Read tshwa Joba 37 Bible Online

Joba 37 - tshwa bible

Joba 37

¹Hi kota ya lezo a mbilu ya mina ya rurumela, Yi suka wutshanwini ga yona.

²Ingisani, ingisani a kudzuma ka gezu gakwe, Ni guwa legi gi humako nonwini wakwe.

³I gi zwakalisa ka yontlhe ndengelenge lahasi ka tilo, Ni xingwalangwanza xakwe magemetamusi ya misava.

⁴Anzhako ka xona a gezu ga dzinza: A dzinza hi ntamu wa gezu gakwe; A nga siveli xingwalangwanza loku gi zwala a gezu gakwe.

⁵A gezu ga Nungungulu gi dzinza hi kuhlamalisa ka hombe, Wa maha zilo za hombe lezi hi nga zi pimiko.

⁶Hakuva wa wula ka gapongo: Wela misaveni; A wula lezo kambe ni ka refu ga vula, Ni ka ntita yakwe kambe.

⁷Wa tsikisa a mandla ya vanhu vontlhe ma nga tiri, Kasi a vanhu vontlhe a va mahileko va fela ku zi tiva.

⁸Zonake a zivanza ziya lomu mi nkeleni, Zi tshama lomu timhakweni ta zona.

⁹Kuta zipupuri hi le Dzongeni, Ni xirami hi le Nwalungu.

¹⁰Wa rumela xivave hi xikuhe xakwe, Ni mati ma womiswa hi xirami.

¹¹Kambe wa rwexa a marefu hi mati, A andlalata a refu ga xingwalangwanza xakwe.

¹²Gi renzelekela hi kulaya kakwe, Gi maha zontlhe khwatsi hi kuleletela kakwe Le hehla ka nghohe ya misava.

¹³Wa gi maha gita kota tsayiso hehla ka misava yakwe, Kutani ku neha zikatekiso zakwe ha gona.

¹⁴Zwana lezi, Joba! Yima u ku tseka, u ehleketa hi mitiro yi hlamalisako ya Nungungulu!

¹⁵Wa zi tiva lezi Nungungulu a layako marefu ke? Ni xikhati lexi a mahako a refu gi hatima ke?

¹⁶Wa tiva a matshamela ya marefu, A mitiro yi hlamalisako ya loyi a mbheleleko kutiveni ke?

¹⁷Wa zi pima lezaku a tinguwo ta wena ti kufumelisa kuyini Loku a misava yi rutiswa hi mheho ya le Dzongeni ke?

¹⁸Wa zi kota ku andlalata a tilo khwatsi hi yena; U gi tiyisa kukotisa a woni gi nyekisilweko ke?

¹⁹Hi gonzise lezi hi ta nga wula ka yena, Hakuva a munyama wa hina wa hi tsanzekisa ku wula ni mhaka yinwe.

²⁰Himani loyi a nga mu chiketelako a timhaka ta mina? Kutani himani loyi a navelako ku knlobyiswa ke?

²¹Makunu a vanhu a va zi koti ku languta a kungangamela ka gambo gi nga lomu xikari ka marefu, Loku a mheho yi hunzile yi ma kukuleta.

²²A kuhatima ka nzalama ku huma Nwalungu; Nungungulu i ranzelwe hi wukosi gi chavisako.

²³Hi ku kumbuka Nyamintamu, hi nga kala hi nga mu kumi: I na ni ntamu wa hombe ni nongameto, i tele hi kululama, Cima a nga hlokisi.

²⁴Hikwalaho a vanhu va mu chava: A nga khatali hi loyi a tsumbako a wutlhari ga yena nwinyi.