Read tshwa Tisimu 49 Bible Online

Tisimu 49 - tshwa bible

Tisimu 49

¹Ka muchuli. Lisimu la vana va Kora. Zwanani timhaka leti, nwina matiko, Dembani ndleve, nwina nwentlhe vaaki va misava.

²Nwina vatsongwani ni vahombe, A vofuma ni lava va vumalako.

³A nomu wa mina wu ta wulawula wutlhari; Ni kuehleketa ka mbilu ya mina ku tava ka kupimisisa.

⁴Nzi ta koramisa a ndleve ya mina ka magezu ya wutlhari, Nzi tlhamusela a wutivi ga mina gi fihlilweko na nzi yimba xitende.

⁵Nzi wa ta chava yini masikwini ya makhombo, Laha na nzi ranzelwa hi kubiha ka valala ke?

⁶Va tsumba a kufuma kabye, Va ti kulisa hi wunyingi ga titshomba tabye.

⁷A munhu a nga zi koti ku tirula a nakulobye, Hambu ku mu humesela nzhiho ka Nungungulu.

⁸(Hakuva a kutirula ka muhefemulo wabye ka lisima, A munhu a nga zi koti ku mahelwa kona hambu ni siku ginwe,)

⁹Lezaku kasi a ta fela ku hanya kala kupinzuka, Na a nga woni kubola.

¹⁰Hakuva wa wona a titlhari na tifa, A zipumbu ni zigwela zi lova zinwe, Va siya titshomba tabye ka vanwani. [161]

¹¹Va alakanya lezaku a tiyindlu tabye ti ta yima tiku tseka, Ni wuakelo gabye ka zizukulwana ni zizukulwana; Va vitana a matiko hi mavito yabye.

¹²Hakuva munhu a nga na ku simamisa a hanya hambu loku a hi ni kufuma, I fanana ni zihari lezi zi fako.

¹³Hi gona hanyela ga zipumbu; Kasike lava va va lanzako va tsakiswa hi magezu yabye. (Sela.)

¹⁴Va yiswa le Xeole khwatsi i ntlhambi, A kufa hi murisi wabye; Ni mixo a valulamileko va ta va fumela, A wumbhuri gabye gi ta giwa hi Xeole, A va na ginwani wuakelo.

¹⁵Kanilezi Nungungulu i ta tirula muhefemulo wa mina ntanwini wa Xeole, Hakuva i ta nzi amukela. (Sela.)

¹⁶U nga chavi loku munhu a fumiswako, Ni laha a wukosi ga yindlu yakwe gi anziswako;

¹⁷Hakuva laha a fako a nga ta suka na nchumu; A wukosi gakwe a gi teleli naye. [162]

¹⁸Hambu lezi a nga khesa muhefemulo wakwe kuhanyeni kakwe, Hambu loku a vanhu va ku dumisa laha wena u ti tsakisako,

¹⁹U taya xizukulwaneni xa vadadani va wena, Lava cima va to kala va nga ha woni kuwonekela.

²⁰A munhu loyi a dzunziwako, kanilezi a nga pimisisi, I fanana ni zihari lezi zi fako.