Read tshwa Tisimu 102 Bible Online

Tisimu 102 - tshwa bible

Tisimu 102

¹Mukombelo wa loyi a xanisilweko, loku a mbhela ntamu a khongotela Jehova. Zwana mukombelo wa mina, Jehova; A kurila ka mina a kute ka wena.

²U nga nzi fihleli nghohe ya wena sikwini ga khombo, Koramisa a ndleve ya wena loku nzi vitana, Hatlisa u nzi hlamula.

³Hakuva a masiku ya mina ma nyamalala khwatsi i musi, Ni marambu ya mina ma swile khwatsi xikungusa,

⁴A mbilu ya mina yi bilwe, yi wuna khwatsi i byanyi, Hakuva nzi rivala a kuga xibaba xa mina.

⁵Hi kota ya kuketa ka mina, A marambu ya mina ma namarela nyameni ya mina. [352]

⁶Nzi fanana ni gumba xiwuleni, Nzi fanana ni xikotlwani xa lomu marumbini.

⁷Nzi na ni xindwave, Nzi kotisa a xinyanyani xi tshamako xoce xixungweni xa yindlu.

⁸A masiku wontihe a valala va mina va nzi rukatela, Ni lava va nzi zangarelako va ruka ha mina. [353]

⁹Hakuva nziga khuma wutshanwini ga xibaba, Nza patsa zakunwa za mina ni mihloti,

¹⁰Hi kota ya kutsanwa ka wena ni zanga ya wena, Hakuva u nzi tlakusile u nzi hoxa kule.

¹¹A masiku ya mina ma fanana ni nzhuti wa laha gambyeni, Nzi wunile kukotisa byanyi. [354]

¹²Kanilezi wena Jehova u tshama kala kupinzuka, Va ku khumbula ka xizukulwana ni xizukulwana.

¹³Wena u ta vuka u mahela wuxinji Zioni, Hakuva makunu xikhati xa ku mu tsetselela; Futsi, a xikhati xi yimisilweko xi chikele.

¹⁴Hakuva a malanza ya wena ma ranza a maribye ya wona, Ma zwela wusiwana a ntshuri wa wona.

¹⁵Zonake a matiko ma ta chava a vito ga Jehova, Ni tihosi tontlhe ta misava ti chava wukulu ga wena.

¹⁶Laha Jehova a ta nga vuxa Zioni, A woneka kungangameleni kakwe.

¹⁷I tazwa a mukombelo wa loyi a vumalako, A nga kanyisi a mukombelo wabye.

¹⁸Lezi zi ta tsalelwa a xizukulwana xi tako, Ni vanhu va ta nga belekiwa va ta dumisa Jehova.

¹⁹I cuwukile lahasi hi le kutlakukeni ka wutshamu gakwe go basa, Na hi le tilweni Jehova i lo languta misava,

²⁰Kasi kuzwa a kutsikwila ka tiperesu, Ni ku tlhatlhisa lava va yimelweko hi kufa; [355]

²¹Kasi ku tlhatlhambutelwa a vito ga Jehova le Zioni, Ni kudumiswa kakwe le Jerusalema,

²²Loku a matiko ni mifumo Zi tsombene kasi ku tirela Jehova.

²³I rerile a ntamu wa mina laha ndleleni, I komisile masiku ya mina.

²⁴Nziku: Nungungulu wa mina, U nga nzi susi na nzi hi xikari ka masiku ya mina; A malembe ya wena nja kala kupinzuka.

²⁵Kale na u vekile a xiseketelo xa misava, A matilo i ntiro wa mandla ya wena. [356]

²⁶Ma ta hunza, kanilezi wena u ta tshama uku tsonzoma, Wontihe ma ta hlakala khwatsi i nguwo; U ta ma hunzula kukotisa kuhendleletwa ka tinganju, Wona ma ta hunza. [357]

²⁷Kanilezi wena u ywaloye, Ni malembe ya wena ma nga tava na magumo.

²⁸A vana va malanza ya wena ma ta aka tikweni, Ni pswalo wabye wu ta tiyisiwa mahlweni ka wena.