Read tshwa Joba 7 Bible Online

Joba 7 - tshwa bible

Joba 7

¹A xikhati xa munhu laha misaveni a hi xa kulwa ke? Ni masiku yakwe a me khwatsi masiku ya munhu a tholilweko ke?

²Khwatsi hi khumbi yi navelako a nzhuti, Ni xitiri xi xuvako hakhelo ya ntiro wa xona.

³Zinghaho nzi nyikilwe a tihweti ta zikarato, Nzi avelwe wusiku ga hlomulo.

⁴Loku nzi etlela, nzi ngalo: Nzi ta vuka rini? Gi taba rini? Nzi karele hi ku hunzuluka-hunzuluka mubhedini kala gi woneka wuronga.

⁵A nyama ya mina yi makanya ziwungwani ni marukwani ya tshuri; A dewu ga hlonge ya mina ga khayekela, gi nzi hlokisa.

⁶A masiku ya mina ma tsutsuma ku hunza xikhato xa mukhati; Ma mbheteka na ku nga hi na kutsumba.

⁷O, alakanya lezaku a wutomi ga mina i mheho; A mahlo ya mina ma nga ta ha wona kambe a kusaseka.

⁸A mahlo ya yena loyi a nzi wonileko, ma nga ta ha nzi wona kambe; A mahlo ya wena ma ta nzi languta, kanilezi nzi nga ha tava kona.

⁹Khwatsi hi refu gi hangalakako gi nwalala, Hilezo ni loyi a relelako nkeleni, cima a nga ta ha wuya.

¹⁰A nga ta ha wuya ndlwini yakwe, A wutshamu gakwe gi nga ta ha mu tiva kambe.

¹¹Hikwalaho cima nzi nga ta vala nomu wa mina; Nzi ta wulawula hi hlomulo wa moya wa mina, Nzi ta keta hi kubayiseka ka muhefemulo wa mina.

¹²Nzi bimbi, kutani munyama wa bimbi, Lezi u nzi vekelako varinzeli ke?

¹³Loku nziku: A sango ga mina gi ta nzi tangalisa, Ni tshatshe ga mina gi ta miyeta miketo ya mina,

¹⁴Zonake wena u nzi dzukisa hi miloro, U nzi munzulukisa hi miwoniso,

¹⁵Hi laho a muhefemulo wa mina wu hlawulako ku tlimbiwa, A kufa ku sasekile ku hunza ku tshama nzi hi marambu basi.

¹⁶Nza swireka ha zona, a nzi ranzi ku hanya xontlhe xikhati; Nzi tsike, hakuva a masiku ya mina a ma nyawuli.

¹⁷Xini munhu, lezaku wena u mu kulisa ke? Lezaku wena u mu khatalela ke? [12]

¹⁸Ni lezaku wena u mu enzela mixo ni mixo, U mu ringa xontlhe xikhati ke?

¹⁹Ku ta kala kuve rini na u nga se nzi tsika ke? U ta nziha rini xikhati xa ku mita mari ya mina ke?

²⁰Loku mina nzi onhile, nzi ku mahele yini, wena muhlayisi wa vanhu? Hi kuyini u nzi mahako xivango xa wena, Lezaku mina nziva nzhwalo wa mina wutsumbu ke?

²¹Hikuyini u nga tsetseleliko zihambunyeto za mina, U susa kugoha ka mina ke? Hakuva lokuloku nzi ta etlela tshurini, Loku u nzi lava ni mixo, nzi ta vumaleka.