Read tshwa Tisimu 40 Bible Online

Tisimu 40 - tshwa bible

Tisimu 40

¹Ka muchuli. Lisimu la Davida. Nzi rinzele hi lihlaza-mbilu ka Jehova, Yena i kangatele ndleve ka mina, azwa kurila ka mina.

²I nzi humesile rinzini ga lufu, Ni lomu maropeni ya phiriwa; I yimisile a mikonzo ya mina le ribyeni, I tiyisile kufamba ka mina.

³Yena i vekile lisimu liswa nonwini wa mina, Kona kudumisa ka Nungungulu wa hina. Vanyingi va ta zi wona va chava, Va ta tsumba ka Jehova.

⁴I katekile a munhu loyi a tsumbako Jehova; Loyi a nga lanzeliko vamatshanza, Ni lava va hembako mawunwa.

⁵Jehova, Nungungulu wa mina, yi tele a mitiro yi hlamalisako leyi u yi mahileko, Ni makungo ya wena ha hina. A ku na munwe loyi a fananako na wena, Nzi wa ta ranza ku yi tlhatlhambutela, Kanilezi a yi na ku hlayiwa. [135]

⁶A miphahlelo ni minyikelo a ku tsaki ha yona; U vulule a tindleve ta mina; A ku ranzi a miphahlo ya kuhiswa ni minyikelo ya kuonha. [136]

⁷Zonake nzi wa te ngalo: Languta, nzata; Lomu bhukwini ku tsalilwe ha mina. [137]

⁸Nungungulu wa mina, nza nengela ku maha kuranza ka wena; A nawo wa wena wu lomu mbilwini ya mina.

⁹Nzi bile hungu hi kululama lomu hlengeletanweni wa hombe; A nzi valangi nomu wa mina, Jehova, wena hi wena u zi tivako.

¹⁰Mina a nzi fihlangi a kululama ka wena mbilwini yanga; Nzi tlhatlhambutele a kutsumbeka ka wena ni kuhanyisa ka wena. A nzi tumbetangi a wunene ga wena ni zinene za wena le hlengeletanweni wa hombe.

¹¹Jehova, u nga nzi aleli a wuxinji ga wena; Ngha a tipswalo ta wena ni zinene za wena zi nzi lonzowota xontlhe xikhati.

¹²Hakuva a makhombo ma nga hiko na ku hlayiwa ma nzi ranzele, A zigoho za mina zi nzi kamanyetile, lezaku a nzi zi koti ku hafula nzi cuwuka. Zi tele ku hunza a misisi ya hloko ya mina, a mbilu ya mina yi hlulekile.

¹³Jehova, maha wuxinji, u nzi hlanguta, Jehova, hatlisa u nzi vuna.

¹⁴Ngha va chelwa tingana ni ku kanganyiseka Vontlhe lava va hlotako wutomi ga mina kasi ku gi lovisa; A va tlheliselwa nzhako vaku koyo tingana Lava va tsakako hi kulamatwa ka mina.

¹⁵Ngha va hlamaliswa tinganeni tabye, Lava va wulako ka mina, vaku: Wo! wo!

¹⁶Ngha vontlhe lava va ku lavako va tsaka va nengela ha wena; Lava va ranzako a kuhanyisa ka wena, A va simame vaku: A kuliswe Jehova!

¹⁷Mina nzi loyi a xanisilweko, nzi muvumali, Kanilezi Jehova wa nzi alakanya; Wena u muvuni wa mina ni mutiruli wa mina, U nga hlweli, O Nungungulu wa mina.