Read tshwa Tisimu 19 Bible Online

Tisimu 19 - tshwa bible

Tisimu 19

¹Ka muchuli. Lisimu la Davida. A matilo ma kanela a kungangamela ka Nungungulu; Ni ndengelenge yi kombisa a ntiro wa mandla yakwe. [59]

²A siku gi wulawula ha wona ni ginwani siku, Ni wusiku gi gonzisa a ginwani a ku wu tiva.

³A hi mhaka hambu lirimi, A pfumawulo wa zona a wu zwali.

⁴Hambu zi hi tano, a mhaka ya zona yi humele misaveni yontlhe, Ni magezu ya zona ma chikele magemeta-musi. I akele gambo a tenda xikari ka wona.

⁵Gona gi fanana ni muyeni a humako nhangeni yakwe, Gi tsaka khwatsi i nhenha yi tsutsumako kupalisaneni.

⁶Gi suka le magunweni ya tilo, Gi renzeleka giya ka manwani magumo; A ku na xilo xi zi kotako ku ti sireta a kuhisa ka gona.

⁷A nayo wa Jehova wu mbhelele, wu humuta muhefemulo; A wukustumunyu ga Jehova gi nene, gi tlharihisa xipumbu. [60]

⁸A zileletelo za Jehova zi lulamile, zi tsakisa mbilu; A xilayelo xa Jehova xi basile, xi hanyanyisa mahlo.

⁹A kuchava Jehova ku hlazekile, ku simama kala kupinzuka; A kulamula ka Jehova ku nene, ku lulamile kontlhe,

¹⁰Zi na ni lisima ku hunza nzalama, ina, a ku hunza nzalama yo tala yi hlutilweko, Zi tsombela ku hunza wulombe, ni madona ya zihahla za gona.

¹¹A nanza ga wena ga lulekwa ha zona; Loyi a zi hlayisako i na ni nchachazelo wa hombe. [61]

¹²Himani a tivako a zihoxo zakwe ke? Nzi rivalele lezi zi fihlilweko.

¹³Hlayisa a nanza ga wena ka zionho lezi zi tiriwako ha womu, Lezaku zi nga fumi hehla ka mina. Zonake nzi nga tava ni nanzu wa kuonha ka hombe.

¹⁴A timhaka ta nomu wa mina, Ni maalakanyo ya mbilu ya mina, A zi amukeleko mahlweni ka wena, Jehova, a ribye ga mina ni mutiruli wa mina.