Read tshwa Tisimu 30 Bible Online

Tisimu 30 - tshwa bible

Tisimu 30

¹Lisimu li yimbelelweko kunyikelisisweni ka yindlu ya Davida. Jehova, nza ku dzumeleta, hakuva u nzi tsawule kueteni, A ku vumelangi valala va mina a ku maha migiyo hi kota ya mina.

²Jehova, Nungungulu wa mina, Nzi bile huwa ka wena, u nzi hanyisile.

³Jehova, u humesile a moya wa mina hi le Xeole, U nzi hlayisile nzi hanya, lezaku nzi nga releli xilahleni.

⁴Khesani Jehova hi tisimu, nwina vobasa vakwe; Mu bonga a vito gakwe ga kubasa.

⁵Hakuva a zanga yakwe nja xikhatanyana ntsena, Kanilezi a thomo gakwe gi enela kuhanya kontlhe. A kurila ku ngava kona laha gambyeni, Kanilezi laha mixweni kuva kona litsako. [90]

⁶Laha nzi nga vuvuma nzi wa te ngalo: Cima nzi nga ta tsekatsekiswa.

⁷Jehova, hi wuxinji ga wena u tiyisile a xitsunga xa mina; Kanilezi u lo fihla a nghohe ya wena, zonake nzi lo chava.

⁸Jehova, nzi loba huwa ka wena; Nzilo khongotela Jehova, nziku:

⁹Wena u ta bhinzula yini hi nkhata wa mina, loku nzi relela nziya xilahleni ke? A tshuri wu ta ku dumisa ke, Wona wu ta tlhatlhambutela a zinene za wena ke?

¹⁰Jehova, nzi ingise, u nzi mahela wuxinji; Jehova, ngha u hi muvuni wa mina!

¹¹Lezo u hunzule a kurila ka mina kuva kukina, Wena u nzi tlhatlhile a nguwo ya xirilo, u nzi ambexa hi litsako,

¹²Kasi a muhefemulo wa mina wu fela ku ku dumisa, wu nga miyeli. Jehova, Nungungulu wa mina, nzi ta ku bonga kala kupinzuka.