Read tshwa Tisimu 5 Bible Online

Tisimu 5 - tshwa bible

Tisimu 5

¹Ka muchuli wa Nehilote. Lisimu la Davida. Jehova, zwana kuwulawula ka mina, U ingisa a kuketa ka mbilu ya mina.

²Ingisa kurila ka mina, Hosi ya mina ni Nungungulu wa mina, Hakuva nza ku kombela.

³Jehova, wazwa a gezu ga mina ni mixo, Nzi kombela ka wena laha mixweni, nzi ku langutela.

⁴Hakuva wena a ku Nungungulu a tsakiswako hi kubiha; A wa kubiha a nga zi koti a ku tshama na wena.

⁵A vamatshanza va nga ta yima mahlweni ka wena, Hakuva wa venga vontlhe a vamahi va kubiha.

⁶U lovisa lava va wulawulako mawunwa; Jehova wa nyenya a zigevenga ni vakhohlisi. [15]

⁷Kanilezi mina nzi enghena ndlwini ya wena hi kota ya wuxinji ga wena ga hombe; Nzi khizama hi xichawo ngomama ni tempeli ya wena yo basa.

⁸Jehova, nzi rangele kululameni ka wena hi kota ya valala va mina; Lulameta a ndlela ya wena mahlweni ka mina.

⁹Hakuva a ku na kutsumbeka milonwini yabye, A timbilu tabye ti tele hi kubiha; A minkolo yabye zilahla zi ahlamileko; Va wulawula mahlenga hi tirimi tabye. [16]

¹⁰Va lamule, O Nungungulu, va wise zikungweni zabye; U va hlongola hi kota ya zihambunyeto zabye zo tala, Hakuva vona va ku hluwukile.

¹¹Kanilezi ngha va tsaka vontlhe lava va ku mahako wuponelo gabye; Ngha va buma xontlhe xikhati hakuva wena wa va vikela; Lava va ranzako a vito ga wena a va tatiswe hi litsako.

¹²Hakuva wena Jehova u katekisa loyi a lulamileko, U mu vikela hi wuxinji ga wena khwatsi xitlhangu.