Read tshwa Joba 29 Bible Online

Joba 29 - tshwa bible

Joba 29

¹Joba i lo engeta a wulawula, aku:

²O, loku ku wo khwatsi nzi tlhelele tihwetini ta kaleloko, A ku khwatsi hi masikwini lawo Nungungulu a nga nzi hlayisa;

³A xikhatini lexo a kandiya yakwe yi nga wa woninga hehla ka hloko ya mina, Laha a kuwonekela kakwe ku nga nzi rangela nzi tsemakanya munyama!

⁴Khwatsi hilezi nzi nga hi zona ntangeni ya wujaha ga mina, Laha Nungungulu a nga tshamile tendeni ga mina kukotisa munghana;

⁵A xikhatini lexo a Nyamintamu a nga ha hi zinwe na mina, Laha a vanana va mina va nga wa nzi ranzela;

⁶A xikhatini lexo nzi nga wa hlaza mikonzo ya mina hi mawomba, Ni maribye ma nzi humesela mi congo ya mafura;

⁷A xikhatini lexo nzi nga hunza hi lomu mutini nziya hubyeni, Nzi ti longisela a xitshamu le phangweni;

⁸A majaha ma wa nzi wona, ma tlhela nzhako, Ni zikhosana zi lo suka zi yima.

⁹A tihosana ti lo tsika ku wulawula, Ti khoma milomu hi mandla.

¹⁰Ni vahombe va lo miyela, A tirimi tabye ti lo namarela malakalakeni yabye.

¹¹A ndleve leyi yi nga nzizwa, yi lo nzi katekisa, Ni tihlo gi nga nzi wona gi wa nzi mahela wumboni.

¹²Hakuva nzi lo tlhatlhisa a zisiwana leʼzi nga wa rila, Lava va felweko hi vadadani, ni lava va nga hi hava vavuni. [44]

¹³A zikatekiso za loyi a xanisekako zi lota hehla ka mina, Nzi lo maha a mbilu ya noni yi yimbelela hi litsako.

¹⁴Nzi lo ambala kululama, a ku khwatsi tinguwo, A nongameto wa mina wu wa ku khwatsi i kumba ni xihuku. [45]

¹⁵Nzi wa hi mahlo ya zikhumu, Ni mikonzo ya zilema. [46]

¹⁶Nzi wa hi dadani wa zisiwana; Nzi wa hlolisisa a mhaka ya loyi nzi nga mu tiviko.

¹⁷Nzi wa tshova tihlaya ta wa ku biha, Nzi wa kakatlula a muphango menweni yakwe.

¹⁸Zonake nziku: Nzi ta fela xisakeni xa mina, Nzi ta enzelekisa masiku ya mina kukotisa seke.

¹⁹A mutsu wa mina wu nava wuya matini, Wusiku gontlhe a nzhokati yi wa wela hehla ka maravi ya mina.

²⁰A wudumo ga mina ga ha hi giswa ka mina, Ni wura ga mina ga ha hi giswa canjeni ga mina.

²¹A vanhu va wa kangatela ndleve ka mina, va rinzela, Va rutisa loku nzi va nyika wusungukati;

²²Anzhako ka timhaka ta mina, cima va nga wulawuli kambe, Ni timhaka ta mina ti wa wela hehla ka vona.

²³Va wa nzi rinzela khwatsi nzi vula, Va ahlamisa milomu yabye khwatsi hi loku va amukela a vula yo kala.

²⁴Nzi wa su nwayi loku va kanakana, Va wa nga zi koti ku susa kutsaka nghoheni ya mina.

²⁵Laha nzi nga ranza ku va enzela, nzi lo tshama xitshanwini xa le mahlweni, Khwatsi nzi hosi xikari ka yimpi; Ku fana ni loyi a chavelelako la va va rilako.