Read tshwa Joba 39 Bible Online

Joba 39 - tshwa bible

Joba 39

¹Wa xi tiva a xikhati xa ku beleka ka timhuti, Wa xi tiva a xikhati lexi a tihlangu ti nga ni zihlangwana ke?

²Wa zi kota ku tiva a tihweti ta kuvaka ka tona ke? Wa xi tiva xikhati xa kubeleka ka tona ke?

³Tona ti khizama ti pswala zimbutana za tona, Ti susa kubayiseka ka tona.

⁴A vana va tona va tiyela, va kulela khwatini; Va suka va nga ha tlheleli ka tona,

⁵Himani a tlhatlhisileko a mbongola ya khwati? Ni ku tlhatlha a magota ya yona ke?

⁶Nzi yi nyikile xiwula a kuva kaya ka yona, Ni mikova ya munyu a kuva wuakelo ga yona.

⁷Ya hleka a vilinganya ya muti, A yi ingisi a gezu ga muchayeli.

⁸A zitsunga hi wugelo ga yona, Yi ti hlotela zontlhe zilo zo nyuka.

⁹A nyari yi ta vumela a ku ku tirela, Hambu ku tshama xigowolweni xa wena ke?

¹⁰Wa zi kota ku bohelela a nyari xikonwini, Hambu ku yi maha yi ku lanzela yi panzelela marukwani ke?

¹¹U nga yi tsumba hilezi a ntamu wa yona wu nga wa hombe ke? Kutani u ta yi leletela a mitiro ya wena ke?

¹²U ta yi tsumba lezaku yi ta tleketlela a mavele ya wena yi ma wuyisa kaya, Yi ma hlengeletela lomu zigurumbyini ke?

¹³A mbuwu yi tlakusa tipapa na yi tsakile, Kanilezi a mitsenga ya yona a yi na ku hlayisa mavinyani.

¹⁴Yi tsiketa a manza ya yona lahasi, Yi ma kuhlehela lomu tshurini,

¹⁵Yi rivala lezaku a nkonzo wu nga ma faya, Hambu ku kanzihelwa hi zivanza.

¹⁶Yi zangarela a mavinyani ya yo na a ku khwatsi a hi ya yona, Hambu loku yi tsikelela mahala a yi karateki ha zona.

¹⁷Hakuva Nungungulu i yi tsonile wutlhari, Ge hambu ku yi nyika wutivi.

¹⁸Kanilezi a xikhati yi lavako ku tsutsuma, Yi hleka a haxi ni mukhileli wa gona.

¹⁹Hi wena u nyikileko a ntamu ka haxi, Ni ku bombisa a nhamu ya gona hi tshiva loʼwu tsekatsekako ke?

²⁰U gi mahile gi tlula ku fana ni bhanzala ke? A mamvoromvoro ya tinhovu ta gona ma tshisa.

²¹Ga palakaxa lomu mikoveni, gi tsakela a ntamu wa gona, Gi huma gi tlhangaveta a mitlawa yi hlomileko.

²²Gi hleka wutoya, a gi chavi nchumu, Ge hambu ku tlhelela nzhako hi ku chava supado.

²³A kocelo wu kotlongela hehla ka gona, A tlhari gi hatimako ni hubhula.

²⁴Gi dlaladlalama gi heta mipfhuka hi zanga ya gona, A gi yimi loku ku biwa paratana.

²⁵Loku gizwa a guwa ga paratana, giku: Ha-ha! Gi femba a yimpi na ya hi kule, A magezu ya tinduna ni kukanyuluka ka kulwa.

²⁶A mangavi i puruma hi kota ya wutlhari ga wena, A tshambuluta tipapa ta yena ngomama ni le Dzongeni ke?

²⁷Kutani a gama gi purumela hehla hi kuleletela ka wena, Ni ku aka xisaka xa gona le hehla ke?

²⁸Gi tshama lomu maribyeni gi ti akela kona, Hehla ka tlotloloto ya maribye, ni lomu mikovotlweni.

²⁹Na gi hi lomo gi lavelela zakuga za gona, A mahlo ya gona ma zi wona kule nguvu.

³⁰A mavinyani ya gona ma anwa nkhata, Ni laha ku nga ni zirumbi, gonawu gi laho. [73]