Read tshwa Tisimu 106 Bible Online

Tisimu 106 - tshwa bible

Tisimu 106

¹Dumisani Jehova! Khesani Jehova, hakuva i nene; Hakuva a wuxinji gakwe gi simamisa kala kupinzuka.

²Himani a nga hlawutelako a zimaho za ntamu za Jehova, Ni ku zwatisa a wudumo gakwe gontlhe?

³Va katekile, lava va hlayisako nongameto, Lava va mahako kululama xontlhe xikhati.

⁴Jehova, nzi alakanye hi tipswalo leti u mahelako vanhu va wena, U nziha a kuhanyisa ka wena,

⁵Kasi nza fela ku wona a kuvuvuma ka vahlawulilweko va wena, Nzi nengela hi litsako la tiko ga wena, Kasi nza hlalela zinwe ni zigatshomba za wena.

⁶Hina hi onhile ku fana ni vadadani va hina, Hi gohile, hi tira kubiha. [385]

⁷A vadadani va hina a va khatalelangi zihlamaliso za wena le Gipite, A va alakanyangi a wuxinji ginyingi ga wena, Kanilezi va lo ku hluwuka le bimbini, gi nga Bimbi go Pswhuka.

⁸Hambu zi hi tano, a va ponisa hi kota ya vito gakwe, Kasi ku tivekisa a wukulu ga ntamu wakwe.

⁹A kawuka a Bimbi go Pswhuka, gipswa, A va rangela lomu kueteni khwatsi hi lomu xiwuleni. [386]

¹⁰A va ponisa mandleni ya vavengi, A va tirula mandleni ya valala.

¹¹A mati ma khubunyeta valala vabye, Ku nga poni ni munwe wabye,

¹²Zonake va lo kholwa timhaka takwe, Va yimbelela kudumisa kakwe.

¹³Va lo hatlisa va rivala mitiro yakwe, A va rinzelangi a makungo yakwe.

¹⁴Kanilezi va lo engheniwa hi kunavela lomu xiwuleni, Va ringa Nungungulu kona. [387]

¹⁵A va nyika kota kukombela kabye, Kanilezi a va maha va swireka timbilwini tabye.

¹⁶Va lusela Mosi lomu wugovelweni, Na Aroni a basileko wa Jehova. [388]

¹⁷A misava yi avanyeka, yi mita Datani, Yi khubunyeta a ntlawa wa Abiramu.

¹⁸A nzilo wu lo vura hlengeleta nweni yabye, A malangavi ma hisa a vakubiha.

¹⁹Va maha a role le Horebe, Va khizamela a xifananiso xi chululweko. [389]

²⁰Va lo hunzulusa wukosi gabye, Va nyikwa a xifananiso xa homu yi gako byanyi. [390]

²¹Va lo rivala Nungungulu, Muhanyisi wabye, Loyi a nga maha zilo za hombe le Gipite;

²²Ni zirewukiso lomu tikweni ga Hamu, Ni zilo zo tshisa le Bimbini go Pswhuka.

²³Hikwalaho i lo wula lezaku i wa ta va lovisa, Loku Mosi a hlawulilweko wakwe, a wa nga yimangi mahlweni kakwe, Kasi ku rengisa a zanga yakwe, lezaku a nga va lovisi. [391]

²⁴Va lo nyenya a tiko leʼgo saseka, A va kholwangi gezu gakwe.

²⁵Kanilezi va lo kalala lomu matendeni yabye, Va nga ingisi a gezu ga Jehova.

²⁶Hikwalaho i lo va tlakusela a canja gakwe, Kasi ku va wisa lomu xiwuleni; [392]

²⁷Ni ku hangalasa vanana vabye xikari ka matiko, A va hangalasa matikweni wontihe. [393]

²⁸Va lo namarela ka Baal-Peor, Vaga miphahlo ya vafileko. [394]

²⁹Va zangarisa Nungungulu hi zimaho zabye, A ntungu wu lo wela hehla kabye.

³⁰Zonake ku huma Fineasi a lamula mhaka, A ntungu wu gawula. [395]

³¹Lezo zi mu hlayelwa kululama, Ka zontlhe zizukulwana kala kupinzuka.

³²Va lo zangarisa Nungungulu ni le matini ya Meriba, Laha ka kuva Mosi a humelwa hi khombo hi kota yabye.

³³Hakuva va lo zangarisa moya wakwe, Lezaku Mosi a wulawula zahava hi milomu yakwe.

³⁴A va lovisangi a tixaka Leti Jehova a nga wa va leletele ha tona. [396]

³⁵Kanilezi va lo tlhangana ni vamatiko, Va gonza mahanyela yabye.

³⁶Va lo khizamela zifananiso zabye, Lezi zi nga va phasamisa.

³⁷Futsi, va lo phahlela ka madimoni Hi varisanyana ni vanhwana vabye. [397]

³⁸Va halata nkhata wu nga hiko na nanzu, A nkhata wa varisanyana ni vanhwana vabye; Va phahlela ha vona ka zifananiso za le Kanani, Ni tiko gi nyenyeziswa hi nkhata. [398]

³⁹Lezo va lo nyenyeziswa hi mitiro yabye, Va nga tsumbeki zimahweni zabye.

⁴⁰A zanga ya Jehova yi lo vukela tiko gakwe, Laha kaku a swireka hi tshomba yakwe.

⁴¹A va nyikela mandleni ya vamatiko, Lezaku va fumiwa hi vavengi vabye. [399]

⁴²A valala vabye va lo va tsimbeketa, Va tsongahatiwa canjeni gabye.

⁴³Zikhati zinyingi i lo va tlhatlhisa, Kanilezi va mu ala makungweni yabye; Va lova kubiheni kabye.

⁴⁴Hambu-lokoke i lo wona kuxaniseka kabye, Laha a ngazwa kurila kabye;

⁴⁵A alakanya a xivumelwano xakwe hi kota ya vona, A va zwela hi wuxinji gakwe ga hombe. [400]

⁴⁶A va maha va zwelwa wusiwana Hi lava va nga va maha tikhumbi.

⁴⁷Hi hanyise, Jehova, Nungungulu wa hina, Hi hlengelete xikari ka vamatiko, Kasi ha fela ku bonga a vito ga wena go basa, Hi ku dumisa hi ku giya. [401]

⁴⁸A khesiwe Jehova, Nungungulu wa Israeli, Kusukela kusanguleni kala kupinzukeni! A vanhu vontlhe a va wule, vaku; Amen! Dumisani Jehova!