihi wutlhari ke? Gi kwihi a wutshamu ga kupimisisa ke?

²¹Gi fihlelwe a mahlo ya vahanyako, Gi siretilwe ka tinyanyani ta tilo.

²²A kulova ni kufa zi wula ziku: Hi tindleve ta hina hi yi zwile nghumbhunghumbhu ya gona.

²³Nungungulu wa tiva a ndlela yi yako ka gona, Wa tiva ni laha gi tsamako kona. [43]

²⁴Hakuva wa wona magumelweni ka misava, A wona kontlhe lahasi ka tilo.

²⁵Laha a nga pima a kubinza ka timheho, A pima a mati hi lipimo;

²⁶A xikhati lexi a nga yimisa a nayo wa vula, Ni ndlela ya xingwalangwanza xa kudzinza;

²⁷Zonake i lo wona wutlhari a gi tlhatlhambutela, I lo gi tiyisa, ina, a wuya a gi hlolisisa.

²⁸Ni ka munhu i te ngalo: Languta, a ku chava Hosi hi gona wutlhari; Ni ku huma kubiheni hi kona kupimisisa.