Read tshwa Tisimu 27 Bible Online

Tisimu 27 - tshwa bible

Tisimu 27

¹Lisimu la Davida. Jehova hi kuwonekela ka mina ni kuhanyisa ka mina; Nzi ta chava mani ke? Jehova hi khokhola ga wutomi ga mina; Nzi ta rurumela ha mani ke?

²Loku a vakubiha va tshinela A kuga nyama ya mina, A vavengi va mina ni valala va mina Va khunguvanyeka vawa.

³Hambu loku a yimpi yi gova yi ranzela mina, A mbilu ya mina yi nga ta chava; Hambu loku a kulwa ku nzi vukela, Ni lezo nzi ta tsumba.

⁴Xilo xinwe nzi kombelako ka Jehova, nzi ta lava lexo: Hi lezaku nzi tshama ndlwini ya Jehova a masiku wontihe ya kuhanya ka mina, Kasi nza wona a kusaseka ka Jehova, nzi languta tempeli yakwe.

⁵Hakuva i ta nzi fihla xiluvelweni xakwe hi siku ga kuxaniseka, A nzi fihla xihundleni xa tenda gakwe; A nzi kanzihisa hehla ka ribye. [85]

⁶Makunu a hloko ya mina yi ta tlakuswa hehla ka valala va mina lava va nzi ranzelako; Nzi ta nyikela a miphahlo ya kutsaka lomu tendeni gakwe; Nzi ta yimbelela, ina, nzi ta dumisa Jehova.

⁷Jehova, ingisa loku nzi rila hi gezu ga mina, Maha wuxinji ka mina, u nzi hlamula.

⁸A mbilu ya mina yi lo hlamula a gezu ga wena gaku: Lavani nghohe ya mina; Yiku ka wena: A nghohe ya wena Jehova nzi ta yi lava. [86]

⁹U nga fihli a nghohe ya wena ka mina, U nga hlongoli a nanza ga wena hi zanga; Wena loyi u nga muvuneteli wa mina, u nga nzi hlongoli, hambu ku nzi tsika, Nungungulu wa kuhanyiswa ka mina.

¹⁰Hambu loku dadani na mamani va nzi tsika, Jehova i ta nzi rola.

¹¹Jehova, nzi gonzise a ndlela ya wena, U nzi rangela ndleleni yi lulamileko Hi kota ya valala va mina.

¹²U nga nzi nyikeli kuranzeni ka valala va mina; Hakuva a vakustumunyu va mawunwa va nzi vukela, Ni lava va hefemulako titseku.

¹³Mina nza tsumba hakunene Lezaku nzi ta wona a wunene ga Jehova Tikweni ga vahanyileko.

¹⁴Rinzela Jehova, uva ni ntamu, A mbilu ya wena a yi tiye, Ina, rinzela Jehova!