Read tshwa Tisimu 50 Bible Online

Tisimu 50 - tshwa bible

Tisimu 50

¹A makhozelela ma nene. Lisimu la Asafa. Nungungulu, a nga Nungungulu Jehova, i wulile, Na vitana misava kusukela Mutsuwuka-gambo kala Muhlwa-gambo.

²Nungungulu i lo hatima hi le Zioni, Laha ku hunzeleleko kusaseka.

³Nungungulu wa hina wata, a nga ta miyela. A mahlweni kakwe ku na ni nzilo lowu wu lovisako, I renzelekelwe hi bhubhutsa ga ntamu.

⁴I vitana matilweni le hehla, Ni misava, kasi a fela ku lamula tiko gakwe. Deut. 31:28

⁵Tsombanyisani a vobasa va mina vata ka mina, Lava va mahileko a xivumelwano zinwe na mina hi muphahlo.

⁶A matilo ma tlhatlhambuta a kululama kakwe, Hakuva hi Nungungulu wutsumbu a nga mulamuli. (Sela.)

⁷Vanhu va mina, ingisani nzi ta wulawula; Israeli, nzi ta kustumunya nzi ku vukela; Mina nzi Nungungulu, a Nungungulu wa wena.

⁸A nzi ku kawuki hi kota ya miphahlo ya wena, A minyikelo ya wena ya kuhiswa yi le mahlweni ka mina masiku wontihe.

⁹Nzi nga ta teka ni nkuzi yinwe ndlwini ya wena, Hambu ni timhongo marangeni ya wena.

¹⁰Hakuva zontlhe zihari za khwati za mina, Ni mitlhambi yi nga hehla ka mazana-zana ya zitsunga.

¹¹Nza tiva tontlhe tinyanyani ta zitsunga; Ni zivanza zontlhe za khwati za mina.

¹²Loku nzi wazwa ndlala ngha nzi nga ku byeli, Hakuva a misava nja mina, ni kutala ka yona.

¹³Xana mina nzi ngaga a nyama ya tikuzi, Kutani a kunwa a nkhata wa timbuti ke? [163]

¹⁴Nyikela ka Nungungulu a miphahlo ya kubonga; U rihela zifungo za wena ka Loyi a Hunzeleleko Kutlakuka. [164]

¹⁵Nzi vitane zikhatini za makhombo; Nzi ta ku hlanguta, na wena u ta nzi dumisa. [165]

¹⁶Kanilezi a ka wakubiha Nungungulu i ngalo: U ta tlhatlhambutelisa kuyini a milayo ya mina, Kutani a ku wulawula hi xivumelwano xa mina ke? [166]

¹⁷Wena loyi u nga ranziko ku layiwa, U hoxako a magezu ya mina lenzhako ka wena.

¹⁸Loku u wonana ni khamba, u zwanana nago, U hlengela ni zibhayi.

¹⁹U nyiketela a nomu wa wena kubiheni, Ni lirimi la wena li luka mawunwa.

²⁰Wena u tshama u hleva nakuloni, U lumbeta a nʼwana wa nyine wa wena.

²¹Lezi zilo u zi mahile, kanilezi mina nzi lo rutisa, U kala u alakanya lezaku mina nzi fana na wena. Kasike nzi ta ku laya, nzi xaxameta zontlhe mahlweni ka wena.

²²Makunu pimisisani lezi, nwina lava mu rivalako Nungungulu, Kasi nzi nga mu hanzuleli zipanzana, na mu nga hi na ku pona.

²³Loyi a nyikako muphahlo wa kubonga, i dumisa mina, Ni loyi a lulametako a ndlela yakwe Nzi ta mu kombeta a kuhanyisa ka Nungungulu.