Read tshwa Tisimu 38 Bible Online

Tisimu 38 - tshwa bible

Tisimu 38

¹Lisimu la Davida la ku ti alakanyisa. Jehova, u nga nzi kawuki zangeni ya wena, U nga nzi tsayisi khulweni ga wena.

²Hakuva a miseve ya wena yi nzi tlhavile, A canja ga wena ga nzi binza. [132]

³A ku na wutomi mirini wa mina hi kota ya zanga ya wena; A ku na kuhanya marambyini ya mina hi kota ya xionho xa mina.

⁴Hakuva a zigoho za mina zi hunza ni hloko ya mina; Kota zi nga nzhwalo wo tika za nzi binza nguvu.

⁵A timbanga ta mina ta nuha, ti huma wubovu, Hi kota ya wupumbu ga mina.

⁶Nzi famba na nzi koramile, nzi petseka nguvu; Gontlhe siku nzi famba na nziba nkosi.

⁷Hakuva a xiwunu xa mina xa hisa ku fana ni nzilo; A ku na wutomi mirini wa mina.

⁸Nzi rerekile, nzi khubazilwe nguvu; Nzi keta hi kota ya kuxaniseka ka mbilu ya mina.

⁹Hosi, wa tiva a kuxuva ka mina kontlhe, Ni kuketa ka mina a ku fihleki ka wena.

¹⁰A mbilu ya mina ya gavatana, ni ntamu wa mina wu mbhelile; Ni kuwona ka mahlo ya mina a ka hi kona.

¹¹A vanghana ni maxaka ya mina va tsawukana ni ntungu wa mina; Ni va ka hina va yima hi le kule.

¹²Lava va hlotako wutomi ga mina va nzi vekela maziyo; Ni lava va xuvako lezaku nzi lamatwa, va wulawula kubiha, Va alakanya kukhohlisa gontlhe siku.

¹³Kanilezi mina khwatsi nzi xiwiri, a nzizwi nchumu; Nzi khwatsi nzi mbeveve, leʼyi nga ahlamuliko nomu.

¹⁴Nzi fanana ni munhu a nga zwiko, Loyi a nomu wakwe wu nga hiko na hlamulo.

¹⁵Hakuva nzi tsumba wena, Jehova; U ta hlamula, Hosi ya mina ni Nungungulu wa mina.

¹⁶Hakuva nzi te ngalo: Ngha va nga bhumi ha mina, Loku a nkonzo wa mina wu retemuka, va ti kulisa ha mina.

¹⁷Hakuva nzi lava kuwa, Ni hlomulo wa mina wu kona mahlweni ka mina wontihe masiku.

¹⁸Nzi ta vumela a kugoha ka mina; Nzi xaniseka hi kota ya xionho xa mina.

¹⁹Kanilezi a valala va mina va hanya khwatsi, va na ni ntamu; Mbanyingi lava va nzi vengako ahandle ka mhaka,

²⁰Lava va tlheliselako kusaseka hi kubiha, Valwa na mina hakuva nzi lanzela kusaseka.

²¹Jehova, u nga nzi tsiki; Nungungulu wa mina, u ngave kule na mina.

²²Hatlisa u nzi vuna, Hosi, u nga kuhanyisa ka mina.