Read tshwa Joba 33 Bible Online

Joba 33 - tshwa bible

Joba 33

¹Zinghaho, Joba, zwana kuwulawula ka mina, U ingisela tontlhe timhaka ta mina.

²Languta, nzi vulula a nomu wa mina, A lirimi la mina la wulawula lomu kanwini ka mina.

³A timhaka ta mina ti ta tlhatlhambuta a nongameto wa mbilu ya mina, A milomu ya mina yi ta wulawula hi kutsumbeka lezi nzi zi tivako.

⁴Nzi mahilwe hi Moya wa Nungungulu; Ni moya wa Nyamintamu wa nziha kuhanya.

⁵Loku wena u zi kota, nzi hlamule; Yima, u xaxameta timhaka ta wena mahlweni ka mina.

⁶Languta, mina nzi fanana na wena mahlweni ka Nungungulu; Minawu kambe nzi mahilwe hi wumba. [57]

⁷U nga dzuki u nzi chava, Ni canja ga mina ngha gi nga ku tikeli.

⁸Hakunene, wena u wulawulile tindleveni ta mina, Nzi zwile timhaka ta wena, na uku:

⁹Mina nzi basile, a nzi na zihambunyeto; A nzi na nanzu, a nzi na xigoho.

¹⁰Kanilezi Nungungulu wa nzi kumela nanzu, A nzi hlaya kota nala wakwe;

¹¹I bohile mikonzo ya mina hi makhotso, Wa xiyisisa tindlela ta mina.

¹²Languta, nzi ta ku hlamula, a ka lezo wa hoxisa; Nungungulu ngwa hombe ku hunza munhu.

¹³Hi kuyini u ti karatako u mu vukela, Hakuva yena a nga hlamuleli timhaka takwe tontlhe?

¹⁴Hakuva Nungungulu i wulawula kanwe; Ina kambiri, kanilezi a zi khatalelwi hi munhu.

¹⁵Lomu norweni, ni lomu muwonisweni wa wusiku, Laha a tshongotshongo gi wele hehla ka munhu, Na la su khongoro hehla ka mubhedi;

¹⁶Zonake yena wa vulula tindleve ta vanhu, A tiyisa zileletelo zakwe.

¹⁷Kasi ku tlhelisa munhu xigoheni xakwe; Ni ku mu tsimbeta a nga ti kulisi.

¹⁸Kasi ku vikela a muhefemulo wakwe a kuva wu ngawi rinzini; Ni wutomi gakwe a kuva gi nga lobyiswi hi supado.

¹⁹Wa tsayiswa hi kubayisa loku a hi sangweni gakwe; Ni marambu yakwe ma simamisa ma panza,

²⁰Laha kaku ni wutomi gakwe gi nyenya zakuga, Ni muhefemulo wakwe wu venga kuga ka malongo.

²¹A nyama yakwe yi nyamalala, yi nga ha woneki; Ni marambu yakwe lawa ma nga fihlele, ma woneka lahandle.

²²Ina, a muhefemulo wakwe wu tshinela kusuhani ni nkele, Ni wutomi gakwe gi tshinelela ka valovisi.

²³Loku wu hi kona a ntsumi wu mu khongelelako, Wu hi wunwe xikari ka khume ga mazana, Wu mu kombisako a tifanelo takwe, [58]

²⁴Zonake Nungungulu wa mu hawukela, aku: Mu tlhatlheni, a nga weli rinzini; Mina nzi kumile a nzhiho.

²⁵A miri wakwe wu tava wuswa ku hunza wa xihlangi; I ta tlhelela masikwini ya wuswa gakwe.

²⁶Loku a kombela Nungungulu i ta mu hawukela; A mu kombeta nghohe yakwe hi kutsaka, Hakuva i ta tlhelisela munhu loye a kululama kakwe. [59]

²⁷A yimbelela mahlweni ka vanhu, aku: Nzi onhile, nzi tshovile nongameto, Kambe a nzi bhinzulangi nchumu.

²⁸Yena i tlhatlhisile muhefemulo wa mina, wu nga weli rinzini; Ni wutomi ga mina gi ta wona kuwonekela.

²⁹Mangabye, zontlhe lezo, Nungungulu wa zi maha, Kumbiri ni kanharu munhwini,

³⁰A ku tlhelisa a muhefemulo wakwe hi le rinzini; Kasi a woningelwa hi kuwonekela ka wutomi.

³¹Ingisa khwatsi, Joba, u nzizwa! Rutisa u miyela, mina nzi ta wulawula.

³²Loku u hi ni xa ku wula, nzi hlamule! Wulawula, hakuva mina nza xuva ku ku basisa.

³³Loku zi nge nghaho, ingisela mina: Rutisa u miyela, mina nzi ta ku gonzisa wutlhari.