Read tshwa Joba 3 Bible Online

Joba 3 - tshwa bible

Joba 3

¹Anzhako ka lezo Joba i lo vulula nomu wakwe, a rukatela a siku ga kubelekwa kakwe.

²Joba i lo wulawula, aku:

³A gi love a siku legi nzi nga belekiwa ha gona, Ni wusiku legi va ngaku: A wasati i xurwe nyimba ya lisana la wanuna. [4]

⁴A siku lego a gi hunzuke gi maha munyama, Ngha Nungungulu a nga gi khataleli a hi tilweni, Ge hambu kuwonekela ngha ku ngave kona ka gona.

⁵A gi labyiwe hi munyama ni nzhuti wa kufa, Ngha a refu gi gi khubhunyeta, A gi dzukiswe hi zontlhe leʼzi nga phumisako hlikanhi.

⁶A wusiku lego ngha munyama wa hombe wu gi phumisa, Gi ngavi ga litsako lomu xikari ka masiku ya lembe, Gi nga hlayiwi tsʼengweni wa masiku ya tihweti.

⁷A wusiku lego a give ngonwa, Ku nga zwali ni gezu ga litsako ka gona.

⁸A gi rukatelwe hi lava va rukatelako masiku, Lava va nga ni wutlhari ga ku vuxa Leviatani.

⁹Ngha mahlahle ya gona ma pfhupeliswa: A gi langutele kuwonekela, kanilezi gi nga ku woni, Ge hambu a ku wona wuronga ga mixo.

¹⁰Hakuva a gi valangi tivati ta rumbu ga mamani; Ge hambu ku fihla zikarato mahlweni ka mina.

¹¹Hikuyini nzi nga kala kufa na nza hi rumbyini ga mamani ke? Hikuyini nzi nga kala ku nyikela moya wa mina laha na nzi huma hi rumbyini gakwe?

¹²Hikuyini a madzolo yakwe ma nga nzi vikela ke? Ni mavele lawa nzi anwileko ke?

¹³Hakuva ngha nzi ti nawule nzi rutisa, Ngha nzi etlele, nzi ti humulela,

¹⁴Zinwe ni tihosi ni masungukati ya misava, Lava va ti akeleko zilahla;

¹⁵Kutani ni tihosana leti ti nga ni nzalama, Leti ti tatileko tiyindlu tabye hi siliva.

¹⁶Hambu kutani loku nzi wa handlilwe, Nzi kotisa a vanana lava va nga wonangiko kuwonekela.

¹⁷Laho a vilinganya ya vakubiha ya khawula, Gi hi wuhumulelo ga va nga hiko na ntamu; [5]

¹⁸Laho a tiperesu ti humula khatiginwe, A va hazwi a gezu ga mutsimbeketi.

¹⁹Vatsongwani ni vahombe va ringana laho, Ni khumbi yi tlhatlhekile ka nwinyi wa yona.

²⁰A kuwonekela ku nyikelwa yini ka loyi a nga le kuhlokisweni ke? Ni wutomi gi nyikelwa yini ka lava va nga ni timbiti muhefemulweni ke?

²¹Lava va xuvako kufa, kanilezi ku ngati; Ni lava va ku navelako ku hunza tshomba yi fihlilweko,

²²Lava va wa nga ta tsaka nguvu, Loku va wa ta kuma nkele ke?

²³Hikuyini kuwonekela ku nyikilweko ka munhu loyi a ndlela yakwe yi fihlilweko, Loyi Nungungulu a mu bhiyeleko ke?

²⁴Hakuva a kuga ka mina hi hika ga mina, Ni miketo ya mina yi chululeka ku khwatsi i mati.

²⁵Hakuva a xilo lexi nzi nga xi chava nguvu xi nzi wele, Ni lezi nzi zi dzukako zi nzi humele.

²⁶A nzi na kuhumula, ge hambu kurula, hambu kutshamiseka; Kanilezi a zikarato zi kona.