Read tshwa Joba 4 Bible Online

Joba 4 - tshwa bible

Joba 4

¹Zonake Elifaze, a muTemane, a hlamula, aku:

²Loku hi ringa ku wulawula na wena, hi ta ku karata ke? Kanilezi himani a nga ti bohako, a nga wulawuli ke?

³Languta, u wa gonzisa vanhu vanyingi, U tiyiseta a mandla ma nga hiko na ntamu.

⁴A timhaka ta wena ti vuxile lava va nga mbhelile ntamu, U tiyisetile madzolo ma rerekileko.

⁵Kanilezi makunu loku zi wele hehla ka wena, zonake wa rereka; Loku zi ku khumba, wa karateka.

⁶A wukhongeli ga wena a hi kona kutsumba ka wena ke? A kulongama ka tindlela ta wena a hi kona a kutsumba ka wena ke?

⁷Hi nga alakanya, himani a nga nga lova na a nga hi na nanzu ke? Hambu kutani, hi kwihi a valulamileko va nga nga lobyiswa ke?

⁸Khwatsi hilezi nzi zi wonileko, lava va rimako kugoha, Va byala kubiha, va tshovela zalezo. [6]

⁹Va lova hi kuhuhuxa ka Nungungulu, Va mbhetiswa hi kuphuxuka ka zanga yakwe.

¹⁰A kudzuma ka nghala ni gezu ga nghonyamo gi mbhelile, Ni meno ya marole ya tinghala ma tshobyilwe;

¹¹A nghala yi khosaheleko yifa hi ku vumala nyama, Ni zinghalana za pswele ga nghonyamo zi hangalasilwe.

¹²Makunu a gezu go kari gi nehilwe ka mina hi kufihlaleni, A ndleve ya mina yi lozwa kuhleva ka gona.

¹³Lomu maalakanyweni ya miwoniso ya wusiku, A xikhati lexi a wurongo ga kueta gi khomako vanhu,

¹⁴A kuchava ni kururumela zi lo nzi wela, Zi lo maha marambu ya mina ma dzevetana.

¹⁵Zonake a moya wu lo hunza hi mahlweni ka mina, Ni misisi ya mina yi lo yima.

¹⁶Wu lo yima, kanilezi nzi wa nga zi koti ku pima xiyimo xa wona: A xiruti xi wa hi mahlweni ka mina, ku wa la su cuwe! zonake nzi lozwa a gezu, giku:

¹⁷A munhu wa kufa a nga lulama mahlweni ka Nungungulu ke? Ni kambe a munhu a nga basa mahlweni ka Mumahi wakwe ke?

¹⁸Languta, hambu malanza yakwe a nga ma tsumbi, Ni ka tona tingelosi takwe i wona zihoxo.

¹⁹Ku hunzeletisa kuyini ka lava va tshamako lomu tindlwini ta wumba, Lava a xiseketelo xabye xi nga laha tshurini, Va hetiswa kukotisa xiwungwani? [7]

²⁰Va lobyiswa kusukela ni mixo kala gambyeni: Va lova kala kupinzuka na va nga khatalelwi.

²¹A lingoti leli li tiyisako tenda gabye li tsemiwa, Vafa na cima va nga se kuma wutlhari.