Read tshwa Tisimu 25 Bible Online

Tisimu 25 - tshwa bible

Tisimu 25

¹Lisimu la Davida. Jehova, nzi tlakusa a muhefemulo wa mina ka wena.

²Nungungulu wa mina, nzi ku tsumbile; Ngha nzi nga wiswi tingana. Ngha valala va mina va nga mahi migiyo ha mina.

³A ku wiswi tingana ni munwe wa lava va ku langutelako; Va ta wiswa tingana lava va kanganyisako handle ka xigelo.

⁴Jehova, nzi kangete a tindlela ta wena, U nzi gonzisa a misoko ya wena.

⁵Nzi rangele zineneni za wena, u nzi gonzisa; Hakuva u Nungungulu wa kuhanyiswa ka mina: Nzi ku rinzele xontlhe xikhati.

⁶Jehova, alakanya wuxinji ga wena ni wunene ga wena, Hakuva za hi kona hi kale ka matiko.

⁷U nga alakanyi a zionho za wuswa ga mina, Ni zihambunyeto za mina; Nzi alakanye hi wuxinji ga wena, Hi kota ya wunene ga wena, Jehova. [82]

⁸Jehova i nene ni kululama; Hikwalaho wa komba vaonhi a ndlela. [83]

⁹Wa rangela kululameni lava va koramileko, A va gonzisa ndlela yakwe.

¹⁰Tontlhe tindlela ta Jehova ta wuxinji ni kutsumbeka, A ka lava va hlayisako xivumelwano xakwe ni wukustumunyu gakwe.

¹¹Jehova, hi kota ya vito ga wena Tsetselela kugoha ka mina, hakuva ka hombe.

¹²Ni wihi munhu loyi a chavako Jehova, I ta mu kangeta a ndlela leyi a faneleko ku hlawula yona.

¹³Yena wutsumbu i ta tshameka khwatsi, Ni pswalo wakwe wu ta fumela tiko.

¹⁴Jehova i na ni wuhlengeli ni lava va mu chavako, I ta va tivisa a xivumelwano xakwe.

¹⁵A mahlo ya mina ma languta Jehova xontlhe xikhati, Hakuva i ta tlhatlhisa a mikonzo ya mina ntlhanwini.

¹⁶Nzi cuwukele, u nzi zwela wuxinji; Hakuva nzi nzoce kuhlokisweni.

¹⁷A kuxaniseka ka mbilu ya mina ku enzelekile; Nzi humese zikaratweni za mina.

¹⁸Cuwuka a hlomulo wa mina ni kubayiseka ka mina, U nzi tsetselela a zionho za mina zontlhe.

¹⁹Hi nga wona a kutala ka valala va mina, Ni livengo la ntamu leli va nzi vengako ha lona!

²⁰Hlayisa a muhefemulo wa mina, u nzi tlhatlhisa; Ngha nzi nga wiswi tingana loku nzi chavela ka wena.

²¹Ngha a wunene ni kululama zi nzi lonzowota, Hakuva mina nza ku langutela.

²²Nungungulu, tlhatlhisa Israeli Makhombyeni yakwe wontihe.