Read tshwa Tisimu 107 Bible Online

Tisimu 107 - tshwa bible

Tisimu 107

¹Bongani Jehova, hakuva i nene, Hakuva a wuxinji gakwe gi simamisa kala kupinzuka.

²Ngha lava va tirulweko va Jehova va wula lezo, Lava a va tiruleko mandleni ya nala;

³A va tsombanyisileko hi lomu matikweni: Hi le Mutsuwuka-gambo, ni le Muhlwa-gambo, le Nwalungu ni le Dzongeni. [402]

⁴Va wa nzulanzula lomu xiwuleni laha ku nga hi na vanhu, A va kumangi muti wo tshama ka wona. [403]

⁵Va wa hi ni ndlala ni tora, A mihefemulo yabye yi lo rereka.

⁶Zonake va lo rilela ka Jehova kukaratekeni kabye, Yena i lo va hlanguta makhombyeni yabye.

⁷I lo va rangela hi ndlela yi lulamileko, Kasi vaya mutini wo tshama kona.

⁸Ngha vanhu va dumisa Jehova hi kota ya wuxinji gakwe, Hi kota ya zihlamaliso lezi a zi maheleko vanana va vanhu.

⁹Hakuva wa kolwisa a muhefemulo wu nga ni tora, A muhefemulo wu nga ni ndlala i wu xurisa hi malongo.

¹⁰Lava va tshamileko munyameni ni nzhutini wa kufa, Na va bohilwe hi zixaniso ni ziketse,

¹¹Hakuva va wa alile timhaka ta Nungungulu, Va kanyisa a makungo ya loyi a Hunzeleleko Kutlakuka,

¹²Hikwalaho i lo koramisa a timbilu tabye hi mikhinyavezo, Va lo khunguvanyeka, va nga hi na muvuni.

¹³Zonake va lo rilela ka Jehova kukaratekeni kabye, Yena i lo va hlanguta makhombyeni yabye.

¹⁴I lo va humesa munyameni ni le nzhutini wa kufa, A pulakanyisa makhotso yabye.

¹⁵Ngha vanhu va dumisa Jehova hi kota ya wuxinji gakwe, Hi kota ya zihlamaliso lezi a zi maheleko vanana va vanhu.

¹⁶Hakuva yena i tshovile a tinyangwa ta suku, A pulakanyisa a tinghonyo ta ziketse.

¹⁷Zipumbu hi kota ya zihambunyeto zabye, Va lo xanisiwa hi kota ya zigoho zabye.

¹⁸Va lo swireka hi tixaka tontlhe ta zakuga, Na va tshinele kusuhi ni tinyangwa ta kufa.

¹⁹Zonake va lo rilela ka Jehova kukaratekeni kabye, Yena i lo va hlanguta makhombyeni yabye.

²⁰I lo rumela a mhaka yakwe a va hanyisa, A va ponisa kulobyisweni kabye.

²¹Ngha vanhu va dumisa Jehova hi kota ya wuxinji gakwe, Hi kota ya zihlamaliso lezi a zi maheleko vanana va vanhu.

²²A va humese a miphahlo ya kubonga, Va tlhatlhambutela mitiro yakwe hi kutsaka.

²³Lava va fambako lomu bimbini hi mataru, Va maha wukwewu lomu matini ya hombe,

²⁴Va wona mitiro ya Jehova, Ni zihlamaliso zakwe a kueteni.

²⁵Hakuva wa ruma, a vuxa bhubhutsa ga mheho, Legi gi vindlusako mabyandlati ya bimbi.

²⁶Va mbekukela hehla matilweni, Va tlhela va relela kueteni, A mihefemulo yabye yi nyeka hi kota ya mhango.

²⁷Va ndlengandlenganyiswa, va dedereka kotisa munhu a popilweko, A wutlhari gabye gontlhe gi mbhela.

²⁸Zonake va lo rilela ka Jehova kukaratekeni kabye, Yena i lo va hlanguta makhombyeni yabye.

²⁹A rutisa a bhubhutsa ga mheho, Lezaku a mabyandlati ma rula.

³⁰Zonake va tsaka hakuva ma rulileko, A va chiketa laha va xuvako kuya kona. [404]

³¹Ngha vanhu va dumisa Jehova hi kota ya wuxinji gakwe, Hi kota ya zihlamaliso lezi a zi maheleko vanana va vanhu.

³²Ngha va mu kulisa a hlengeletanweni ya vanhu, A dumiswa gotsovanyweni wa masingalakati.

³³I hunzula micongo yi maha xiwula; A hunzula zibuka zi maha xikhwakhwa;

³⁴A misava yo nona a yi maha ya munyu, Hi kota ya kubiha ka vaaki va kona. [405]

³⁵A hunzula xiwula xi maha tiva ga mati, A humesa Zibuka misaveni yo woma, [406]

³⁶I akisa lomu lava va nga ni ndlala, Lezaku va aka miti yo tshama kona;

³⁷Va byala masimu ni zivina, Va tshovela mihanzu yo tala.

³⁸A va katekisa, va anza nguvu, A nga hunguli a tsengo wa zifuyo zabye. [407]

³⁹Zonake va hungutilwe, va tsongahatwa Hi kutsimbeketwa, ni kukarateka ni makhombo,

⁴⁰Kanilezi loyi a chelako kusoleka ka tihosana, A ti pepetsekisa xiwuleni lomu ku nga hiko na ndlela, [408]

⁴¹Yena i lo tlakusa lava va hlomulweko kuxanisekeni kabye, A enzelekisa mingango khwatsi mitlhambi.

⁴²A vakululama va zi wona va tsaka, A vakubiha vontlhe va vala milomu.

⁴³Loyi a tlharihileko a ehlekete lezi zilo, A pimisisa a wuxinji ga Jehova.