Read tshwa Tisimu 140 Bible Online

Tisimu 140 - tshwa bible

Tisimu 140

¹Ka muchuli. Lisimu la Davida. Jehova, nzi hlangute ka laʼvo biha, U nzi lonzowota ka vanhu va tihanyi,

²Lava va ehleketako zo biha timbilwini tabye, Xontlhe xikhati va tsombana kasi ku vuxa dzolonga.

³Va lota tirimi tabye ti fana ni ta tinyoka, A wuxungu ga timamba gi lomu nzeni ka milomu yabye. (Sela.) [503]

⁴Jehova, nzi vikela mandleni ya vakubiha, U nzi lwela ka: vanhu va tihanyi, Lava va xuvako ku phinganyeta milenge ya mina.

⁵A vamatshanza va nzi fihlele mi nzhiyo ni tingoti; Va dembile ziyo tlhelweni ga ndlela, Va nzi dembele hi marinzi. (Sela.)

⁶Nzi te ngalo ka Jehova: Wena u Nungungulu wa mina! Zwana a gezu ga mikhongelo ya mina, Jehova.

⁷Jehova Hosi, ntamu wa kuhanyisa ka mina, U lwela a hloko ya mina hi siku ga yimpi.

⁸Jehova, u nga nyiki a wakubiha lezi a zi navelako, U nga vuni makungo yakwe, lezaku a nga dzuki a ti kulisa. (Sela.)

⁹A tihloko ta lava va nzi ranze leko Ngha ti welwa hi lunya la milomu yabye.

¹⁰A makhala ma vurako a ma wele hehla kabye, A va hoxiwe nzilweni, Ni minkeleni kasi va nga ha vuki kambe.

¹¹A munhu wa mawunwa ngha a nga humeleli misaveni; A munhu wa tihanyi i ta susumetelwa makhombyeni hi kubiha.

¹²Nza tiva lezaku Jehova i ta lamulela lava va hlokiswako, Ni ku lulamisa a mhaka ya lava va vumalako.

¹³Futsi, a vakululama va ta dumisa vito ga wena, Lava va lulamileko va ta tshama mahlweni ka wena.