Read tshwa Tisimu 44 Bible Online

Tisimu 44 - tshwa bible

Tisimu 44

¹Ka muchuli hi kota ya Vana va Kora, Maxili. Nungungulu, hi zi zwile hi tindleve ta hina, A vadadani va hina va hi byelile Hi mitiro leyi u yi tirileko masikwini yabye, A masikwini ya kale ka matiko. [143]

²U lo hlongola a vamatiko hi canja ga wena, Kanilezi vona u va zimekile; U lo mbhetisa matiko manwani, kasi vona va fela ku enzeleka. [144]

³Hakuva a va kumangi tiko hi matlhari yabye, A va hlulangi hi mawoko yabye, Kanilezi hi canja ga wena ga xinene, ni woko ga wena, Ni kuvaninga ka nghohe ya wena, hakuva u lo xalala ha vona. [145]

⁴Nungungulu, wena u hosi ya mina, Leletela a kuhlula ka Jakobe.

⁵Hi kota ya wena hi ta wisa valala va hina; A vitweni ga wena hi ta kanzihela lava va hi vukelako.

⁶Hakuva a nzi tsumbi a wura ga mina, Hambu a supado ya mina yi nga ta nzi ponisa. [146]

⁷Kanilezi hi wena u hi ponisako ka valala va hina, U va wisa tingana lava va hi vengako.

⁸Gontlhe siku hi ti kukumukisa ha Nungungulu; Hi ta khesa a vito ga wena kala kupinzuka. (Sela.)

⁹Hambu zi hi tano, u hi cukumetile, u hi wisa tingana, A ka ha humi ni tiyimpi ta hina.

¹⁰U hi tlhelisile nzhako a mahlweni ka valala va hina; Ni lava va hi vengako va hi phanga.

¹¹Wena wa hi nyikela kukotisa a tiyivu leti ti giwako; U hi hangalasa xikari ka vamatiko.

¹²U xavisa a vanhu va wena hi nyalidede, A ku anzisangi a kufuma ka wena hi tsengo wabye. [147]

¹³Wena u lo hi maha a xiruko ka vaakelwane va hina; Hi tseketselwa ni ku hlekiwa hi lava va hi ranzelako.

¹⁴U hi mahile a vingu xikari ka matiko, A vamatiko va hi zivizela tihloko.

¹⁵A siku gontlhe a litsanwa la mina li le mahlweni ka mina, Ni tingana ti fenengetile a nghohe ya mina,

¹⁶Loku nzizwa gezu ga loyi a nzi rukako, a wula nzhukano ha mina, Ni loku nzi wona a nala ni muphoteli.

¹⁷Zontlhe lezo zi hi humelele, kanilezi a hi ku rivalangi; Hambu a ku tshova a xivumelwano xa wena.

¹⁸A timbilu ta hina a ti ku fularelangi, Ni mikonzo ya hina a yi hambukangi ndleleni ya wena,

¹⁹Lezi u hi tshovileko wutshanwini ga mahlolwa, U hi sireta hi nzhuti wa kufa.

²⁰Loku hina hi wa rivele a vito ga Nungungulu wa hina, Hi nawuluta a mawoko ya hina ka nungungulu mumbe,

²¹Xana Nungungulu a wa nga zi tivangi ke? Hakuva wa tiva a mifihlakalo ya mbilu.

²²Kunene, hi kota ya wena ha dawa siku gontlhe, Hi hlayelwa kota tiyivu ti yako kutlhabyiweni. [148]

²³Vuka, Hosi! hi yini u etlelako ke? Vuka, u nga hi hoxeli magumo. [149]

²⁴Hikuyini u fihlako a nghohe ya wena, U rivala a kuhlokiswa ni kutsimbeketwa ka hina ke?

²⁵Hakuva a mihefemulo ya hina yi koramisilwe lahasi tshurini; A mimiri ya hina yi na su canjala misaveni.

²⁶Vuka, u hi vuna; Hi hlangute hi kota ya wunene ga wena!