Read tshwa Joba 35 Bible Online

Joba 35 - tshwa bible

Joba 35

¹Elihu i lo engeta a wulawula, aku:

²U alakanya lezaku zi sasekile lezi u wulako, uku: Kululama ka mina ku hunza ka Nungungulu ke?

³Hakuva wena u ngalo: Nzi bhinzula yini, Nzi ta kuma yini loku nzi nga onhi?

⁴Mina nzi ta ku hlamula, Ni vanghana va wena laya u nga navo.

⁵Cuwuka le tilweni, u wonisisa; Languta a marefu lawa ma tlakukileko ku hunza wena.

⁶Loku wena u onha, u mu onhela yini ke? Ni loku a zihambunyeto za wena zi enzeleka, xini u mu mahelako ke?

⁷Loku wena u lulamile, xini u mu nyikako ke? Kutani xini a xi amukelako canjeni ga wena ke? [66]

⁸A kubiha ka wena ku nga onha a munhu wa ku fana na wena, Ni kululama ka wena ku nga vuna a nʼwana wa munhu ntsena.

⁹Kunene va rila loku a zixaniso zi tele, Va kombela ku vuniwa hi kota ya woko ga wahombe,

¹⁰Kanilezi a nga kona a wulako, aku: I kwihi Nungungulu, a Mumahi wa mina, Loyi a nyikako a zizimba wusikwini;

¹¹Loyi a hi nyikileko kupima ko hunza ka zihari za misava, Ni wutlhari go hunza ga tinyanyani ta tilo?

¹²Vona va rila, kanilezi a nga kona a va hlamulako, Hi kota ya matshanza ya vanhu va kubiha.

¹³Hizinene, Nungungulu a ngazwi mikombelo ya hava, A wa Nyamintamu a nga ta yi khatalela.

¹⁴Hambu loku u wula lezaku a ku mu woni, A mhaka yi le mahlweni kakwe, mu rinzele.

¹⁵Kanilezi makunu hikuva a zanga yakwe yi nga se vindluka, Na a nga khataleli nguvu lezaku vanhu va ti kukumuxa,

¹⁶Hikwalaho Joba wa vulula a no mu mahala, A enzelekisa timhaka ti nga hiko na wutivi.