Read tshwa Joba 30 Bible Online

Joba 30 - tshwa bible

Joba 30

¹Kanilezi makunu nzi xihlekiso ka lava va nga vaswa ka mina, Lava a vadadani vabye nzi nga sola ku va veka Xikari ka timbyana ta tlhambi wa mina.

²Nzi wa ta bhinzula yini hi ntamu wa mandla yabye, Lava va mbhetilweko ntamu hi wukale?

³Va womile hi kuvumala ni ndlala, Va kwaputela lomu xiwuleni, lomu ku swileko kale ku wonheka.

⁴Va khaya mubave le khwatini, A mitsu ya zinjhomi ku hi kuga kabye.

⁵Va hlongolwa xikari ka vanhu, Va kuwelwa khwatsi makhamba.

⁶Va tshamile lomu mikovotlweni ya mikova, Lomu minkeleni ya misava, ni lomu maribyeni.

⁷Vaba huwa lomu xikari ka makhwati; Va tsombana va tumbeta lahasi ka zigetlwani.

⁸I vanana va zipumbu, ina, zi nga hiko na vito; Va hlongolwa tikweni.

⁹Makunu nzi lisimu la va kunghaho, Ina, makunu nzi tsheketo wabye.

¹⁰Va swireka ha mina, va tshama kule na mina; A va chavi ku phelela lomu nghoheni ya mina.

¹¹A va ha ti khomi mahlweni ka mina, va nzi hlokisa; Va tlhatlhile matomu mahlweni ka mina.

¹²A vamijiri va yima tlhelweni ga mina ga xinene; Va susumeta a mikonzo ya mina, Va pola tindlela ta ku nzi lovisa.

¹³Va onha a ndlela ya mina, Va engetela a hlomulo wa mina, Kasi a va na muvuni.

¹⁴Va nzi tela khwatsi hi loku va enghena hi lifa lo anama, Va ti hoxa xikari ka marumbi.

¹⁵A kutshisa ku wele hehla ka mina; Va hlongolisa a kudzunzeka ka mina khwatsi hi mheho; Ni kukateka ka mina ka hunza khwatsi i refu.

¹⁶Makunu a muhefemulo wa mina wu halakele nzeni ka mina; A masiku ya hlomulo ma nzi khomile.

¹⁷Laha wusikwini a marambu ya mina ma nzi tlhava; Ni misiha ya mina a yi kumi ku humula.

¹⁸A nguwo ya mina yi hunzulwe hi ntamu wa nghumbe ya mina; Yi nzi namarele ku fanana ni bhaji ga mina.

¹⁹Yena i nzi hoxile lomu maropeni; Hikwalaho nzi mahile a tshuri ni khuma.

²⁰Nza rila ka wena, kanilezi wena a ku nzi hlamuli; Nza suka nzi yima, kanilezi wa nzi cuwuka ntsena.

²¹A ka mina u hunzukile u maha wa lunya; Hi canja ga wena ga ntamu wa nzi vukela.

²²Wa nzi tlakula hi mheho, u nzi yisa kule; U nzi mbhetisa hi guwa ga xihuhuri.

²³Hakuva mina nza zi tiva lezaku u nzi yisa kufeni: Ndlwini leyi u yi longiseleko vo ntlhe vahanyako.

²⁴Ahemba, loyi a wako a nga nawuluti canja ke? Ni loyi a nga khombyeni a nga kombeli ku vuniwa ke?

²⁵A nzi mu rilelangi loyi a nga zikaratweni ke? Ni muhefemulo wa mina a wu xanisekelangi zisiwana ke? [47]

²⁶Laha na nzi rinzela kusasa, a kubiha ku lota ka mina; Ni laha nzi nga rinzela kuwonekela, ku lota munyama.

²⁷A marumbu ya mina ma vila, a ma kumi kuhumula; A masiku ya kuhlokiswa ma tile hehla ka mina.

²⁸Mina nza famba na nzi swile kanilezi a nzi hiswangi hi mumu; Nzi yima nziba huwa xikari ka hlengeletano.

²⁹Nzi nakulobye wa mahlolwa, Ni munghana wa timbuwu.

³⁰A hlonge ya mina nja ntima, ya tlhatlheka; A marambu ya mina ma swile hi kuhisa.

³¹A xitende xa mina kambe xi hunzukile xiva xirilo; Ni tinanga ta mina ti hunzukile tiva magezu ya laʼva rilako.