Read tshwa Tisimu 105 Bible Online

Tisimu 105 - tshwa bible

Tisimu 105

¹Jehova i alakanyile a xivumelwano xakwe. Bongani Jehova, khongelani a vito gakwe; Tlhatlhambutelani mitiro yakwe matikweni wontihe. [369]

²Yimbelelani kakwe, mu dumiseni hi tisimu, Kanelani hi mitiro yakwe yi rewukisako.

³Ti kuliseni hi vito gakwe go basa, Ngha ti tsaka a timbilu ta lava va lavako Jehova.

⁴Lavani Jehova ni ntamu wakwe; Mu lava nghohe yakwe xontlhe xikhati.

⁵Alakanyani mitiro yi rewukisako a nga yi maha, A zihlamaliso zakwe, ni zinene lezi zi humako nonwini wakwe,

⁶Nwina lixaka la Abrahama, a nanza gakwe, Nwina vana Va Jakobe, vahlawulilweko vakwe.

⁷Hi yena Jehova, a Nungungulu wa hina; A zinene zakwe zi lomu misaveni yontlhe.

⁸Wa alakanya xivumelwano xakwe xontlhe xikhati, A gezu legi gi nyikilweko mazanazana ya zizukulwana; [370]

⁹A xivumelwano lexi a xi mahileko na Abrahama, Ni xifungo xakwe ka Isaka; [371]

¹⁰A zi tiyisa ka Jakobe lezaku ziva nayo, A ka Israeli xiva xivumelwano xi nga gumelwiko.

¹¹Aku: Nzi ta ku nyika a tiko ga Kanani, Lezaku giva tshomba ya wena.

¹²Va wa nga se ku tala, Futsi, va wa hi vatsongwani, va hi tinzhuveti tikweni,

¹³Va wa nzulanzula lomu matikweni ma hambeneko, Va enghena ka mufumo munwe ni munwani. [372]

¹⁴A nga vumelangi munhu ku va xanisa, I lo laya tihosi hi kota yabye; [373]

¹⁵Aku: Mu nga khumbeni vatotilweko va mina, Mu nga lamati vaprofeti va mina.

¹⁶A tiko i lo gi vitanela ndlala, A lovisa zakuga zabye zontlhe.

¹⁷I lo ruma munhu ku va rangela mahlweni, Josefa loyi a nga xabyiswa kota khumbi; [374]

¹⁸Loyi a milenge yakwe yi nga bayiswa hi makhotso, A bohiwa hi tisimbi;

¹⁹Kala xikhati lexi ku nga tatiseka a gezu gakwe, A mhaka ya Jehova yi lo mu ringa.

²⁰A hosi yi lo ruma lezaku a tlhatlhiwa, A mufumeli wa matiko i lo mu vululela a paxo. [375]

²¹I lo mu maha hosi ya yindlu yakwe, Ni muhlayisi wa titshomba takwe tontlhe;

²²A nyikwa malungelo ya ku boha tihosana takwe, Ni ku gonzisa wutlhari ka masungukati.

²³Zonake Israeli i lota lomu Gipite, Jakobe i lo luvela tikweni ga Hamu. [376]

²⁴Jehova i lo anzisa vanhu vakwe, A va nyika ntamu ku hunza valala vabye, [377]

²⁵Lava a nga hunzula timbilu tabye lezaku va venga vanhu vakwe; Va maha wumbyori ka malanza yakwe.

²⁶I lo ruma Mosi, a nanza gakwe, Na Aroni loyi a nga mu hlawulile. [378]

²⁷Va lo tira zirewukiso zakwe xikari kabye, Ni zihlamaliso le tikweni ga Hamu.

²⁸I lo rumela xinyama, ku phuma kontlhe, Cima a va kanetangi a gezu gakwe. [379]

²⁹I lo hunzula mati yabye ma maha nkhata, A daya zidluwani zabye.

³⁰A tiko gabye gi tala hi makhele, Ni lomu tindlwini ta tihosi tabye.

³¹A wula, ku huma mabawani, Ni tinhwala tikweni gabye gontlhe.

³²A va nyika maralala akuva vula yabye, Ni malangavi ya nzilo a tikweni gabye.

³³Aba zivina zabye ni mikuwu yabye, A tshoveletela tisinya ta tiko gabye.

³⁴A laya, a humbi yi huma, Ni xigonwani xa tsanza vahlayi,

³⁵Zi loga gontlhe a byanyi ga tiko, Ni mihanzu ya masimu yabye.

³⁶I lo hihirita wontihe matewula ya tiko gabye, A tinhonzwa tontlhe ta ntamu wabye. [380]

³⁷I lo humesa vanhu vakwe na va hi ni siliva ni nzalama, Xikari kabye ku wa nga hi na wo vanzana. [381]

³⁸A vaGipite va lo tsaka laha va nga andlamuka, Hakuva a chawo wa vaIsraeli wu wa va khomile.

³⁹I lo andlala refu gi va fenengeta, Ni nzilo wo va woningela ni wusiku. [382]

⁴⁰Va lo kombela, a va nyika tihwari, A va xurisa hi xibaba xa le tilweni.

⁴¹A vulula ribye, ku huma mati, Ma khulunga xiwuleni kukotisa congo. [383]

⁴²Hakuva i lo alakanya a xifungo xakwe xi basileko, Na Abrahama a nanza gakwe.

⁴³A humesa vanhu vakwe hi kutsaka, Ni vahlawulilweko vakwe hi kuyimbelela.

⁴⁴A va nyika misava ya vamatiko, Va teka titshomba ta vanhu.

⁴⁵Lezaku kasi va hlayisa a ziyimiso zakwe, Va gonga milayo yakwe. Dumisani Jehova! [384]