Read tshwa Tisimu 31 Bible Online

Tisimu 31 - tshwa bible

Tisimu 31

¹Ka muchuli. Lisimu la Davida. Jehova, nza chavela ka wena; Ngha nzi nga wiswi tingana ni siku ni ginwe; Nzi tlhatlhise hi kululama ka wena.

²Releta a ndleve ya wena ka mina, hatlisa u nzi ponisa; Ngha uve ribye ga wuchavelo ga mina, Ni khokhola go nzi hanyisa.

³Hakuva hi wena ribye ga mina ni khokhola ga mina; Hi kota ya vito ga wena u ta nzi rangela, u nzi fambisa.

⁴Nzi tlhatlhise tlhanwini lowu va nzi dembeleko, Hakuva wena u wuchavelo ga mina.

⁵Nza nyikela a moya wa mina canjeni ga wena; U nzi tirulile, wena Jehova, Nungungulu wa lisine. [91]

⁶Nza venga lava va namarelako ka vanungungulu va mawunwa; Mina nza tsumba Jehova.

⁷Nzi ta tsaka nzi buma hi kota ya wuxinji ga wena; Hakuva u wonile a hlomulo wa mina; U tivile a zikarato za muhefemulo wa mina.

⁸A ku nzi nyikelangi mandleni ya nala; U yimisile a mikonzo ya mina wutshanwini gi anamileko.

⁹Jehova, nzi mahele wuxinji, hahuva nzi lomu zikaratweni; A mahlo ya mina ma hokoloka hi hlomulo, ni muhefemulo wa mina, ni miri wa mina.

¹⁰A wutomi ga mina gi hunguliwa hi zixaniso, Ni malembe ya mina hi kutsikwila. A ntamu wa mina wu tshovekile hi kota ya kugoha ka mina, A marambu ya mina ma gutlagutla.

¹¹Hi kota ya valala va mina vontlhe nzi mahile xiruko, Nguvunguvu ka vaakelwani va mina; Nzi mahile xidzukiso ka maxaka ya mina, Lava va nzi wonako lahandle va tsutsuma.

¹²Nzi rivelwe timbilwini ta vanhu kota loyi a fileko; Nzi fanana ni xibya xi fayekileko.

¹³Hakuva nzi zwile vanyingi va hleva ha mina; A kuchava ku nzi ranzele, Loku va tsema xikungo ha mina, Kasi ku susa a wutomi ga mina. [92]

¹⁴Kanilezi nzi ku tsumbile, Jehova, Nziku: Wena u Nungungulu wa mina.

¹⁵A zikhati za mina zi le mandleni ya wena; Nzi hlangute mandleni ya valala va mina, ni lava va nzi xanisako.

¹⁶A nghohe ya wena a yi woningele hehla ka nanza ga wena, U nzi ponisa hi kota ya wunene ga wena. [93]

¹⁷Jehova, ngha nzi nga wiswi tingana, hakuva nzi rilela ka wena; A vakubiha a va wiswe tingana, va miyetwa le Xeole.

¹⁸Ngha yi dumariswa a milomu yi hembako wunwa, Leyi yi wulawulako kubiha hi loyi a lulamileko, Hi ku ti kukumukisa ni ku kanyisa.

¹⁹Gi kulisile kuyini a wunene ga wena, Legi u gi vekelako lava va ku chavako, Legi u va mahelako gona lava va ku tsumbako, A mahlweni ka vana va vanhu.

²⁰U ta va fihla xihundleni mahlweni ka wena, kule ni vaxanisi; U va hlayisa xaxeni wa wena a ka mahlevo ya tirimi. [94]

²¹A dumiswe Jehova! Hakuva i nzi kombisile a wuxinji gakwe gi hlamalisako, Kukotisa loku nzi wa vekilwe khokholeni.

²²A kuxanisekeni ka mina nzite: Nzi hlongolwe mahlweni ka wena, Hambu zi hi tano, u zwile a mikhongelo ya mina Laha nzi ngaba huwa ka wena.

²³Ranzani Jehova nwina nwentlhe vobasa vakwe. Jehova wa hlayisa lava vo tsumbeka, A tlhelisela loyi a ti kulisako lezi zi mu faneleko.

²⁴Tiyani, mu tiyisa timbilu, Nwina nwentlhe mu langutelako Jehova.