Read tshwa Joba 32 Bible Online

Joba 32 - tshwa bible

Joba 32

¹Zonake a vavanuna lavo vanharu va lo gumesa ku wulawula na Joba, hakuva i lo ti wula loyi a lulamileko.

²Zonake yi lo vindlukiswa a zanga ya Elihu, nʼwana Barakeli a muBuzi, wa yindlu ya ka Rama. I lo zangarela Joba hakuva a nga ti wulile loyi a lulamileko mahlweni ka Nungungulu.

³Ni zanga yakwe kambe yi lo vindlukiswa, a vukela vanghana vakwe va vanharu, hakuva na va vumala zo hlamula, va mu kona Joba.

⁴Makunu Elihu i lo hlwela ku hlamula, hakuva va wa mu hunza hi malembe.

⁵Kanilezi laha Elihu a nga wona lezaku ku wa nga humi hlamulo milonwini ya vavanuna lava vanharu, a zanga yakwe yi lo vindluka.

⁶Zonake Elihu nʼwana Barakeli, a muBuzi, i lo hlamula, aku: Mina nzi muswa, nwina mu khosahele; Hi lexo xi nga nzi chavisa, A kuva nzi mu humesela ka mi na kupima.

⁷Nzi te ngalo: A masiku ma ta wulawula, Ni wunyingi ga malembe gi wa ta hi gonzisa wutlhari.

⁸Kanilezi ku na ni moya nzeni ka munhu; Ni kuhefemula ka Nyamintamu ku nyika kupimisisa.

⁹A vanhu va hombe a hi xontlhe xikhati va tlharihileko; Ge hambu vakale a ya pimisisi nongameto.

¹⁰Hilezo nzi nge ngalo: Ingisani; Minawo kambe nzi ta kombisa mapimo ya mina.

¹¹Langutani, nzi wa rinzela kuzwa timhaka ta nwina; Nzi kangatele ndleve ka zigelo za nwina, Laha na ma ha hlota timhaka ta ku wula.

¹²Ina, nzi wa ingisela, nzi xiyisisa; Langutani, a nga kona ni munwe wa nwina a nga hika Joba, Ge hambu ku hlamula timhaka takwe.

¹³Hilezo, mu nga wuli, muku: Hi kumile wutlhari, Hi Nungungulu ntsena a nga mu kholwisako, a hi munhu;

¹⁴Kanilezi a nga se xungetisa a timhaka takwe ka mina; Nzi ta mu hlamula hi magezu ma nga ringaniko ni ya nwina.

¹⁵Va hlamala, a va ha hlamuli nchumu, A va na mhaka ya ku wula.

¹⁶Nzi ta rinzela lezi va miyelako, Kota lezi va nga yimile, va nga hi na xo wula ke?

¹⁷Ahihi, nzi ta hlamulawu xa mi na xipanze, Na minawu nzi ta mu kombisa ka mina kupima.

¹⁸Hakuva nzi tele hi magezu, A moya wu nga nzeni ka mina wa nzi kurumeta.

¹⁹Langutani, a xifuva xa mina xi khwatsi hi vinya gi nga vululelwangiko; Xi longile ku phuxuka khwatsi hi mikwama yiswa.

²⁰Nzi ta wulawula kasi nza fela ku sala nzi phephile; Nzi ta vulula nomu wa mina nzi hlamula.

²¹Nzi nga ta cuwuka a nghohe ya munhu, Ge hambu ku dzumeleta munhu hava.

²²Hakuva a nzi zi tivi ku dzumeleta hava, Ku nga taku a Mumahi wa mina a hatlisa a nzi susa.