Read tshwa Tisimu 16 Bible Online

Tisimu 16 - tshwa bible

Tisimu 16

¹Lisimu la Davida. Nungungulu, nzi lonzowote, Hakuva nza chavela ka wena.

²Nzi ngalo ka Jehova: Hi wena Hosi ya mina, A nzi na kusasa handle ka wena!

³A vakubasa lava va nga laha misaveni, Hi vona nzi va hlayako vahombe, nzi xalalako ha vona.

⁴Kanilezi lava va ti yimiselako vanwani vanungungulu, Ku ta enzeleka kuxaniseka kabye; A miphahlo yabye ya nkhata cima nzi nga ta yi nyikela, Ge hambu ni ku kumbuka a mavito yabye hi milomu ya mina.

⁵Jehova hi xiavelo xa mina ni gombe ga mina; Hi wena u gongolako a tshomba ya mina.

⁶Nzi panzelwe xiavelo matshanwini ma nzi tsakisako, Ina, nzi na ni tshomba yinene.

⁷Nzi ta bonga Jehova, hakuva wa nzi nyika wusungukati, Ina, a mbilu ya mina ya nzi luleka ni laha wusikwini.

⁸Nzi na na Jehova mahlweni ka mina xontlhe xikhati; Cima nzi nga ta tsekatsekiswa hakuva i le reveni ga mina ga xinene.

⁹Hikwalaho a mbilu ya mina ya tsaka, ni muhefemulo wa mina wa nengela; Ni wona miri wa mina wu ta tshama hi kurula.

¹⁰Hakuva u nga ta tsika a muhefemulo wa mina le Xeole; Ge hambu ku tsika a wakubasa wa wena a wona kubola. [45]

¹¹Wena u ta nzi kangeta a ndlela ya wutomi; A mahlweni ka wena ku tele hi litsako, Ni canjeni ga wena ga xinene ku tele hi kuxalala kala kupinzuka.