Read tshwa Tisimu 33 Bible Online

Tisimu 33 - tshwa bible

Tisimu 33

¹Tsakelani Jehova nwina lava mu lulamileko; A kudumisa ku fanele a vanhu vo lulama.

²Dumisani Jehova hi xitende, Mu kheseni hi xitende xa khume ga tingoti.

³Yimbelelani ka yena a lisimu liswa; Banani hi wutlhari ni guwa ga hombe.

⁴Hakuva a mhaka ya Jehova yi lulamile; Yontlhe mitiro yakwe yi tsumbekile. [100]

⁵Wa ranza kululama ni nongameto; A misava yi tele hi wuxinji ga Jehova.

⁶A matilo ma mahilwe hi gezu ga Jehova, Ni yimpi yontlhe ya wona hi kuhefemula ka nomu wakwe:

⁷A viringetela a mati ya bimbi ma maha nhulu, A veka kueta lomu wuhlayiselweni. [101]

⁸Ngha yontlhe misava yi chava Jehova, Vontlhe vaaki va misava a va rurumele mahlweni kakwe.

⁹Hakuva i lo wula ntsena, yi maheka; A lelela, a misava yiva kona.

¹⁰Jehova wa vinya a makungo ya vamatiko, A maha maalakanyo ya matiko ma nga vuni nchumu. [102]

¹¹A xikungo xa Jehova xi ta tsonzoma kala kupinzuka; A maalakanyo ya mbilu yakwe ma su tsoma zizukulwaneni zontlhe.

¹²Gi katekile a tikolegi Jehova a nga Nungungulu wa gona, Ni vanhu lava a va hlawulileko a kuva tshomba yakwe.

¹³Jehova a cuwuka na hi le tilweni, A wona vontlhe a vana va vanhu.

¹⁴Hi ka wutshamu legi a akileko ka gona Wa langutela vontlhe a vaaki va misava.

¹⁵Hi yena a nga wumba a timbilu tabye vontlhe, Loyi a hlolako mitiro yabye yontlhe.

¹⁶A hosi a yi hluli hi wunyingi ga mabutho; A nhenha a yi poni hi ntamu wa yona wa hombe. [103]

¹⁷A mahaxi ma nga tsanzeka ku ponisa, A munhu a nga hanyiswi hi ntamu wa wona.

¹⁸A mahlo ya Jehova ma tsonometa lava va mu chavako, Ni lava va tsumbako a wuxinji gakwe,

¹⁹Lezaku i ta hlanguta mihefemulo yabye kufeni, Ni ku va hanyisa xikhatini xa ndlala.

²⁰A mihefemulo ya hina yi langutele Jehova; Hi yena muvuni wa hina ni xitlhangu xa hina. [104]

²¹Hakuva a timbilu ta hina ta mu tsakela, Hi tsumba a vito gakwe go basa.

²²Jehova, a wuxinji ga wena a give hehla ka hina, Kukotisa lezi hi ku languteleko.